Tihosi To Sungula
17 Kutani Eliya*+ wa le Tixibe, muaki wa le Giliyadi+ a byela Akabu a ku: “Ndza hlambanya hi Yehovha Xikwembu lexi hanyaka xa Israyele loyi ndzi n’wi tirhelaka, leswaku a ku nge vi na mberha kumbe mpfula emalembeni lawa loko ndzi nga si vula nchumu!”+
2 Rito ra Yehovha ri fika eka yena, ri ku: 3 “Suka laha u ya evuxeni, u ya tumbela eNkoveni wa Kerita lowu nga evuxeni bya Yordani. 4 U fanele u nwa mati exinkobyanini lexi nga kwalaho, ndzi ta lerisa mawukuwuku* leswaku ma ku tisela swakudya.”+ 5 U nambe a famba a endla hi ku landza rito ra Yehovha; a famba a ya tshama eNkoveni wa Kerita lowu nga evuxeni bya Yordani. 6 Mawukuwuku a ma n’wi tisela xinkwa ni nyama nimixo ni xinkwa ni nyama nimadyambu naswona a a nwa mati exinkobyanini.+ 7 Kambe endzhaku ka masiku yo karhi xinkobyana xi phya,+ hikuva mpfula a yi nga ni etikweni.
8 Rito ra Yehovha ri tlhela ri fika eka Eliya ri ku: 9 “Suka u yima u ya eSarepta muti wa Vasidoni u ya tshama kona. Ndzi ta lerisa wansati la nga noni, leswaku a ku nyika swakudya.”+ 10 Hiloko a suka a ya eSarepta. Loko a fika egedeni ya muti, a ku ri ni wansati la nga noni a ri karhi a rhotela tihunyi. Kutani a n’wi vitana, a ku: “Ndzi kombela u ndzi kela matinyana ndzi ta nwa.”+ 11 Loko a ha ya ka mati, Eliya a tlhela a ku: “Ndzi kombela u ndzi tela ni xinkwa xitsongo.” 12 A hlamula a ku: “Ndza hlambanya hi Yehovha Xikwembu xa wena lexi hanyaka, a ndzi na xona xinkwa, ndzo va ni mapa lama nga tatiki ni xandla ekhuwaneni lerikulu ni mafurhanyana ekhuwaneni leritsongo.+ Sweswi ndzi rhotela tihunyinyana leswaku ndzi ta endla swo karhi swa mina ni n’wananga. Endzhaku ka loko hi dyile, hi ta fa.”
13 Kutani Eliya a ku eka yena: “U nga chavi. Famba u ya endla hilaha u vuleke hakona. Kambe rhanga hi ku ndzi endlela xinkwa xitsongo xa xirhendzevutana hi mapa lama nga sala, u ndzi tisela xona. Endzhaku ka sweswo u ta endla swa wena ni n’wana wa wena. 14 Hikuva Yehovha Xikwembu xa Israyele u te: ‘Mapa lama nga ekhuwaneni lerikulu ni mafurha lama nga ekhuwaneni leritsongo a swi nge heli ku fikela siku leri Yehovha a nga ta nisa mpfula emisaveni.’”+ 15 Hiloko a famba a ya endla hilaha Eliya a vuleke hakona, noni leyi ni vandyangu wa yona ku katsa na Eliya va tshame va ri ni swakudya masiku yo tala.+ 16 Mapa lawa a ma ri ekhuwaneni lerikulu ni mafurha lawa a ma ri ekhuwaneni leritsongo a swi helanga, hilaha Yehovha a vuleke hakona hi ku tirhisa Eliya.
17 Endzhaku ka swilo leswi, n’wana wa wansati loyi wa noni, loyi a ri n’wini wa yindlu a sungula ku vabya, vuvabyi byakwe byi ya byi nyanya lerova a fa.+ 18 Hiloko wansati a ku eka Eliya: “Xana ndzi ku dyohele yini, wena munhu wa Xikwembu xa ntiyiso? Xana u tele ku ta ndzi tsundzuxa xidyoho xa mina ni ku ndzi dlayela n’wana?”+ 19 Kambe Eliya a ku eka wansati: “Tisa n’wana wa wena eka mina.” Hiloko a teka n’wana emavokweni yakwe, a n’wi tlakula a ya na yena ekamareni ra le henhla laha a a tshama kona, a fika a n’wi lata emubedweni wakwe.+ 20 Kutani a khongela eka Yehovha, a ku: “Yehovha Xikwembu xanga,+ xana u tisela noni leyi ndzi tshamaka na yona khombo hi ku dlaya n’wana wa yona?” 21 Hiloko a angarha n’wana loyi kanharhu, a khongela eka Yehovha, a ku: “Yehovha Xikwembu xanga, ndzi kombela u endla leswaku n’wana loyi a tlhela a hanya.” 22 Yehovha a yingisa xikombelo xa Eliya,+ hiloko n’wana a tlhela a hanya.+ 23 Eliya a teka n’wana a n’wi yisa ekamareni ra le hansi, a n’wi nyika mana wakwe; hiloko Eliya a ku: “Vona, n’wana wa wena wa hanya.”+ 24 Loko wansati a vona leswi, a ku eka Eliya: “Sweswi ndza swi tiva leswaku hakunene u munhu wa Xikwembu+ ni leswaku rito ra Yehovha leri u nga ri vula i ntiyiso.”