Varhoma
15 Kambe hina lava tiyeke hi fanele ku tiyiselela ku tsana ka lava nga tiyangiki,+ hi nga endli swilo leswi tsakisaka hina.+ 2 Un’wana ni un’wana wa hina a a endlele van’wana leswinene leswaku a va aka.+ 3 Hikuva hambi a ri Kreste a nga titsakisanga+ kambe hilaha swi tsariweke hakona: “Mindzhukano ya lava ku rhukanaka yi wele ehenhla ka mina.”+ 4 Hikuva swilo hinkwaswo leswi tsariweke enkarhini lowu hundzeke swi tsaleriwe ku letela hina,+ leswaku hi ta va ni ntshembo+ hikwalaho ka ku tiyisela+ ka hina ni hikwalaho ka nchavelelo lowu humaka eMatsalweni. 5 Onge Xikwembu lexi mi pfunaka ku tiyisela ni lexi chavelelaka xi nga mi nyika mianakanyo leyi fanaka ni leyi Kreste Yesu a a ri na yona, 6 leswaku hi rito rin’we mi ta dzunisa Xikwembu tlhelo Tata wa Hosi ya hina Yesu Kreste hi vun’we.+
7 Kutani amukelanani+ tanihi leswi Kreste na yena a mi amukeleke+ hi xikongomelo xo vangamisa Xikwembu. 8 Hikuva ndza mi byela leswaku Kreste u ve nandza wa lava yimbeke+ ku komba leswaku Xikwembu a xi tiyisile ni ku tiyisekisa switshembiso leswi xi swi endleke eka vakokwa wa vona,+ 9 ni leswaku matiko ma ta dzunisa Xikwembu hikwalaho ka tintswalo ta xona.+ Hilaha swi tsariweke hakona: “Hi yona mhaka leyi ndzi nga ta ku dzunisa exikarhi ka matiko naswona ndzi ta yimbelelela vito ra wena tinsimu to dzunisa.”+ 10 Nakambe xi ri: “Tsakani n’wina matiko, swin’we ni vanhu va xona.”+ 11 Tsalwa rin’wana ri ri: “Dzunisani Yehovha* n’wina matiko, vanhu hinkwavo a va n’wi dzunise.”+ 12 Nakambe Esaya u ri: “Ku ta va ni loyi a nga rimitsu ra Yese+ loyi a nga ta humelela leswaku a fuma matiko+ naswona matiko ma ta n’wi tshemba.”+ 13 Onge Xikwembu lexi nyikaka ntshembo xi nga mi nyika ntsako lowukulu ni ku rhula loko mi xi tshemba, leswaku mi ta va ni ntshembo lowukulu hi matimba ya moya lowo kwetsima.+
14 Vamakwerhu, ndza tiyiseka leswaku mi tele vunene ni vutivi naswona ma swi kota ku tsundzuxana.* 15 Hambiswiritano, ndzi mi tsalela hi ku kongoma mayelana ni timhaka to karhi, leswaku ndzi mi tsundzuxa tona, hikwalaho ka musa lowukulu lowu ndzi nyikiweke wona hi Xikwembu 16 leswaku ndzi va nandza wa Kreste Yesu eka lava nga riki Vayuda.+ Ndzi endla ntirho wo kwetsima wo chumayela mahungu lamanene ya Xikwembu,+ leswaku vanhu lava vamatiko va va gandzelo leri amukelekaka, leri kwetsimisiweke hi moya lowo kwetsima.
17 Ndza tsaka hileswi ndzi nga mudyondzisiwa wa Kreste Yesu nileswi ndzi endlaka ntirho wa Xikwembu. 18 Hikuva a ndzi nge he vulavuli hi swilo swin’wana handle ka leswi Kreste a swi endleke hi ku tirhisa mina leswaku matiko ma ta yingisa, hi rito ni hi swiendlo swa mina, 19 hi matimba ya masingita ni swihlamariso,+ hi matimba ya moya wa Xikwembu, ndzi chumayele mahungu lamanene hi Kreste+ hi vukheta ku sukela eYerusalema ku ya fika emugangeni wa Iliriya. 20 Kutani hi ndlela leyi, ndzi swi endle xikongomelo xa mina ku va ndzi nga chumayeli mahungu lamanene laha se va tweke hi ta Kreste, leswaku ndzi nga aki ehenhla ka masungulo ya munhu un’wana; 21 kambe hilaha ku tsariweke hakona: “Lava nga byeriwangiki nchumu ha yena va ta n’wi vona; ni lava nga twangiki nchumu ha yena va ta swi twisisa.”+
22 Leswi hi swona swi nga endla leswaku mikarhi yo tala ndzi siveriwa ku fika eka n’wina. 23 Kambe sweswi a ya ha ri kona ndhawu leyi ndzi nga chumayelangiki eka yona eswifundzheni leswi naswona se ku hele malembe yo tala* ndzi ri karhi ndzi navela ku ta eka n’wina. 24 Hikwalaho, loko ndzi ta eSpaniya, ndza tshemba leswaku ndzi ta mi vona naswona mi ta ndzi heleketa endzhaku ka loko hi tiphine swin’we swa xinkarhana. 25 Kambe sweswi ndzi lava ku ya eYerusalema ndzi ya pfuna vakwetsimi.+ 26 Hikuva lava nga eMakedoniya ni le Akaya va tsakela ku va nyika tinyiko vakwetsimi lava nga swisiwana, lava nga eYerusalema.+ 27 Swi va tsakisile ku endla tano kambe entiyisweni a va va kolota; hikuva vakwetsimi va le Yerusalema va va byele swilo leswi humaka eka Xikwembu. Kutani vona va kolota vakwetsimi va le Yerusalema ku va pambulela rifuwo ra vona.+ 28 Kutani loko ndzi hetile hi leswi naswona ndzi fikise munyikelo* lowu wu hlayisekile eka vona, ndzi ta hundza hi le ka n’wina loko ndzi ya eSpaniya. 29 Ku tlula kwalaho, ndza swi tiva leswaku loko ndzi ta eka n’wina ndzi ta ta ni mikateko yo tala leyi humaka eka Kreste.
30 Kutani ndza mi kombela vamakwerhu hi Hosi ya hina Yesu Kreste ni hi rirhandzu leri vaka kona hikwalaho ka moya leswaku mi ndzi khongelela eka Xikwembu hi mbilu hinkwayo hilaha ndzi endlaka hakona,+ 31 leswaku ndzi ta ponisiwa+ eka lava nga riki vapfumeri eYudiya, ni leswaku ntirho lowu ndzi wu endlelaka vakwetsimi eYerusalema wu ta amukeleka eka vona,+ 32 leswaku loko Xikwembu xi swi rhandza ndzi ta ta eka n’wina ndzi tsakile hi ta phyuphya swin’we. 33 Onge Xikwembu lexi nyikaka ku rhula xi nga va na n’wina hinkwenu.+ Amen.