Yeremiya

44 Rito leri fikeke eka Yeremiya ri ya eka Vayuda hinkwavo lava tshamaka etikweni ra Egipta,+ lava tshamaka eMigidoli,+ eTahapenese,+ eNofu*+ ni le tikweni ra Patirosi+ ri ku: 2 “Yehovha wa mavuthu, Xikwembu xa Israyele u ri, ‘Mi ri vonile khombo leri ndzi ri tiseke eYerusalema+ ni le mitini hinkwayo ya Yuda, namuntlha i marhumbi naswona a ku tshami munhu kona.+ 3 Sweswo swi vangiwe hikwalaho ka swilo swo biha leswi va swi endleke leswaku va ndzi hlundzukisa hi ku famba va ya endla magandzelo+ va tlhela va tirhela swikwembu swin’wana leswi a va nga swi tivi, hambi ku ri n’wina kumbe vakokwa wa n’wina.+ 4 A ndzi tshamela ku rhuma malandza ya mina hinkwawo ku nga vaprofeta eka n’wina, ndzi ma rhuma hi ku phindhaphinha* ndzi ku: “Ndzi kombela mi nga wu endli nchumu lowu, lowu nyenyetsaka lowu ndzi wu vengaka.”+ 5 Kambe a va yingisanga leswaku va tshika ku endla swilo swo biha hi ku ka va nga endleli swikwembu swin’wana magandzelo.+ 6 Hiloko vukarhi bya mina ni ku hlundzuka ka mina swi chuluriwa kutani swi hisa miti ya Yuda ni switarata swa Yerusalema, swi va marhumbi hilaha swi nga hakona namuntlha.’+

7 “Yehovha, Xikwembu xa mavuthu, Xikwembu xa Israyele u ri, ‘Hikwalaho ka yini mi tivangela khombo lerikulu, lerova ku ta dlayiwa vavanuna hinkwavo, vavasati, vana ni swihlangi eYuda, ku nga sali munhu? 8 Hikwalaho ka yini mi fanele mi ndzi hlundzukisa hi mitirho ya mavoko ya n’wina hi ku endlela swikwembu swin’wana magandzelo etikweni ra Egipta laha mi yeke mi ya tshama kona? Mi ta lovisiwa mi tlhela mi rhukaniwa ni ku sandziwa exikarhi ka matiko hinkwawo ya misava.+ 9 Xana mi swi rivele swiendlo swo biha swa vakokwa wa n’wina ni swa tihosi ta Yuda+ ni swa vasati va tona,+ swin’we ni swiendlo swa n’wina swo biha ni swa vasati va n’wina,+ leswi endliweke etikweni ra Yuda ni le switarateni swa Yerusalema? 10 A va titsongahatanga ku ta fikela namuntlha, a va kombisanga ku chava+ kumbe ku yingisa milawu ya mina leyi ndzi mi nyikeke yona n’wina ni vakokwa wa n’wina.’+

11 “Hikwalaho Yehovha wa mavuthu, Xikwembu xa Israyele u ri, ‘Ndzi tiyimisele ku mi tisela khombo, ku lovisa tiko ra Yuda hinkwaro. 12 Ndzi ta teka vanhu lava saleke va le Yuda lava a va tiyimisele ku ya etikweni ra Egipta leswaku va ya tshama kona, hinkwavo va ta dlayiwa etikweni ra Egipta.+ Va ta dlayiwa hi banga ni hi ndlala; ku sukela eka lontsongo ku ya eka lonkulu, va ta dlayiwa hi banga ni hi ndlala. Vanhu va ta va rhukana, va va nyenya va tlhela va va sandza.+ 13 Ndzi ta xupula lava tshamaka etikweni ra Egipta hilaha ndzi va xupuleke hakona lava tshamaka eYerusalema, hi banga, hi ndlala ni hi ntungu.*+ 14 Vanhu va le Yuda lava saleke lava yeke va ya tshama etikweni ra Egipta a va nge baleki kumbe ku pona leswaku va tlhelela etikweni ra Yuda. Va ta swi navela ku tlhelela va ya tshama kona kambe a va nge tlheleli, handle ka vanhu va nga ri vangani lava balekeke.’”

15 Vavanuna hinkwavo lava a va swi tiva leswaku vasati va vona a va endlela swikwembu swin’wana magandzelo ni vavasati hinkwavo lava a va yime kwalaho, lava a va ri ntlawa lowukulu ni vanhu hinkwavo lava a va tshama etikweni ra Egipta,+ ePatirosi+ va hlamula Yeremiya va ku: 16 “A hi nge swi yingisi swilo leswi u hi byeleke swona hi vito ra Yehovha. 17 Kambe hi ta endla leswi hi swi vuleke, hi ta endlela Hosi ya Xisati ya Tilo* magandzelo hi tlhela hi yi chululela magandzelo ya swakunwa,+ hilaha hina, vakokwa wa hina, tihosi ta hina ni tihosana ta hina a hi endla hakona emitini ya Yuda ni le switarateni swa Yerusalema loko hi dya xinkwa hi xurha naswona swilo swi hi fambela kahle, hi nga weriwi hi khombo. 18 Ku sukela loko hi tshike ku endlela Hosi ya Xisati ya Tilo* magandzelo ni ku yi chululela magandzelo ya swakunwa, hi pfumale swilo hinkwaswo naswona hi dlayiwe hi banga ni ndlala.”

19 Vavasati va tlhele va ku: “Vanuna va hina va hi pfumelele ku endlela Hosi ya Xisati ya Tilo* magandzelo ni ku yi chululela magandzelo ya swakunwa, ni ku yi endlela makhekhe lama nga ni xivumbeko xa yona.”

20 Hiloko Yeremiya a byela vanhu hinkwavo, vavanuna ni vasati va vona ni vanhu hinkwavo lava a va vulavula na yena a ku: 21 “Magandzelo lawa n’wina, vakokwa wa n’wina, tihosi ta n’wina, tihosana ta n’wina ni vanhu va tiko a va ma endla emitini ya Yuda ni le switarateni swa Yerusalema,+ Yehovha wa ma tsundzuka a nga ma rivalanga.* 22 Eku heteleleni Yehovha a a nga ha swi koti ku yi lehisela mbilu mikhuva ya n’wina yo biha ni swilo swo nyenyetsa leswi mi swi endleke, kutani tiko ra n’wina ri hundzuke rhumbi, nchumu lowu chavisaka ni lowu rhuketeriwaka, tiko leri nga riki na vaaki hilaha ri nga hakona namuntlha.+ 23 Mi weriwe hi khombo leri, hilaha swi nga hakona namuntlha, hikwalaho ka leswi mi endleke magandzelo lawa ni hi leswi mi dyoheleke Yehovha hi ku nga yingisi rito ra Yehovha ni nawu wakwe ni switsundzuxo swa yena.”+

24 Yeremiya a ya emahlweni a byela vanhu hinkwavo ni vavasati hinkwavo a ku: “Twanani rito ra Yehovha n’wina vanhu va le Yuda hinkwenu lava nga etikweni ra Egipta. 25 Yehovha wa mavuthu, Xikwembu xa Israyele u ri, ‘Leswi n’wina ni vasati va n’wina mi swi vuleke mi swi endlile hi mavoko ya n’wina, hikuva mi te: “Hi ta endlela Hosi ya Xisati ya Tilo* magandzelo ni ku yi chululela magandzelo ya swakunwa hilaha hi hlambanyeke hakona.”+ N’wina vavasati mi ta endla leswi mi swi hlambanyeke.’

26 “Hikwalaho twanani rito ra Yehovha, n’wina vanhu va le Yuda, hinkwenu lava tshamaka etikweni ra Egipta: ‘“Ndza hlambanya hi vito ra mina lerikulu,” ku vula Yehovha, “leswaku munhu un’wana ni un’wana wa le Yuda+ a nge he vitani vito ra mina loko a hlambanya etikweni hinkwaro ra Egipta a ku, ‘Leswi Yehovha Hosi Leyi Tlakukeke a hanyaka!’+ 27 Ndzi va veke tihlo leswaku ndzi va tisela khombo ku nga ri swilo leswinene;+ vavanuna hinkwavo va le Yuda lava nga etikweni ra Egipta va ta dlayiwa hi banga ni hi ndlala, va kala va hela.+ 28 I vanhu vatsongo ntsena lava nga ta pona banga kutani va suka etikweni ra Egipta va tlhelela etikweni ra Yuda.+ Kutani vanhu hinkwavo lava saleke va le Yuda lava yeke etikweni ra Egipta va ya tshama kona va ta swi tiva leswaku ku hetiseke rito ra mani, ra mina kumbe ra vona!”’”

29 “‘Xikombiso xa n’wina hi lexi,’ ku vula Yehovha, ‘xa leswaku ndzi ta mi xupula endhawini leyi, leswaku mi ta swi tiva leswaku leswi ndzi mi tshembiseke khombo, ndzi ta ri tisa hakunene. 30 Yehovha u ri: “Ndzi nyiketa Faro Hofira, hosi ya Egipta eka valala vakwe ni le ka lava lavaka ku n’wi dlaya, hilaha ndzi nyiketeke Hosi Sedekiyasi wa le Yuda eka Hosi Nebukadnetsara* wa le Babilona, loyi a a ri nala wakwe naswona a a lava ku n’wi dlaya.”’”+