Tikronika Ta Vumbirhi

30 Hiloko Hezekiya a rhumela rito etikweni hinkwaro ra Israyele+ ni le Yuda, a tlhela a tsalela Efrayimi na Manase+ mapapila, leswaku va ta endlwini ya Yehovha eYerusalema va ta endlela Yehovha Xikwembu xa Israyele Paseka.+ 2 Hambiswiritano, hosi, tihosana ta yona ni vanhu hinkwavo va le Yerusalema va teka xiboho xo tlangela Paseka hi n’hweti ya vumbirhi,+ 3 hikuva a va swi kotanga ku yi tlangela hi nkarhi lowu a yi endliwa ha wona,+ hileswi a ku nga ri na vaprista vo tala lava tibasiseke+ naswona a ku nga ri na vanhu vo tala lava hlengeletiweke eYerusalema. 4 Hosi ni vanhu hinkwavo va pfumelelane ni mhaka leyi. 5 Hiloko va teka xiboho xo tivisa mhaka leyi etikweni hinkwaro ra Israyele, ku sukela eBera-xeba ku ya eDani,+ leswaku vanhu va fanele va ta va ta endlela Yehovha Xikwembu xa Israyele Paseka eYerusalema, hikuva a va nga si yi tlangela va hlanganile hilaha swi tsariweke hakona.+

6 Hiloko lava fambisaka mapapila lama humaka eka hosi ni tihosana ta yona, va ya etikweni hinkwaro ra Israyele ni le Yuda hilaha hosi yi leriseke hakona va ku: “N’wina Vaisrayele, tlhelelani eka Yehovha Xikwembu xa Abrahama, Isaka na Israyele, leswaku na yena a ta tlhelela eka lava nga sala lava balekeke ehansi ka vulawuri bya tihosi ta Asiriya.+ 7 Mi nga fani ni vakokwa wa n’wina ni vamakwenu lava nga tshembekangiki eka Yehovha Xikwembu xa vakokwa wa vona, lerova a va endla nchumu wo chavisa hilaha mi swi vonaka hakona.+ 8 Sweswi mi nga sihalali hilaha vakokwa wa n’wina va endleke hakona.+ Yingisani Yehovha mi ta endlwini yakwe+ leyi a yi endleke yi kwetsima hilaha ku nga heriki mi tirhela Yehovha Xikwembu xa n’wina leswaku vukarhi bya yena byi ta suka eka n’wina.+ 9 Hikuva loko mo tlhelela eka Yehovha, vamakwenu ni vana va n’wina va ta kombiwa tintswalo hi lava va va endleke mahlonga+ naswona va ta va pfumelela ku tlhelela etikweni leri,+ hikuva Yehovha Xikwembu xa n’wina u ni ntwelavusiwana ni musa,+ a nge mi fularheli loko mi tlhelela eka yena.”+

10 Lava fambisaka mapapila va ya emitini hinkwayo etikweni hinkwaro ra Efrayimi ni ra Manase+ ni le Zebuloni, kambe vanhu a va va hleka ni ku va hlekula.+ 11 Hambiswiritano, vanhu van’wana va le Axere, Manase na le Zebuloni va titsongahatile kutani va ta eYerusalema.+ 12 Xikwembu xa ntiyiso xi pfune Vayuda leswaku va va ni vun’we, va endla leswi hosi ni tihosana ta yona ti va leriseke swona leswi khumbaka ku gandzela Yehovha.

13 Vanhu vo tala va hlengeletane eYerusalema leswaku va endla Nkhuvo Wa Swinkwa Leswi Nga Riki Na Comela+ hi n’hweti ya vumbirhi;+ naswona a va tele swinene. 14 Hiloko va suka va yima va susa tialtari leti a ti ri eYerusalema,+ va susa ni tialtari+ hinkwato to hisela mirhi yo nun’hwela va ti lahlela eNkoveni wa Kedroni. 15 Kutani va tlhava swifuwo swo endla magandzelo ya Paseka hi siku ra vu-14 ra n’hweti ya vumbirhi. Vaprista ni Valevhi va khomiwa hi tingana kutani va tibasisa, va tlhela va tisa magandzelo yo hisiwa endlwini ya Yehovha. 16 Va yima etindhawini leti va averiweke eka tona hi ku ya hi Nawu wa Muxe nandza wa Xikwembu xa ntiyiso; kutani vaprista va n’wan’wasela ngati+ leyi va yi nyiketiweke hi Valevhi. 17 A ku ri ni vanhu vo tala lava a va nga tibasisanga, kutani Valevhi a va langutela ku dlayiwa ka swifuwo swo endla magandzelo ya Paseka swa lava a va nga basanga,+ leswaku va ta basisiwa emahlweni ka Yehovha. 18 Hikuva vanhu vo tala, ngopfungopfu lava humaka eka Efrayimi, Manase,+ Isakara na Zebuloni a va nga tibasisanga, kambe va yi dyile Paseka, ku hambana ni leswi tsariweke. Kambe Hezekiya a va khongela, a ku: “Onge Yehovha wo lulama,+ a nga pfumelela 19 un’wana ni un’wana loyi a tiyimiseleke hi mbilu yakwe hinkwayo ku tirhela wena Yehovha Xikwembu xa ntiyiso,+ Xikwembu xa vakokwa wakwe, hambileswi a nga tibasisangiki hi ku ya hi nawu wa nkhuvo lowu wo kwetsima.”+ 20 Hiloko Yehovha a yingisa Hezekiya kutani a rivalela vanhu.

21 Kutani Vaisrayele lava a va ri eYerusalema va tlangele Nkhuvo Wa Swinkwa Leswi Nga Riki Na Comela+ ku ringana masiku ya nkombo va tsakile swinene+ naswona Valevhi ni vaprista a va dzunisa Yehovha siku ni siku va ri karhi va tlangela Yehovha swichayachayana swa vona.+ 22 Ku engetela kwalaho, Hezekiya a vulavula ni Valevhi hinkwavo lava a va tirhela Yehovha hi vuxiyaxiya a tlhela a va khutaza. Kutani va dya swakudya enkhubyeni wolowo ku ringana masiku ya nkombo,+ va endla magandzelo yo kombela ku rhula+ ni ku tlhela va khensa Yehovha Xikwembu xa vakokwa wa vona.

23 Hiloko vanhu hinkwavo va teka xiboho xo tlhela va tlangela nkhuvo lowu masiku man’wana ya nkombo, kutani va wu tlangela masiku man’wana ya nkombo va tsakile.+ 24 Hosi Hezekiya wa Yuda a nyikela eka vanhu hi tinkuzi ta 1 000 ni tinyimpfu ta 7 000 kasi tihosana ti nyikela hi tinkuzi ta 1 000 ni tinyimpfu+ ta 10 000; vaprista vo tala a va ri karhi va tibasisa.+ 25 Vanhu hinkwavo va Yuda, vaprista, Valevhi ni vanhu hinkwavo lava humaka eIsrayele+ ni valuveri+ lava humaka etikweni ra Israyele ni lava tshamaka eYuda va ya emahlweni va tsakile. 26 Hiloko vanhu va tsaka swinene eYerusalema, hikuva ku sukela enkarhini wa Solomoni n’wana wa Davhida hosi ya Israyele, a ku nga si tshama ku endleka nchumu wo fana ni lowu eYerusalema.+ 27 Eku heteleleni vaprista lava nga Valevhi, va suka va yima va katekisa vanhu;+ naswona Xikwembu xi yingisa marito ya vona ni xikhongelo xa vona xi ri ematilweni endhawini ya xona yo kwetsima.