Yohane

9 Kuteloko a hundza, a vona munhu loyi a nga velekiwa a fe matihlo. 2 Kutani vadyondzisiwa vakwe va n’wi vutisa, va ku: “Rabi,*+ leswi munhu loyi a nga velekiwa a fe matihlo, xana i mani loyi a dyoheke, hi yena kumbe i vatswari vakwe?” 3 Yesu a va hlamula a ku: “A nga dyohanga ni vatswari vakwe a va dyohanga, kambe swi endlekile leswaku mitirho ya Xikwembu yi ta vonaka hikwalaho ka yena.+ 4 Hi fanele ku endla mitirho ya Loyi a ndzi rhumeke ka ha vona;+ vusiku bya ta, laha swi nga ta ka swi nga koteki leswaku ku tirhiwa. 5 Hi mina ku vonakala ka misava, ntsena loko ndza ha ri laha misaveni.”+ 6 Loko a heta ku vula sweswo, a tshwutela ehansi a pfuva misava hi marhi, a tota munhu yoloye ematihlweni,+ 7 kutani a ku: “Famba u ya hlamba edan’wini leri vuriwaka Silowama” (leswi loko swi hundzuluxeriwa swi vulaka “Ku Halaka”). Hiloko a ya hlamba, a vuya se a vona.+

8 Kutani vaakelani ni lava a va tolovele ku n’wi vona a ri ku kombeleni va ku: “Xana loyi a hi yena wanuna loyi a hamba a kombela?” 9 Van’wana va ku: “Hi yena.” Van’wanyana va ku: “A hi yena, u fana na yena.” Kambe yena a va byela a ku: “Hi mina.” 10 Va n’wi vutisa va ku: “Xana matihlo ya wena ma pfuleke njhani?” 11 A va hlamula a ku: “Wanuna loyi va nge i Yesu u pfuve misava ni marhi a ndzi tota matihlo kutani a ku, ‘Famba eSilowama u ya hlamba.’+ Hiloko ndzi famba ndzi ya hlamba kutani ndzi sungula ku vona.” 12 Kutani va ku: “Xana u kwihi wanuna wa kona?” A va hlamula a ku: “A ndzi swi tivi.”

13 Hiloko va teka wanuna loyi a pfuriweke matihlo va n’wi yisa eka Vafarisi. 14 Ku kumeke leswaku siku leri Yesu a pfuveke marha ni misava+ a pfula mahlo ya wanuna loyi a ku ri Savata.+ 15 Hiloko Vafarisi na vona va sungula ku n’wi vutisa leswaku, swi tise ku yini leswaku a kota ku vona. Wanuna loyi a ku: “U tote matihlo ya mina hi misava leyi pfanganeke ni marha, kutani ndzi ya hlamba hiloko ndzi sungula ku vona.” 16 Vafarisi van’wana, va ku: “Munhu loyi a nga humi eka Xikwembu, hikuva a nga yi xiximi Savata.”+ Van’wana va ku: “Xana munhu loyi a nga mudyohi a nga swi kotisa ku yini ku endla masingita yo tano?”+ Hiloko va sungula ku kanetana.+ 17 Kutani va tlhela va vutisa wanuna loyi va ku: “Xana wena u ri yini ha yena hileswi a ku pfuleke matihlo?” Wanuna loyi a ku: “I muprofeta.”

18 Hambiswiritano, Vayuda a va nga tshembi leswaku u velekiwe a fe matihlo kambe se wa vona, ku fikela loko va vitana vatswari vakwe. 19 Kutani va vutisa vatswari vakwe va ku: “Xana loyi i n’wana wa n’wina loyi mi nge u velekiwe a fe matihlo? Swi te njhani leswaku sweswi a vona?” 20 Vatswari vakwe va hlamula va ku: “Ha swi tiva leswaku loyi i n’wana wa hina ni leswaku u velekiwe a fe matihlo. 21 Kambe a hi swi tivi leswaku swi endlekise ku yini leswaku sweswi a vona; naswona a hi swi tivi leswaku i mani loyi a pfuleke matihlo yakwe. N’wi vutiseni. Se u kurile, a a tivulavulele.” 22 Vatswari vakwe va vule sweswo hi ku chava Vayuda,+ hikuva Vayuda a va twanane leswaku loyi a nga ta pfumela leswaku Yesu i Kreste, u fanele ku hlongoriwa esinagogeni.+ 23 Hi yona mhaka leyi vatswari vakwe va nga te: “U kurile. Vutisani yena.”

24 Hiloko va tlhela va vitana wanuna loyi va ku: “Dzunisa Xikwembu; ha swi tiva leswaku wanuna loyi i mudyohi.” 25 Kutani a va hlamula a ku: “Leswaku i mudyohi a ndzi swi tivi. Lexi ndzi xi tivaka hileswaku, a ndzi nga voni kambe sweswi se ndza vona.” 26 Hiloko va ku: “U ku hanyise njhani? U endle yini leswaku matihlo ya wena ma pfuleka?” 27 A va hlamula a ku: “Ndzi mi byerile, kambe a mi ndzi yingisanga. Hikwalaho ka yini mi lava ndzi tlhela ndzi phindha leswi ndzi swi vuleke? Xana na n’wina mi lava ku va vadyondzisiwa vakwe?” 28 Hiloko va n’wi monya va ku: “Wena u mudyondzisiwa wa wanuna loyi, kambe hina hi vadyondzisiwa va Muxe. 29 Ha swi tiva leswaku Xikwembu xi vulavule na Muxe, kambe wanuna loyi a hi ku tivi laha a humaka kona.” 30 Wanuna loyi a va hlamula a ku: “Mhaka leyi ya hlamarisa hakunene, wanuna loyi u pfule matihlo ya mina kambe mi ri a mi ku tivi laha a humaka kona. 31 Ha swi tiva leswaku Xikwembu a xi va yingisi vadyohi,+ kambe loyi a chavaka Xikwembu a tlhela a endla ku rhandza ka xona, xa n’wi yingisa.+ 32 A swi si tshama swi endleka leswaku munhu a pfula matihlo ya loyi a velekiweke a fe matihlo. 33 Loko wanuna loyi a a nga humi eka Xikwembu, a a nga ta swi kota ku endla leswi a swi endleke.”+ 34 Hiloko va ku: “U velekiwe u ri ni xidyoho, kambe u ringeta ku dyondzisa hina?” Kutani va n’wi hlongola!+

35 Yesu a swi twa leswaku va n’wi hlongorile, kutani loko a hlangana na yena, a ku: “Xana wa pfumela eka N’wana wa munhu?” 36 Wanuna loyi a hlamula a ku: “Nkulukumba, i mani N’wana wa munhu, leswaku ndzi ta pfumela eka yena?” 37 Yesu a ku: “U n’wi vonile, kahlekahle hi yena loyi u vulavulaka na yena.” 38 Kutani a ku: “Hosi ndza pfumela eka yena.” Hiloko a khinsama emahlweni ka yena. 39 Kutani Yesu a ku: “Ndzi te emisaveni leyi leswaku swilo leswi ndzi swi endlaka swi ta pfula matihlo ya lava nga voniki+ ni leswaku lava vonaka va ta fa matihlo.”+ 40 Vafarisi lava a va ri na yena loko va twa sweswo, va ku: “Xana u vula leswaku na hina hi fe matihlo?” 41 Yesu a ku: “Loko a mi fe matihlo, a mi nga ta va na xidyoho. Kambe sweswi mi ri, ‘Ha vona.’ Sweswo swi vula leswaku ma ha ri ni xidyoho.”+