Yuwele
1 Rito ra Yehovha leri nga fika eka Yuwele* n’wana wa Petuwele ri te:
2 “Yingisani, n’wina vakulukumba,
Rhiyani ndleve n’wina hinkwenu vaakatiko.
Xana ku tshame ku endleka nchumu wo fana ni lowu emikarhini ya n’wina
Kumbe emikarhini ya vakokwa wa n’wina?+
3 Swi byeleni vana va n’wina,
Kutani vana va n’wina va ta swi byela vana va vona,
Kasi vana va vona va ta swi byela xitukulwana lexi landzelaka.
4 Leswi siyiweke hi tinjiya leti onhaka, swi dyiwe hi tinjiya leti hahaka;+
Leswi siyiweke hi tinjiya leti hahaka swi dyiwe hi tinjiya leti nga riki na timpapa;
Leswi siyiweke hi tinjiya leti nga riki na timpapa swi dyiwe hi tinjiya ta makolo.+
5 Pfukani mi rila n’wina swidakwa!+
Kololani n’wina hinkwenu lava va nwaka vhinyo,
Hikuva mi tekeriwe vhinyo yo tsokombela emilon’wini ya n’wina.+
6 Hikuva ku ni vuthu leri nga ta etikweni ra mina, i vuthu ra ntsandzavahlayi leri nga ni matimba.+
Ri ni tinhlaya ni meno yo fana ni ya nghala.+
7 Ri onhe nsimu ya mina ya madiriva, nkuwa wa mina wu lo sala hi xikundzu* ntsena,
Ri kwamule mahanti ri ma lahlela ekule,
A ku salanga nchumu ni le marhavini ya wona lamatsongo.
8 Kalakalani hilaha nhwana loyi a ambaleke xiambalo* xo khwaxa a kalakalaka hakona
Loko a rilela jaha* ra yena.
9 Gandzelo ra mavele+ ni gandzelo ra swakunwa+ a swa ha ri kona endlwini ya Yehovha;
Vaprista lava tirhelaka Yehovha, va le ku rileni.
10 Nsimu yi onhiwile, misava ya rila;+
Hikuva mavele ma herile, vhinyo leyintshwa yi herile, mafurha na wona ma herile.+
11 Varimi va tshoveke timbilu, varimi va madiriva va kolola,
Hikwalaho ka koroni ni maxalana;
Hikuva a ku na ntshovelo.
12 Murhi wa madiriva wu omile,
Nkuwa wu vunile.
Murhi wa mugrenada ni wa ncindzu ni muapula,
Mirhi hinkwayo leyi nga emasin’wini yi omile;+
Vanhu va helele hi ntsako.
Nghenani mi etlela mi ambale swiambalo swo khwaxa, n’wina lava tirhelaka Xikwembu xanga;
Hikuva gandzelo ra mavele+ ni gandzelo ra swakunwa+ a swa ha yisiwi endlwini ya Xikwembu xa n’wina.
14 Lunghekelani nkarhi wa ku titsona swakudya; vitanani vanhu va ta enhlengeletanweni yo hlawuleka.+
Vitanani vakulukumba ni vaaki hinkwavo va tiko,
Leswaku va ta endlwini ya Yehovha Xikwembu xa n’wina,+ mi ta kombela mpfuno eka Yehovha.
15 Khombo esikwini rero!
Hikuva siku ra Yehovha ri le kusuhi,+
Hi siku rero lowa Matimba Hinkwawo u ta lovisa!
16 Xana swakudya a swi tekiwanga hi swi langutile,
Ni ntsako a wu herisiwanga endlwini ya Xikwembu xa hina?
17 Timbewu* ti vunile ehansi ka tifoxolo ta vona.
Switlati a swi na nchumu.
Madulu ma hirimuxiwile hikuva a ku tshoveriwanga nchumu.
18 Hambi ku ri swifuwo swa konya!
Mitlhambi ya tihomu ya tsendzeleka yi pfilunganyekile, hikuva a yi na madyelo!
Naswona mitlhambi ya tinyimpfu ya xaniseka hikwalaho ka nandzu wa vona.
19 Ndzi ta ku vitana, wena Yehovha;+
Hikuva ndzilo wu lovise madyelo ya le mananga,
Malangavi ma hise mirhi hinkwayo ya nhova.
20 Hambi swiharhi swa nhova swi rilela eka wena,
Hikuva swinambyana swi phyile,
Ndzilo wu lovise madyelo ya le mananga.”