Mitirho

16 Hiloko a fika eDerbe ni le Listra.+ Kwalaho a ku ri ni mudyondzisiwa un’wana loyi a vitaniwaka Timotiya,+ mana wakwe a a ri Muyuda loyi a a ri mupfumeri kambe tata wakwe a a ri Mugriki. 2 Vamakwavo evandlheni ra le Listra ni ra le Ikoniya a va vulavula kahle ha yena. 3 Pawulo u vule leswaku u tsakela ku famba na Timotiya, hiloko a n’wi teka a n’wi yimbisa hikwalaho ka Vayuda lava a va ri etindhawini teto,+ hikuva hinkwavo a va swi tiva leswaku tata wakwe a a ri Mugriki. 4 Loko va hundza hi le mitini a va nyika mavandlha swileriso leswi vaapostola ni vakulukumba lava a va ri eYerusalema a va endle xiboho xa leswaku swi landzeriwa.+ 5 Kutani mavandlha a ma ya ma tiya eripfumelweni ni ku andza siku ni siku.

6 Nakambe va hundze eFrigiya ni le tikweni ra Galatiya,+ hikuva moya lowo kwetsima wu va arisile ku chumayela rito exifundzheni xa Asiya. 7 Ku tlula kwalaho, loko va fika eMisiya va endle matshalatshala yo ya eBitiniya+ kambe moya wa Yesu a wu va pfumelelanga. 8 Hiloko va hundza hi le Misiya va ya eTrowasi. 9 Vusiku byebyo Pawulo a vona xivono, wanuna wa le Makedoniya a yimile a ri karhi a n’wi kombela a ku: “Pelela eMakedoniya u ta hi pfuna.” 10 Loko a vone xivono xexo, hi ringete ku ya eMakedoniya hi ku ehleketa leswaku Xikwembu a xi lava hi ya chumayela mahungu lamanene eka vona.

11 Hiloko hi suka eTrowasi hi xikepe hi famba hi ya fika eSamotraka, kambe hi siku leri landzelaka hi ya eNeyapoli; 12 ku suka kwalaho hi ye eFilipiya,+ ku nga muti lowu a wu fumiwa hi Varhoma naswona i dorobankulu ra muganga wa le Makedoniya. Hi fike hi tshama emutini wolowo masikunyana. 13 Hi siku ra Savata hi hume emutini hi ya etlhelo ka nambu, laha a hi ehleketa leswaku ku ni ndhawu yo khongela; hi fika hi tshama ehansi hi sungula ku vulavula ni vavasati lava a va hlengeletanile kwalaho. 14 Wansati un’wana loyi a va ku i Lidiya loyi a xavisa malapi yo durha* loyi a a huma emutini wa Tiyatira+ naswona a a ri mugandzeri wa Xikwembu, a a yingiserile hiloko Yehovha* a pfula mbilu yakwe swinene leswaku yi yingiserisisa leswi a swi vuriwa hi Pawulo. 15 Loko yena ni ndyangu wakwe va khuvuriwile,+ u te: “Loko mi ndzi teka ndzi ri munhu wo tshembeka eka Yehovha,* tanani mi ta tshama endlwini ya mina.” Kutani a hi sindzisa leswaku hi famba na yena.

16 Siku rin’wana loko hi ya laha a ku khongeriwa kona hi hlangane ni nhwanyana un’wana loyi a a ri nandza naswona a a ri ni dimona ra ku hlahluva.+ A a fuwisa vini va yena hi ku vhumbha. 17 Nhwanyana loyi a a tshamela ku landzelela Pawulo na hina a ri karhi a huwelela a ku: “Vavanuna lava i malandza ya Xikwembu Lexi Nge Henhlahenhla+ naswona va mi dyondzisa ndlela yo ponisiwa.” 18 A a tshamela ku endla sweswo masiku yo tala. Eku heteleleni Pawulo a karhala kutani a hundzuluka a byela dimona rolero a ku: “Ndzi ku lerisa hi vito ra Yesu Kreste leswaku u huma eka yena.” Hiloko ri huma hi nkarhi wolowo.+

19 Loko vini va nhwanyana va vona leswaku va lahlekeriwe hi bindzu leri a va tshembele eka rona,+ va khoma Pawulo na Silasi va va kokakoka va va yisa eka vafumi etimakete.+ 20 Loko va va yise eka vamajistarata va fike va ku: “Vavanuna lava va endla hasahasa emutini wa hina.+ I Vayuda 21 naswona va dyondzisa vanhu mindhavuko leyi hina Varhoma hi nga pfumeleriwiki ku yi amukela kumbe ku hanya ha yona.” 22 Hiloko ntshungu wu va hlundzukela, kutani vamajistarata endzhaku ko handzulela swiambalo swa vona va lerisa leswaku va biwa hi tinhonga.+ 23 Endzhaku ka loko va va fumbuterile, va va hoxe ekhotsweni kutani va lerisa murindzi wa khotso leswaku a va rindza swinene.+ 24 Leswi a kumeke xileriso xexo, u ye a ya va hoxa ekhotsweni ra le xikarhi a tlhela a va boha milenge hi tingole.*

25 Kambe exikarhi ka vusiku Pawulo na Silasi a va ri karhi va khongela ni ku dzunisa Xikwembu hi risimu+ naswona vabohiwa lavan’wana a va va twa. 26 Hiloko misava yi sungula ku tsekatseka swinene lerova masungulo ya khotso ma ninginika. Kutani tinyangwa hinkwato ti pfuleka hi nkarhi wolowo ni leswi a va bohiwe ha swona swi tshunxeka.+ 27 Loko murindzi wa khotso a pfuka evurhongweni a vona tinyangwa ta khotso ti pfulekile, a hlomula banga rakwe a lava ku tidlaya hikuva a a anakanya leswaku vabohiwa va balekile.+ 28 Kambe Pawulo a huwelela a ku: “U nga tivavisi, hikuva hi kona hinkwerhu!” 29 Hiloko a kombela mavoni kutani a tsutsumela endzeni ka khotso, a chuhile swinene a tlhela a rhurhumela, a wa emahlweni ka Pawulo na Silasi. 30 A va humesela ehandle a ku: “Vakulukumba, xana ndzi fanele ndzi endla yini leswaku ndzi ponisiwa?” 31 Va n’wi hlamula va ku: “Pfumela eka Hosi Yesu kutani u ta ponisiwa, wena ni ndyangu wa wena.”+ 32 Hiloko va n’wi chumayela rito ra Yehovha* yena ni hinkwavo lava nga endlwini yakwe. 33 A famba na vona vusiku byebyo a fika a va hlambisa timbanga ta vona. Hiloko yena ni ndyangu wakwe va namba va khuvuriwa.+ 34 Endzhaku ka sweswo a va yisa endlwini yakwe a fika a va endlela swakudya a swi veka etafuleni, a a tsakile swinene yena ni ndyangu wakwe hileswi a nga pfumela eka Xikwembu.

35 Loko ri xa, vamajistarata va rhuma tindhuna va ku: “Tshunxani vavanuna volavo.” 36 Kutani murindzi wa khotso a vikela Pawulo marito ya vona a ku: “Vamajistarata va rhume vanhu leswaku mi tshunxiwa. Hikwalaho, humani mi tifambela hi ku rhula.” 37 Kambe Pawulo a ku eka vona: “Va hi be exikarhi ka vanhu hi nga ri na nandzu* hambileswi hi nga Varhoma+ va tlhela va hi hoxa ekhotsweni. Kambe sweswi va lava ku hi tshunxa swi nga voniwi hi munhu. Sweswo a swi nge endleki, a va te vona vini va ta hi tshunxa.” 38 Hiloko tindhuna ti byela vamajistarata marito lawa. Vona va sungula ku chava loko va twa leswaku vavanuna lava i Varhoma.+ 39 Kutani va ta va ta va xavelela naswona endzhaku ka loko va fambe na vona va va humesa emutini, va va kombela leswaku va suka emutini. 40 Loko Pawulo na Silasi va huma ekhotsweni, va ye ekaya ka Lidiya; va fika va vona vadyondzisiwa kutani va va khutaza,+ endzhaku ka sweswo va famba.