Ezekiyele
9 Hiloko a huwelela etindleveni ta mina hi rito lerikulu, a ku: “Vitana lava nga ta xupula muti, un’wana ni un’wana a khome nchumu wo dlaya ha wona evokweni rakwe!”
2 Ndzi vona vavanuna va tsevu lava a va huma etlhelweni ra gede ya le henhla+ leyi languteke en’walungwini, un’wana ni un’wana a a khome nchumu wo pfotlosa ha wona; naswona a ku ri ni wanuna un’wana exikarhi ka vona loyi a ambaleke xiambalo xa lapi, a ri ni rimhondzo* ra matsalana ro chela inki emasengeni yakwe, hiloko va nghena va fika va yima etlhelo ka altari ya koporo.+
3 Kutani ku vangama ka Xikwembu xa Israyele+ ku suka ehenhla ka makerubu ku ya enyangweni ya yindlu,+ kutani Xikwembu xi sungula ku huwelela wanuna loyi a a ambaleke xiambalo xa lapi, loyi a nga ni rimhondzo ra matsalana ro chela inki emasengeni yakwe. 4 Yehovha a ku eka yena: “Yana emutini, u tsemakanya eYerusalema, u fungha mimombo ya vanhu lava nga ni nhlomulo ni lava konyaka+ hikwalaho ka swilo hinkwaswo leswi nyenyetsaka leswi endliwaka emutini.”+
5 Kutani a byela lavan’wana ndzi ri karhi ndzi swi twa a ku: “N’wi landzeleni mi ya emutini mi fika mi dlaya. Mi nga va tweli vusiwana naswona mi nga va tsetseleli.+ 6 Mi fanele mi dlaya vakhalabye, majaha, vanhwana, vana lavatsongo ni vavasati.+ Kambe munhu un’wana ni un’wana loyi a nga ni mfungho mi nga n’wi dlayi.+ Mi fanele mi sungula hi le ndhawini ya mina yo kwetsima.”+ Hiloko va sungula hi vakulukumba lava a va ri emahlweni ka yindlu.+ 7 Kutani a ku eka vona: “Thyakisani yindlu mi tata swivava* hi vanhu lava dlayiweke.+ Fambani!” Hiloko va famba va ya dlayetela vanhu emutini.
8 Loko va ri karhi va va dlayetela, ndzi sale ndzi ri ndzexe kutani ndzi wa xikandza xa mina xi languta ehansi, ndzi huwelela ndzi ku: “Yehovha Hosi Leyi Tlakukeke! Xana u ta dlaya Vaisrayele hinkwavo lava saleke u ri karhi u chulula vukarhi bya wena ehenhla ka Yerusalema?”+
9 Hiloko a ku eka mina: “Xihoxo xa vanhu va Israyele ni va Yuda i xikulu ngopfu.+ Tiko ri tele hi ku halata ngati+ naswona muti wu tele hi vukanganyisi.+ Hikuva va ri, ‘Yehovha u ri siyile tiko leri naswona Yehovha a nga voni nchumu.’+ 10 Kambe a ndzi nge va tweli vusiwana naswona a ndzi nge va tsetseleli.+ Ndzi ta va khoma hi ku ya hi leswi va swi endleke.”
11 Hiloko ndzi vona wanuna loyi a ambaleke xiambalo xa lapi, loyi a nga ni rimhondzo ro chela inki emasengeni yakwe, a fika a ku: “Ndzi endle hilaha u ndzi leriseke hakona.”