Yeremiya

7 Yehovha a vulavula na Yeremiya a ku: 2 “Yima egedeni ya yindlu ya Yehovha u huwelela rungula leri, u ku, ‘Yingisani rito ra Yehovha n’wina vanhu hinkwavo va Yuda, lava nghenaka hi tigede leti mi ya khinsamela Yehovha. 3 Yehovha wa mavuthu, Xikwembu xa Israyele, u ri: “Cincani tindlela ta n’wina ni swiendlo swa n’wina, kutani ndzi ta mi pfumelela leswaku mi ya emahlweni mi tshama endhawini leyi.+ 4 Mi nga tshembi marito ya vukanganyisi kutani mi ku, ‘Leyi i* tempele ya Yehovha, i tempele ya Yehovha, i tempele ya Yehovha!’+ 5 Hikuva loko hakunene mo cinca tindlela ta n’wina ni swiendlo swa n’wina; loko hakunene mo avanyisa hi ndlela yo lulama exikarhi ka munhu ni munhukulobye;+ 6 loko mo ka mi nga tshikileli vanhu lava humaka ematikweni man’wana, vana lava nga riki na vatswari* ni tinoni;+ loko mi nga halati ngati leyi nga riki na nandzu endhawini leyi; niloko mi nga gandzeli swikwembu swin’wana leswaku mi nga weriwi hi khombo;+ 7 kutani ndzi ta mi pfumelela leswaku mi ya emahlweni mi tshama endhawini leyi, etikweni leri ndzi ri nyikeke vakokwa wa n’wina hilaha ku nga heriki.”’”

8 “Kambe mi tshemba marito ya vukanganyisi,+ a ma nge mi pfuni nchumu nikatsongo. 9 Xana mi nga yiva,+ mi dlaya, mi endla vuoswi, mi hlambanya hi vunwa,+ mi endlela Bali magandzelo+ ni ku gandzela swikwembu leswi mi nga swi tivangiki, 10 kutani mi fika mi yima emahlweni ka mina endlwini leyi, leyi vitaniwaka hi vito ra mina mi ku, ‘Hi ta ponisiwa,’ hambileswi mi endlaka swilo leswi hinkwaswo swo nyenyetsa? 11 Xana yindlu leyi, leyi vitaniwaka hi vito ra mina mi yi hundzule bako ra swigevenga?+ Ndzi swi vonile leswi mi swi endlaka,” ku vula Yehovha.

12 “‘Hambiswiritano, sweswi fambani mi ya endhawini ya mina eXilo,+ laha ndzi nga rhanga ndzi endla leswaku vito ra mina ri dzunisiwa kona,+ mi vona leswi ndzi yi endleke swona hikwalaho ka vubihi bya Vaisrayele lava nga vanhu va mina.+ 13 Kambe mi ye emahlweni mi endla swilo leswi hinkwaswo,’ ku vula Yehovha, ‘hambileswi ndzi vulavuleke na n’wina hi ku phindhaphindha,* a mi yingisanga.+ Ndzi ye emahlweni ndzi mi vitana kambe a mi hlamulanga.+ 14 Kutani leswi ndzi swi endleke eXilo+ ndzi ta swi endla eka yindlu leyi vitaniwaka hi vito ra mina,+ leyi mi tshembelaka eka yona+ ni le ndhawini leyi, leyi ndzi yi nyikeke n’wina ni vakokwa wa n’wina. 15 Ndzi ta mi cukumeta mi suka emahlweni ka mina, hilaha ndzi va cukumeteke hakona vamakwenu hinkwavo, vatukulu hinkwavo va Efrayimi.’+

16 “Loko ku ri wena, u nga va khongeleli vanhu lava. U nga huweleli kumbe u khongela kumbe u va kombelela eka mina,+ hikuva a ndzi nge ku yingisi.+ 17 Xana a wu swi voni leswi va swi endlaka emitini ya Yuda ni le switarateni swa Yerusalema? 18 Vana va majaha va rhotela tihunyi, vatatana va tshivela ndzilo, vavasati va pfuva mbila yo endla makhekhe ya magandzelo ya Hosi ya Xisati ya Tilo,*+ naswona va chululela swikwembu swin’wana magandzelo ya swakunwa leswaku va ndzi hlundzukisa.+ 19 ‘Xana va twisa mina ku vava?’* ku vula Yehovha. ‘Xana a va titwisi ku vava vona vini kutani va khomiwa hi tingana?’+ 20 Hikwalaho Yehovha Hosi Leyi Tlakukeke u ri, ‘Waswivo! Ku hlundzuka ka mina ni vukarhi bya mina swi ta chululeriwa endhawini leyi,+ ehenhla ka munhu ni le henhla ka xiharhi, ehenhla ka mirhi ya tiko ni le henhla ka mihandzu; byi ta pfurha naswona a byi nge timiwi.’+

21 “Yehovha wa mavuthu, Xikwembu xa Israyele u ri, ‘Yanani emahlweni, engetelani magandzelo ya n’wina yo hisiwa eka magandzelo ya n’wina laman’wana kutani mi ma dya.+ 22 Hikuva hi siku leri ndzi humeseke vakokwa wa n’wina etikweni ra Egipta, a ndzi vulavulanga na vona kumbe ndzi va lerisa ku endla magandzelo yo hisiwa ni magandzelo man’wana.+ 23 Kambe ndzi va nyike xileriso lexi nge: “Yingisani rito ra mina kutani ndzi ta va Xikwembu xa n’wina naswona n’wina mi ta va vanhu va mina.+ Mi fanele mi famba endleleni leyi ndzi mi lerisaka yona, leswaku swilo swi ta mi fambela kahle.”’+ 24 Kambe a va yingisanga kumbe ku rhiya ndleve;+ ku ri na sweswo va landzele makungu* ya vona, va tiomisa tinhloko va landzela mbilu ya vona yo biha+ naswona va ye endzhaku, a va yanga mahlweni, 25 ku sukela esikwini leri vakokwa wa n’wina va humeke ha rona etikweni ra Egipta ku ta fikela namuntlha.+ Hikwalaho a ndzi tshamela ku rhumela malandza ya mina hinkwawo ku nga vaprofeta, ndzi va rhuma siku ni siku, hi ku phindhaphindha.*+ 26 Kambe va ale ku ndzi yingisa naswona a va yi rhiyanga ndleve.+ Ku ri na sweswo, va tiomise tinhloko* naswona va endle swilo swo biha ku tlula vakokwa wa vona!

27 “U ta va byela marito lawa hinkwawo,+ kambe a va nge ku yingisi; u ta va vitana kambe a va nge ku hlamuli. 28 Kutani u ta va byela u ku, ‘Leri i tiko leri nga ri yingisangiki rito ra Yehovha Xikwembu xa rona naswona ri ale ku yingisa ndzayo. Ku tshembeka a ku kona naswona a va vulavuli hi kona.’+

29 “Tsemeta misisi ya wena yo leha u yi cukumeta, u suma risimu ra xirilo ehenhla ka swintshabyana hikuva Yehovha u fularhele xitukulwana lexi, lexi n’wi hlundzukiseke naswona u xi tshikile. 30 ‘Hikuva vanhu va le Yuda va ndzi dyoherile,’ ku vula Yehovha. ‘Va veke swifaniso swa vona swo nyenyetsa leswi va swi gandzelaka endlwini leyi vitaniwaka hi vito ra mina leswaku va yi thyakisa.+ 31 Va ake tindhawu leti tlakukeke ta Tofete, leyi nga eNkoveni wa N’wana wa Hinomu,*+ leswaku va hisa vana va vona va majaha ni va vanhwanyana hi ndzilo,+ ku nga nchumu lowu ndzi nga va lerisangiki wona, lowu ni le mbilwini ya mina wu nga si tshamaka wu ta.’*+

32 “‘Hikwalaho waswivo, masiku ma ta,’ ku vula Yehovha, ‘lawa ndhawu leyi yi nga ta ka yi nga ha vitaniwi Tofete kumbe Nkova wa N’wana wa Hinomu* kambe yi ta vitaniwa Nkova wa ku Dlaya. Va ta lahla vanhu eTofete kukondza ku nga ha vi na ndhawu yo lahla.+ 33 Kutani mitsumbu ya vanhu lava yi ta va swakudya swa swinyenyana ni swiharhi naswona a ku na munhu loyi a nga ta swi hlongola.+ 34 Ndzi ta herisa mpfumawulo wa ku khana ni wa ku tsaka, rito ra muteki ni ra mutekiwa+ emitini ya Yuda ni le switarateni swa Yerusalema, hikuva tiko leri ri ta va rhumbi.’”+