Yeremiya

52 Sedekiyasi+ a a ri ni malembe ya 21 loko a va hosi naswona u fume malembe ya 11 eYerusalema. Vito ra mana wakwe a ku ri Hamutala+ n’wana wa Yeremiya wa le Libna. 2 U ye emahlweni a endla swo biha emahlweni ka Yehovha, hi ku landza hinkwaswo leswi Yoyakimi a swi endleke.+ 3 Swilo leswi swi endleke eYerusalema ni le Yuda hikwalaho ka ku hlundzuka ka Yehovha, kukondza a va susa emahlweni ka yena.+ Hiloko Sedekiyasi a xandzukela hosi ya Babilona.+ 4 Hi lembe ra vukaye ra ku fuma ka Sedekiyasi, hi siku ra vukhume ra n’hweti ya vukhume, Hosi Nebukadnetsara* wa le Babilona u te ni masocha yakwe hinkwawo a ta hlasela Yerusalema. Va fike va dzima mixaxa kutani va sungula ku aka khumbi ri rhendzela muti hinkwawo.+ 5 Muti wu rhendzeriwe ku fikela hi lembe ra vu-11 ra ku fuma ka Hosi Sedekiyasi.

6 Hi n’hweti ya vumune hi siku ra vukaye,+ ndlala yi ve yikulu swinene emutini lerova vanhu a va nga ha ri na swakudya etikweni.+ 7 Eku heteleleni ku boxiwa khumbi ra muti, kutani masocha hinkwawo ma baleka emutini nivusiku ma huma hi gede leyi nga exikarhi ka makhumbi mambirhi ekusuhi ni ntanga wa hosi, hi nkarhi lowu Vakalidiya a va ha rhendzele muti; kutani ma famba hi ndlela leyi yaka eAraba.+ 8 Kambe masocha ya Vakalidiya ma hlongorisa Sedekiyasi,+ ma ya n’wi kuma emananga ya le Yeriko, kutani masocha yakwe ma baleka ma n’wi siya. 9 Hiloko ma khoma hosi ma yi yisa eka hosi ya le Babilona eRibla etikweni ra Hamati, kutani hosi yi yi gweva. 10 Hiloko hosi ya le Babilona yi dlaya vana va Sedekiyasi a ri karhi a swi vona, yi dlaya ni tihosana hinkwato ta Yuda eRibla. 11 Hosi ya le Babilona yi dlaya Sedekiyasi matihlo,+ endzhaku ka sweswo yi n’wi boha hi tinketana ta koporo, yi n’wi yisa eBabilona kutani yi n’wi pfalela ekhotsweni kukondza a fa.

12 Hi siku ra vukhume ra n’hweti ya vuntlhanu, ku nga lembe ra vu-19 ra ku fuma ka Hosi Nebukadnetsara* wa le Babilona, Nebuzaradani ndhuna ya varindzi, loyi a a ri nandza wa hosi ya le Babilona a ya eYerusalema.+ 13 A fika a hisa yindlu ya Yehovha,+ yindlu ya hosi ni tiyindlu hinkwato leti a ti ri eYerusalema; u tlhele a hisa yindlu yin’wana ni yin’wana leyikulu. 14 Masocha hinkwawo ya Vakalidiya lawa a ma ri ni ndhuna ya varindzi ma hirimuxe makhumbi lawa a ma rhendzele muti wa Yerusalema.+

15 Nebuzaradani ndhuna ya varindzi a teka swisiwana swin’wana ni vanhu hinkwavo lava a va sele emutini a va yisa evuhlongeni. A tlhela a teka ni vanhu hinkwavo lava tinyiketeke eka hosi ya Babilona swin’we ni vanhu hinkwavo lava tivaka ntirho wa mavoko.+ 16 Kambe Nebuzaradani ndhuna ya varindzi a siya swisiwana swin’wana etikweni leswaku swi ta rima masimu ya madiriva ni ku va mahlonga.+

17 Hiloko Vakalidiya va fayetela tiphuphu ta koporo+ ta yindlu ya Yehovha, swigolonyana+ swa koporo ni thangi* ra koporo+ leswi a swi ri endlwini ya Yehovha, kutani va rhwala koporo ya swona hinkwayo va yi yisa eBabilona.+ 18 Va tlhela va teka swo olela nkuma, mafoxolo, swo tima timboni, mikambana,+ swinwelo+ ni swibya hinkwaswo swa koporo leswi a swi tirhisiwa etempeleni. 19 Ndhuna ya varindzi yi teka swo hlambela,+ swo khoma ndzilo, mikambana, swo olela nkuma, swo tlhoma timboni,+ swinwelo ni mikambana leswi a swi endliwe hi nsuku ni silivhere ya xiyimo xa le henhla.+ 20 Loko ku ri tiphuphu timbirhi, thangi ra mati,* tinkuzi ta koporo ta 12+ leti thangi* a ri vekiwe ehenhla ka tona ni swigolonyana leswi Hosi Solomoni a a swi endlele yindlu ya Yehovha, koporo ya swona hinkwaswo a yi tele lerova a yi nga pimeki.

21 Phuphu yin’wana ni yin’wana a yi lehe timitara ta nhungu,* yi anama timitara ta ntlhanu;*+ a yi bumbule kwalomu ka nkombo wa tisentimitara* naswona a ti nga ri na nchumu endzeni. 22 Xidlodlo lexi a xi ri ehenhla ka phuphu na xona a xi endliwe hi koporo; naswona a xi lehe 2,2 wa timitara;*+ tinketana ni magrenada leswi a swi khavise xidlodlo na swona a swi endliwe hi koporo. Phuphu ya vumbirhi na yona a yi fana ni leyo sungula a yi ri ni magrenada. 23 A ku ri ni magrenada ya 96 ematlhelweni; magrenada hinkwawo a ma ri 100 naswona a ma rhendzele nete.+

24 Ndhuna ya varindzi yi tlhela yi teka Seraya+ muprista lonkulu, Sofaniya+ muprista wa vumbirhi ku katsa ni varindzi vanharhu va tinyangwa.+ 25 Yi teka ni mutirhi un’we wa le hubyeni loyi a a ri murhangeri wa masocha, vavanuna va nkombo lava a va ri vanghana va hosi lava kumiweke emutini swin’we ni matsalana wa ndhuna ya masocha loyi a hlengeletaka vanhu va tiko ni vavanuna va 60 lava kumiweke emutini. 26 Nebuzaradani ndhuna ya varindzi a va teka a va yisa eka hosi ya Babilona eRibla. 27 Hosi ya le Babilona yi va dlaya eRibla+ etikweni ra Hamati. Kavaloko Vayuda va ya evuhlongeni.+

28 Lava i vanhu lava Nebukadnetsara* a va yiseke evuhlongeni: hi lembe ra vunkombo ra ku fuma ka yena, Vayuda va 3 023.+

29 Hi lembe ra vu-18 ra ku fuma ka Nebukadnetsara,*+ ku tekiwe vanhu va 832 eYerusalema.

30 Hi lembe ra vu-23 ra ku fuma ka Nebukadnetsara,* Nebuzaradani ndhuna ya varindzi a yisa Vayuda va 745 evuhlongeni.+

Vanhu hinkwavo lava yisiweke evuhlongeni a va ri 4 600.

31 Hi lembe ra vu-37 Hosi Yoyakini+ wa le Yuda a ri evuhlongeni, hi n’hweti ya vu-12 hi siku ra vu-25 ra n’hweti, lembe leri Hosi Evhili-merodaka wa Babilona a vekiweke ku va hosi ha rona u humese* Hosi Yoyakini wa le Yuda ekhotsweni.+ 32 U n’wi kombe tintswalo kutani a n’wi tlakusa eka tihosi letin’wana leti a ti ri na yena eBabilona. 33 Kutani Yoyakini a hluvula swiambalo swakwe swa le khotsweni naswona a a hamba a dya etafuleni ra hosi kukondza a fa. 34 A a kuma swakudya leswi humaka eka hosi ya le Babilona siku ni siku, vutomi bya yena hinkwabyo kukondza a fa.