Mitirho

13 Evandlheni ra le Antiyoka a ku ri ni vaprofeta ni vadyondzisi ku nga:+ Barnaba, Samiyoni loyi a a vuriwa Nigere, Lukiyo wa le Kirena, Manahene loyi a dyondzeke na Heroda mufumi wa xifundzha, na Sawulo. 2 Loko va ri karhi va tirhela Yehovha* ni ku titsona swakudya, moya lowo kwetsima wu ku: “Ndzi hlawuleleni Barnaba na Sawulo+ leswaku va ta endla ntirho lowu ndzi va vitaneleke wona.”+ 3 Endzhaku ka loko va titsone swakudya ni ku khongela, va va tlhandleka mavoko va va tshika va famba.

4 Kutani vavanuna lava, lava rhumiweke hi moya lowo kwetsima, va ya eSelukiya, kutani ku suka kwalaho va khandziya xikepe va ya eKipra. 5 Loko va fika eSalami va sungula ku dyondzisa rito ra Xikwembu emasinagogeni ya Vayuda. A va ri na Yohane loyi a a va pfuna.+

6 Kuteloko va tsemakanye xihlala hinkwaxo ku ya fika ePafo, va hlangana ni Muyuda loyi a va ku i Bariyesu, loyi a ri noyi tlhelo muprofeta wa mavunwa. 7 Wanuna loyi a a ri na holobye* Sergiyo Pawulosi, wanuna wo tlhariha. Sergiyo Pawulosi u vitane Barnaba na Sawulo hikuva a a lava ku twa rito ra Xikwembu hi mbilu hinkwayo. 8 Kambe Elima lowa noyi (leyi i ndlela leyi vito rakwe ri nga hundzuluxeriwa ha yona) a sungula ku va kaneta hi xikongomelo xo sivela holobye leswaku a nga vi mupfumeri. 9 Hiloko Sawulo, loyi a vitaniwaka Pawulo, a tala moya lowo kwetsima, ivi a honolela Elima 10 a ku: “Wena munhu la nga ni vukanganyisi hinkwabyo ni manyala hinkwawo, wena n’wana wa Diyavulosi,+ wena nala wa hinkwaswo leswi lulameke, hikwalaho ka yini u nga tshiki ku onha tindlela leti lulameke ta Yehovha?* 11 Vona! Yehovha* u ta ku xupula naswona u ta fa matihlo, a wu nge voni nchumu ku ringana nkarhi wo karhi.” Hi ku hatlisa matihlo yakwe ma weriwa hi hunguva leyikulu ni munyama, kutani a lava munhu la nga ta n’wi khoma hi voko a n’wi fambisa. 12 Endzhaku ka loko holobye a vone leswi endlekeke, u ve mupfumeri hikuva dyondzo ya Yehovha* yi n’wi hlamarisile.

13 Hiloko Pawulo ni vanghana vakwe va khandziya xikepe va suka ePafo va ya Perge ePamfiliya. Kambe Yohane+ a va siya a tlhelela eYerusalema.+ 14 Hambiswiritano, va suka ePerge va ya eAntiyoka ePisidiya. Va nghena esinagogeni+ hi siku ra Savata va fika va tshama. 15 Endzhaku ka loko vanhu va hlayeriwe Nawu+ ni tibuku ta Vaprofeta, varhangeri va le sinagogeni va vulavula na Pawulo na Barnaba va ku: “Vavanuna, vamakwerhu, loko mi ri ni rito ro khutaza vanhu, ri vuleni.” 16 Hiloko Pawulo a tlakuka, a va koweta hi voko leswaku va miyela ivi a ku:

“Vavanuna, Vaisrayele na n’wina van’wana lava chavaka Xikwembu, yingisani. 17 Xikwembu xa vanhu lava va Israyele xi hlawule vakokwa wa hina, xi va endla tiko leri nga ni matimba loko va ha ri valuveri etikweni ra Egipta kutani xi va humesa hi voko ra matimba.+ 18 Xi va lehisele mbilu emananga, ku ringana malembe ya 40.+ 19 Endzhaku ka loko xi lovise matiko ya nkombo etikweni ra Kanana, xi va nyike tiko ra vona tanihi ndzhaka.+ 20 Hinkwaswo sweswo swi teke malembe ya kwalomu ka 450.

“Endzhaku ka sweswo xi va vekele vaavanyisi ku fikela eka muprofeta Samuwele.+ 21 Kambe endzhaku ka sweswo,+ va lave ku va ni hosi naswona Xikwembu xi va vekele Sawulo n’wana wa Kixi, wa nyimba ya Benjamini+ naswona u fume malembe ya 40. 22 Loko xi n’wi susile, xi veke Davhida a va hosi ya vona,+ loyi xi vuleke leswi ha yena: ‘Ndzi kume Davhida n’wana wa Yese,+ wanuna la amukelekaka embilwini ya mina;+ u ta endla swilo hinkwaswo leswi ndzi swi navelaka.’ 23 Hi ku ya hi xitshembiso xa xona, eka vana* va wanuna loyi, Xikwembu xi humesele Israyele muponisi, ku nga Yesu.+ 24 Loko yoloye a nga si fika, Yohane u chumayele vanhu hinkwavo va Israyele a va byela leswaku va khuvuriwa ku kombisa leswaku va hundzukile.+ 25 Kambe loko Yohane a ri karhi a heta ntirho wakwe, a a ku: ‘Xana mi ehleketa leswaku ndzi mani? A ndzi yena. Kambe maswivo! Ku ni loyi a taka endzhaku ka mina loyi swi nga ndzi faneliki ku tshunxa tintambhu ta maphaxani yakwe.’+

26 “Vavanuna, vamakwerhu, n’wina vatukulu vandyangu wa Abrahama na n’wina van’wana lava chavaka Xikwembu, hi rhumeriwe rungula leri vulavulaka hi ku ponisiwa ka hina.+ 27 Hikuva vaaki va le Yerusalema ni vafumi va vona a va n’wi tivanga yoloye, kambe loko va n’wi avanyisa, va hetisise swilo leswi vuriweke hi Vaprofeta,+ leswi hlayeriwaka ehenhla hi savata yin’wana ni yin’wana. 28 Hambileswi va nga kumangiki xivangelo xa leswaku a dlayiwa,+ va sindzise Pilato leswaku a dlayiwa.+ 29 Loko va endle swilo hinkwaswo leswi tsariweke mayelana na yena, va n’wi hawurile emhandzini* va n’wi lahla esirheni.+ 30 Kambe Xikwembu xi n’wi pfuxile eka lava feke,+ 31 naswona u humelele masiku yo tala eka lava nga suka na yena eGaleliya va ya eYerusalema. Sweswi lava i timbhoni takwe evanhwini.+

32 “Sweswi hi mi byela mahungu lamanene hi xitshembiso lexi endliweke eka vakokwa wa hina. 33 Xikwembu xi xi hetisisile eka hina vana va vona hi ku pfuxa Yesu;+ hilaha swi tsariweke hakona eka pisalema ya vumbirhi leyi nge: ‘U n’wana wa mina; namuntlha ndzi tata wa wena.’+ 34 Mhaka ya leswaku xi n’wi pfuxe eka lava feke leswaku a nga ha tlheli a va ni miri lowu bolaka, xi vule mhaka leyi xi ku: ‘Ndzi ta ku nyika switshembiso swa rirhandzu leswi tshembisiweke Davhida, leswi tshembekaka.’+ 35 Eka pisalema yin’wana ku tsariwe leswi: ‘A wu nge pfumeli leswaku miri wa nandza wa wena la tshembekaka wu bola.’+ 36 Hi hala tlhelo, Davhida u tirhele Xikwembu* hi nkarhi wa ku hanya kakwe, kutani a fa a lahliwa ni vakokwa wakwe naswona miri wakwe wu borile.+ 37 Kambe loyi Xikwembu xi n’wi pfuxeke, miri wakwe a wu bolanga.+

38 “Hikwalaho swi tiveni vamakwerhu, leswaku hikwalaho ka yena mhaka ya ku rivaleriwa swidyoho ya twarisiwa eka n’wina+ 39 ni leswaku eka swilo hinkwaswo leswi a mi ta voniwa nandzu hi ku ya hi Nawu wa Muxe,+ un’wana ni un’wana loyi a pfumelaka a nga voniwi nandzu hikwalaho ka yoloye.+ 40 Hikwalaho tivoneleni leswaku leswi vuriwaka hi tibuku ta Vaprofeta swi nga mi weli: 41 ‘Langutani ntirho lowu ndzi wu endlaka emikarhini ya n’wina, n’wina vahlekuri. I ntirho lowu mi nga ta ka mi nga tshembi leswaku ndzi wu endlile hambiloko munhu o mi hlamusela wona. Kambe mi ta hlamala naswona mi ta lova.’”+

42 Loko va ri karhi va huma, vanhu va va kombela leswaku va va byela timhaka leti eka Savata leyi landzelaka. 43 Loko nhlengeletano ya sinagoga yi herile, Vayuda ni vaproselita* vo tala lava a va gandzela Xikwembu va landzela Pawulo na Barnaba, lava va khutazeke ku ya emahlweni va endla swilo leswi nga ta endla leswaku va rhandziwa hi Xikwembu.+

44 Hi Savata leyi landzelaka kwalomu ka muti hinkwawo wu hlengeletana leswaku wu ta twa rito ra Yehovha.* 45 Loko Vayuda va vona mintshungu, va va ni mavondzo kutani va sungula ku kaneta ni ku sandza swilo leswi a swi vuriwa hi Pawulo.+ 46 Hiloko Pawulo na Barnaba va va byela hi xivindzi va ku: “A swi boha leswaku rito ra Xikwembu ri rhanga ri byeriwa n’wina.+ Leswi mi ri alaka naswona mi vonaka swi nga mi faneli ku kuma vutomi lebyi nga heriki, maswivo, hi ya ri byela vanhu vamatiko.+ 47 Hikuva Yehovha* u hi lerisile hi marito lawa: ‘Ndzi mi hlawurile leswaku mi va ku vonakala eka matiko leswaku misava hinkwayo yi ta ponisiwa hikwalaho ka n’wina.’”+

48 Loko vanhu va matiko va twa sweswo, va sungula ku tsaka ni ku dzunisa Yehovha* hikwalaho ka rito rakwe naswona hinkwavo lava kombiseke leswaku va lava ku kuma vutomi lebyi nga heriki va ve vapfumeri. 49 Ku tlula kwalaho, rito ra Yehovha* a ri ya ri chumayeriwa etikweni hinkwaro. 50 Kambe Vayuda va kucetela vavasati va vukhongeri lava nga ni swikhundlha swa le henhla ni vakulukumba va muti, hiloko va xanisa+ Pawulo na Barnaba kutani va va cukumetela ehandle ka mindzilakana ya vona. 51 Hiloko va phumunha ritshuri emilengeni ya vona va va tshika, va ya eIkoniya.+ 52 Kutani vadyondzisiwa va ya emahlweni va tsaka swinene+ ni ku tala moya lowo kwetsima.