Yohane

4 Loko Yesu* a vona leswaku Vafarisi va swi twile leswaku u endla vadyondzisiwa vo tala ni ku va khuvula+ ku tlula Yohane, 2 hambileswi Yesu a a nga khuvuli kambe a ku khuvula vadyondzisiwa vakwe, 3 a suka eYudiya a tlhelela eGaleliya. 4 Kambe a a fanele a hundza hi le Samariya. 5 Hiloko a fika emutini wa le Samariya lowu vuriwaka Sikari lowu nga ekusuhi ni nsimu leyi Yakobo a yi nyikeke Yosefa n’wana wakwe.+ 6 Xihlovo xa Yakobo a xi ri kwalaho.+ Kutani leswi Yesu a a karharisiwe hi riendzo, u fike a tshama kona. A ku ri kwalomu ka awara ya vutsevu.*

7 Wansati un’wana wa le Samariya a ta a ta ka mati. Hiloko Yesu a ku eka yena: “Ndzi kombela mati ndzi nwa.” 8 (Vadyondzisiwa vakwe a va ye emutini va ya xava swakudya.) 9 Wansati wa Musamariya a ku: “Hikwalaho ka yini hambileswi wena u nga Muyuda u kombela mati eka mina wansati wa Musamariya?” (Hikuva Vayuda a va tirhisani ni Vasamariya.)+ 10 Yesu a n’wi hlamula a ku: “Loko a wu yi tiva nyiko ya Xikwembu ya mahala+ ni loyi a nge eka wena, ‘Ndzi kombela mati ndzi nwa,’ a wu ta va u kombele eka yena, kutani a a ta ku nyika mati ya vutomi.”+ 11 Wansati a n’wi hlamula a ku: “Nkulukumba, hambi ku ri khuwana ro ka mati a wu na rona, naswona xihlovo xi entile. Xana mati lawa ya vutomi u ma ka kwihi? 12 Xana u nkulu eka kokwa wa hina Yakobo, loyi a hi nyikeke xihlovo lexi, lexi yena ni vana vakwe ni swifuwo swakwe va nweke eka xona?” 13 Yesu a n’wi hlamula a ku: “Loyi a nwaka mati ya xihlovo lexi u ta tlhela a twa torha. 14 Loyi a nwaka mati lawa ndzi nga ta n’wi nyika wona a nge he tlheli a twa torha,+ kambe mati lawa ndzi nga ta n’wi nyika wona ma ta fana ni mati lama pfelelaka endzeni ka yena ma n’wi nyika vutomi lebyi nga heriki.”+ 15 Wansati a ku: “Nkulukumba, ndzi kombela u ndzi nyika mati ya kona, leswaku ndzi nga ha twi torha naswona ndzi nga ha tshameli ku ta laha ndzi ta ka mati.”

16 Yesu a ku: “Famba u ya vitana nuna wa wena mi ta laha.” 17 Wansati a n’wi hlamula a ku: “A ndzi na nuna.” Hiloko Yesu a ku: “U tiyisile loko u ku, ‘A ndzi na nuna.’ 18 Hikuva a wu tekiwe hi vavanuna va ntlhanu naswona loyi u nga na yena sweswi a hi nuna wa wena. Leswi u swi vuleke i ntiyiso.” 19 Wansati a ku: “Nkulukumba, ndza swi vona leswaku u muprofeta.+ 20 Vakokwa wa hina a va gandzela entshaveni leyi, kambe n’wina mi ri vanhu va fanele ku gandzela eYerusalema.”+ 21 Yesu a ku: “Ndzi tshembe, ku ta fika nkarhi lowu mi nga ta ka mi nga ha gandzeli Tatana entshaveni leyi kumbe eYerusalema. 22 Mi gandzela lexi mi nga xi tiviki;+ kambe hina hi gandzela lexi hi xi tivaka, hikuva ku ta rhanga ku ponisiwa Vayuda.+ 23 Hambiswiritano, nkarhi wa ta naswona se wu fikile, laha vagandzeri va ntiyiso va nga ta gandzela Tatana hi moya ni ntiyiso, hikuva Tatana u lava ku gandzeriwa hi vanhu vo tano.+ 24 Xikwembu i Moya+ naswona lava xi gandzelaka va fanele ku xi gandzela hi moya ni ntiyiso.”+ 25 Wansati a ku: “Ndza swi tiva leswaku Mesiya loyi a vuriwaka Kreste u ta ta. Loko a fika, u ta hi hlamusela swilo hinkwaswo.” 26 Yesu a ku eka wansati: “Mina ndzi vulavulaka na wena ndzi yena.”+

27 Hiloko vadyondzisiwa vakwe va fika hi nkarhi wolowo, kutani va hlamala hileswi a a vulavula ni wansati. Hambiswiritano, a nga kona loyi a n’wi vutiseke a ku: “U lava yini?” kumbe, “Hikwalaho ka yini u vulavula ni wansati loyi?” 28 Hiloko wansati a siya khuwana rakwe a ya emutini a fika a byela vanhu a ku: 29 “Tanani mi ta vona munhu loyi a ndzi byeleke swilo hinkwaswo leswi ndzi swi endleke. Kumbexana hi yena Kreste.” 30 Hiloko vanhu va huma emutini va ya eka Yesu.

31 Hi nkarhi wolowo, vadyondzisiwa vakwe a va n’wi khongotela, va ku: “Rabi,*+ dyana swakudya.” 32 Kambe a va hlamula a ku: “Ndzi ni swakudya swin’wana leswi n’wina mi nga swi tiviki.” 33 Hiloko vadyondzisiwa va vutisana, va ku: “Xana ku ni loyi a n’wi tiseleke swakudya?” 34 Yesu a ku: “Swakudya swa mina i ku endla ku rhandza ka loyi a ndzi rhumeke+ ni ku heta ntirho wakwe.+ 35 Xana a mi vuli mi ku, ku sale tin’hweti ta mune leswaku ku sungula ntshovelo? Yingisani! Ndzi ri eka n’wina: Tlakusani matihlo mi languta masimu, ma lunghekele ku tshoveriwa.+ 36 Mutshoveri wa hakeriwa naswona u hlengeleta mihandzu ya vutomi lebyi nga heriki, leswaku muhaxi ni mutshoveri va tsaka swin’we.+ 37 Kutani ma tiyisile marito lama nge: Un’wana i muhaxi kasi un’wanyana i mutshoveri. 38 Ndzi mi rhuma leswaku mi ya tshovela laha mi nga tirhangiki kona. Van’wana va tirhile, kutani n’wina ma vuyeriwa hikwalaho ka ntirho wa vona.”

39 Vasamariya vo tala va le mutini wolowo va ve ni ripfumelo eka yena hikwalaho ka wansati loyi a nyikeleke vumbhoni a ku: “U ndzi byele swilo hinkwaswo leswi ndzi swi endleke.”+ 40 Loko Vasamariya va ta eka Yesu, va n’wi kombele leswaku a tshama na vona, hiloko a tshama kwalaho masiku mambirhi. 41 Hikwalaho vanhu vo tala swinene va ve ni ripfumelo hikwalaho ka leswi a swi vuleke, 42 hiloko va ku eka wansati: “A hi pfumeli hikwalaho ka leswi u swi vuleke ntsena; kambe hi pfumela hikwalaho ka leswi hi swi tweke naswona ha swi tiva leswaku wanuna loyi hi yena a ponisaka misava.”+

43 Endzhaku ka masiku mambirhi, a suka a ya eGaleliya. 44 Hambiswiritano, Yesu u vule leswaku muprofeta a nga xiximiwi etikweni ra rikwavo.+ 45 Kutani loko a fika eGaleliya, vanhu va kwalaho va n’wi amukela hikuva va vone swilo hinkwaswo leswi a swi endleke enkhubyeni wa le Yerusalema,+ hikuva na vona a va ri kona.+

46 Hiloko a tlhelela emutini wa Kana lowu nga eGaleliya, laha a nga tshama a hundzula mati ma va vhinyo.+ A ku ri ni nandza wa hosi eKapernawume loyi n’wana wakwe a a vabya. 47 Loko wanuna loyi a twa leswaku Yesu u sukile eYudiya naswona u ya eGaleliya, hiloko a ya eka yena ku ya n’wi kombela leswaku a ta horisa n’wana wakwe, hikuva a a ri kusuhi ni ku fa. 48 Kambe Yesu a n’wi hlamula a ku: “A mi nge pfuki mi ve na ripfumelo loko mi nga voni masingita ni swihlamariso.”+ 49 Nandza wa hosi a ku: “Hosi, tana, n’wana wa mina a nga si fa.” 50 Yesu a ku: “Muka; n’wana wa wena u horile.”+ Hiloko wanuna yoloye a tshemba Yesu a muka. 51 Loko a ha ri endleleni hiloko malandza yakwe ma n’wi hlanganisa ivi ma n’wi byela leswaku n’wana wakwe u horile. 52 Hiloko a ma vutisa nkarhi lowu a holeke ha wona. Ma n’wi hlamula ma ku: “U hole tolo hi awara ya vunkombo.”* 53 Kutani tatana loyi a swi xiya leswaku swi endleke hi nkarhi lowu Yesu a n’wi byeleke ha wona a ku: “N’wana wa wena u horile.”+ Hiloko yena ni ndyangu wakwe va va vapfumeri. 54 Leri a ku ri singita ra vumbirhi+ leri Yesu a ri endleke loko a suka eYudiya a ya eGaleliya.