Eklesiasta

8 I mani la fanaka ni munhu wo tlhariha? I mani la tivaka nhlamuselo ya mhaka? Vutlhari bya munhu byi sasekisa xikandza xakwe byi susa ku khwanyana exikandzeni xakwe.

2 Mina ndzi ri: “Yingisa swileriso swa hosi+ hikwalaho ka leswi u xiximaka xihlambanyo xa wena eka Xikwembu.+ 3 U nga hatliseli ku suka emahlweni ka yona.+ U nga endli swo biha;+ hikuva yi nga endla xin’wana ni xin’wana lexi yi xi lavaka, 4 phela rito ra hosi a ri tluriwi;+ i mani loyi a nga yi vutisaka a ku, ‘Xana u endla yini?’”

5 Loyi a yingisaka xileriso a nge weriwi hi khombo+ naswona mbilu yo tlhariha yi ta tiva nkarhi lowu faneleke ni vuavanyisi.+ 6 Mhaka yin’wana ni yin’wana yi ni nkarhi ni ndlela leyi yi lulamisiwaka ha yona,+ hikuva vanhu va ni swiphiqo swo tala. 7 Leswi ku nga riki na munhu loyi a tivaka leswi nga ta endleka, i mani la nga n’wi byelaka ndlela leyi swi nga ta endleka ha yona?

8 Tanihi leswi a nga riki kona loyi a nga lawulaka matimba ya vutomi, hikwalaho a nga kona loyi a nga sivelaka rifu loko ri fikile.+ Tanihi leswi a nga riki kona loyi a nga ntshunxiwaka hi nkarhi wa nyimpi, hilaha ku fanaka, vubihi a byi nge va tshiki va baleka lava hanyaka hi byona.

9 Hinkwaswo leswi ndzi swi vonile, endzhaku ko kambisisa ntirho wun’wana ni wun’wana lowu endliwaka laha misaveni, enkarhini wolowo hinkwawo, munhu u fuma munhu un’wana ku n’wi endla swo biha.+ 10 Naswona ndzi vone vanhu vo homboloka va ri karhi va lahliwa, lava a va tala ku nghena va huma endhawini yo kwetsima, kambe va hatle va rivariwa emutini lowu a va endla sweswo eka wona.+ Leswi na swona a swi pfuni nchumu.

11 Leswi lava endlaka swo biha va nga hatliki va xupuriwa,+ vanhu va va ni xivindzi xo endla swo biha.+ 12 Hambiloko mudyohi o endla swo biha ka dzana a tlhela a hanya nkarhi wo leha, ndza tshemba leswaku lava chavaka Xikwembu xa ntiyiso swi ta va fambela kahle hikuva va xi chava.+ 13 Kambe lowo homboloka a swi nge n’wi fambeli kahle+ naswona a nge ma engeteli masiku yakwe lama fanaka ni ndzhuti,+ hikuva a nga xi chavi Xikwembu.

14 Ku ni mhaka leyi dyisaka mbitsi laha misaveni: Ku ni vanhu vo lulama lava khomiwaka onge hiloko va endle swo biha+ naswona ku ni vanhu vo homboloka lava khomiwaka onge hiloko va endle leswinene.+ Leswi na swona ndzi ri a swi pfuni nchumu.

15 Kutani ndzi vona swi antswa ku tsaka,+ hikuva a ku na nchumu wo antswa eka munhu laha misaveni loko ku nga ri ku dya ni ku nwa ni ku tiphina; u fanele a tiphina hi swona loko a ri karhi a tirha hi matimba+ emasikwini lawa Xikwembu xa ntiyiso xi n’wi nyikeke wona laha misaveni.

16 A ndzi tiyimisele ku va ni vutlhari ni ku vona ntirho hinkwawo lowu endliwaka emisaveni,+ lerova a ndzi nga etleli vusiku ni nhlikanhi. 17 Kutani ndzi kambisise ntirho hinkwawo wa Xikwembu xa ntiyiso naswona ndzi xiye leswaku vanhu a va nge swi twisisi leswi endlekaka emisaveni.+ Hambiloko vanhu va ringeta hi matimba, a va nge swi twisisi. Hambiloko va vula leswaku va tlharihe ngopfu, a va nge wu twisisi nikatsongo.+