Ezekiyele
28 Yehovha a tlhela a vulavula na mina a ku: 2 “N’wana wa munhu, byela murhangeri wa Tiri u ku, ‘Yehovha Hosi Leyi Tlakukeke u ri:
“Leswi mbilu ya wena yi tikuriseke,+ u tshamela ku vula u ku, ‘Ndzi xikwembu.
Ndzi tshama exiluvelweni xa xikwembu exikarhi ka lwandle.’+
Kambe u munhu ntsena, a wu xikwembu,
Hambileswi embilwini ya wena u tivonaka u ri xikwembu.
3 Waswivo! U tlharihe ku tlula Daniyele.+
A ku na swihundla leswi u tumbeteriweke swona.
4 U tifuwisile hi vutlhari bya wena ni hi ku twisisa ka wena
Naswona u tshamela ku tivekela nsuku ni silivhere endhawini leyi u vekaka swilo swa wena swa nkoka.+
5 U ve ni rifuwo ro tala hikwalaho ka leswi u kotaka ku ri fambisa kahle bindzu,+
Mbilu ya wena yi tikurisile hikwalaho ka rifuwo ra wena.”’
6 “‘Hikwalaho Yehovha Hosi Leyi Tlakukeke u ri:
“Leswi embilwini ya wena u tivonaka u ri xikwembu,
7 Ndzi ku tisela valuveri va ta lwa na wena, matiko lama nga ni tihanyi swinene,+
Va ta hlomula mabanga ya vona va herisa swilo hinkwaswo swo saseka leswi u swi kumeke hikwalaho ka ku tlhariha ka wena
Va ta onha ku saseka ka wena.+
9 Xana wa ha ta vula u ku, ‘Ndzi xikwembu,’ eka loyi a ku dlayaka?
U ta va munhu ntsena, ku nga ri xikwembu, evokweni ra lava va ku nyamisaka.”’
10 ‘Valuveri va ta ku dlaya ku fana ni vanhu lava nga yimbangiki,
Hikuva mina ndzi vurile,’ ku vula Yehovha Hosi Leyi Tlakukeke.”
11 Yehovha a tlhela a vulavula na mina a ku: 12 “N’wana wa munhu, yimbelela risimu ra xirilo mayelana ni hosi ya Tiri, u ku eka yona, ‘Yehovha Hosi Leyi Tlakukeke u ri:
13 A wu ri eEdeni, entangeni wa Xikwembu.
A wu sasekisiwe hi ribye rin’wana ni rin’wana ra nkoka
Ku nga rhubi, topazi ni yaspere; krisolita, onikisi ni jeyida; safiri, tukoyisi+ ni emeralda;
Maribye lawa a ma hoxiwe endzeni ka tifureme ta nsuku.
Ma lunghisiwe hi siku leri u vumbiweke ha rona.
14 Ndzi ku avele ku va kerubu leri hlawuriweke leri sirhelelaka.
A wu ri entshaveni yo kwetsima ya Xikwembu,+ a wu fambafamba exikarhi ka maribye lama pfurhaka.
15 A wu ri ni mahanyelo lamanene ku sukela hi siku leri u vumbiweke ha rona
Ku fikela loko u sungula ku endla swilo swo homboloka.+
Kutani ndzi ta ku susa entshaveni ya Xikwembu ku fana ni munhu loyi a nyameke, ndzi ku lovisa,+
Wena kerubu leri sirhelelaka, u ya ekule ni maribye lama pfurhaka ndzilo.
17 Mbilu ya wena yi tikurisile hikwalaho ka ku saseka ka wena.+
U onhe vutlhari bya wena hikwalaho ka ku vangama ka wena lokukulu.+
Ndzi ta ku lahlela emisaveni.+
Ndzi ta endla leswaku tihosi ti ku hlalela.
18 U thyakise tindhawu ta wena to kwetsima hikwalaho ka swidyoho swa wena leswikulu ni hikwalaho ka bindzu ra wena ra vukanganyisi.
Ndzi ta endla leswaku ku va ni ndzilo exikarhi ka wena, kutani wu ta ku hisa.+
Ndzi ta ku endla u va nkuma ehenhla ka misava emahlweni ka hinkwavo lava ku languteke.
19 Hinkwavo lava a va ku tiva exikarhi ka vanhu va ta ku languta va hlamarile.+
U ta lovisiwa hi xitshuketa ni hi ndlela yo vava,
A wu nge he vi kona hilaha ku nga heriki.”’”+
20 Yehovha a tlhela a vulavula na mina a ku: 21 “N’wana wa munhu, languta eSidoni+ u profeta ku lwisana na yena. 22 U fanele u ku, ‘Yehovha Hosi Leyi Tlakukeke u ri:
“Ndzi lwa na wena Sidoni, kutani ndzi ta dzunisiwa exikarhi ka wena;
Vanhu va ta swi tiva leswaku hi mina Yehovha loko ndzi n’wi avanyisa, ndzi kwetsimisiwa eka yena.
23 Ndzi ta n’wi rhumela ntungu naswona ngati yi ta khuluka eswitarateni swakwe.
Lava dlayiweke va ta wela exikarhi ka yena loko a hlaseriwa hi banga matlhelo hinkwawo;
Va ta swi tiva leswaku hi mina Yehovha.+
24 “‘“Vanhu va le Israyele a va nge he rhendzeriwi hi mitwa leyi nga ni khombo ni leyi vavaka,+ ku nga vanhu lava va hlekulaka; vanhu va ta swi tiva leswaku hi mina Yehovha Hosi Leyi Tlakukeke.”’
25 “‘Yehovha Hosi Leyi Tlakukeke u ri: “Loko ndzi tlhela ndzi hlengeleta Vaisrayele exikarhi ka vanhu lava a va hangalasiwe eka vona,+ ndzi ta kwetsimisiwa exikarhi ka vona matiko ma langutile.+ Va ta tshama etikweni ra vona+ leri ndzi ri nyikeke nandza wa mina Yakobo.+ 26 Va ta tshama eka rona va sirhelelekile,+ va aka tiyindlu, va rima ni masimu ya madiriva,+ kutani va ta tshama va sirhelelekile loko ndzi avanyisa hinkwavo lava va hlekulaka+ lava tshamaka ekusuhi na vona; va ta swi tiva leswaku hi mina Yehovha Xikwembu xa vona.”’”