Mitirho

27 Leswi a ku endliwe xiboho xa leswaku hi famba hi xikepe hi ya eItaliya,+ Pawulo swin’we ni vabohiwa van’wana va vekiwe ehansi ka ndhuna ya masocha leyi vito ra yona ku nga Yuliyo ya ntlawa wa masocha ya Awugusto. 2 Hi khandziye xikepe lexi humaka eAdramita lexi a xi ri kusuhi ni ku suka xi ya etimbuweni to hambanahambana exifundzheni xa Asiya; Aristako+ Mukedoniya la humaka eTesalonika a a ri na hina. 3 Hi xa mundzuku xa kona hi fika eSidoni, naswona Yuliyo u ve ni tintswalo eka Pawulo a n’wi pfumelela leswaku a ya vona vanghana vakwe va n’wi khathalela.

4 Loko hi suka kwalaho, hi tlute hi le kusuhi ni xihlala xa Kipra laha a hi sirhelelekile eka moya lowu a wu hi sivela. 5 Ku suka kwalaho hi fambe hi lwandle leri nga ekusuhi na Kilikiya na Pamfiliya, hi ya fika exitichini xa swikepe eMira lexi nga le Likiya. 6 Loko hi ri kwalaho, ndhuna ya masocha yi kume xikepe lexi humaka eAleksandriya lexi kongomeke eItaliya, hiloko yi hi khandziyisa xona. 7 Endzhaku ko tluta hi ku nonoka masiku yo tala, hi fike eKinida hi ku nonon’hweriwa. Leswi moya a wu hi sivela ku ya emahlweni, hi fambe ekusuhi ni le Kreta eSalmona laha a hi sirhelelekile eka moya. 8 Kuteloko hi tlute hi ku nonon’hweriwa ekusuhi ni ribuwa, hi fike endhawini leyi vuriwaka Hlaluko ro Saseka, leyi a yi ri ekusuhi ni muti wa Lasiya.

9 Se a ku hundze nkarhi wo leha naswona hi nkarhi lowu a swi ri ni khombo ku tluta elwandle, hikuva hambi ku ri nkarhi wa ku titsona swakudya ka Siku Ro Kombela Ku Rivaleriwa+ se a wu hundzile, hiloko Pawulo a va tsundzuxa 10 a ku: “Vavanuna, ndza swi xiya leswaku riendzo leri ri ta hi vangela khombo ni ku lahlekeriwa lokukulu ku nga ri ka ndzhwalo ni xikepe ntsena kambe ni ka vutomi bya hina.” 11 Hambiswiritano, ndhuna ya masocha yi yingise mufambisi wa xikepe ni n’wini wa xona ematshan’weni ya leswi vuriweke hi Pawulo. 12 Leswi hlaluko leri a ri nga ri kahle lerova ku nga hetiwa vuxika eka rona, vo tala va ringanyeta leswaku ku tlutiwa ku sukiwa kwalaho ku vona loko va nga swi kota ku heta vuxika eFenikisi, ku nga hlaluko ra Kreta leri ku nga ngheniwaka eka rona hi le n’walunguvuxa ni le dzongavuxa.

13 Loko ku sungula ku ba rimoyana leri humaka edzongeni, a va anakanya leswaku va xi fikelerile xikongomelo xa vona, hiloko va koka nsoma* kutani va sungula ku tluta ekusuhi ni ribuwa ra Kreta. 14 Hambiswiritano, endzhaku ka nkarhinyana, xikepe xi sungula ku biwa hi xidzedze lexi vuriwaka Yurakuloni.* 15 Leswi xikepe a xi biwa hi matimba lerova xi tsandzeka ku ya emahlweni, hi xi tshike xi ya laha moya a wu bela kona. 16 Hiloko hi fika hi tumbela exihlaleni lexitsongo lexi vuriwaka Kawuda, kambe a hi nga swi koti ku lawula xikwekwetsu lexi a xi ri endzhaku ka xikepe. 17 Kambe endzhaku ka ku layicha xikwekwetsu ehenhla ka xikepe, va sungule ku bohelela xikepe hi tintambhu leswaku xi nga phatluki naswona leswi a va chava leswaku va nga mbombomela esaveni ra Siriti,* va debyise tintambu ta seyila ivi xikepe xi ya laha moya wu belaka kona. 18 Leswi a hi ndlengandlengisiwa hi xidzedze, va sungule ku hunguta ndzhwalo exikepeni hi siku leri landzelaka. 19 Naswona hi siku ra vunharhu va cukumete tintambhu ta xikepe hi mavoko.

20 Loko se ku hele masiku yo tala hi nga voni dyambu kumbe tinyeleti naswona hi ri karhi hi biwa hi xidzedze, hi sungule ku ka hi nga ha tshembi leswaku hi ta pona. 21 Endzhaku ka loko va hete nkarhi wo leha va nga dyi nchumu, Pawulo a yima exikarhi ka vona a ku: “Vavanuna, a mi fanele mi yingise xitsundzuxo xa mina, mi nga sukanga eKreta, hikwalaho ka sweswo hi weriwe hi khombo leri hi tlhela hi lahlekeriwa.+ 22 Nilokoswiritano, ndzi ri eka n’wina mi nga chavi, hikuva hinkwenu mi ta pona, ku ta onhaka xikepe ntsena. 23 Nivusiku ntsumi+ ya Xikwembu lexi ndzi xi endlelaka ntirho wo kwetsima yi fika yi yima ekusuhi na mina 24 yi ku: ‘U nga chavi, Pawulo. U fanele ku ya yima emahlweni ka Khezari,+ waswivo, Xikwembu xi ta ponisa hinkwavo lava u nga na vona exikepeni.’ 25 Hikwalaho mi nga chavi vavanuna, hikuva ndza xi tshemba Xikwembu naswona xi ta endla hilaha ndzi byeriweke hakona. 26 Hambiswiritano, hi fanele hi cukumeteriwa exihlaleni xin’wana.”+

27 Hi siku ra vu-14 nivusiku loko ha ha ri eku ndlengandlengisiweni eLwandle ra Adriya, exikarhi ka vusiku, vatluti va sungula ku ehleketelela leswaku hi nga va hi ri ekusuhi ni ribuwa. 28 Va pima ku enta ka lwandle va kuma leswaku ri ente kwalomu ka 36 wa timitara,* hiloko va famba mpfhukanyana kutani va tlhela va pima, va kuma leswaku ri ente kwalomu ka 27 wa timitara.* 29 Naswona hi ku chava leswaku xikepe xi nga hima maribye xi tshoveka, va hoxa tinsoma ta mune leti a ti ri endzhaku ka xikepe leswaku xi ta yima, hiloko va sungula ku navela leswaku onge ri nga xa. 30 Kambe loko vatluti va ringeta ku baleka exikepeni naswona va nembeleta xikwekwetsu elwandle va endla onge va lava ku hoxa tinsoma leti a ti ri exifuveni xa xikepe, 31 Pawulo a byela ndhuna ni masocha ya yona a ku: “Loko vavanuna lava va nga tshami exikepeni, a mi nge poni.”+ 32 Hiloko masocha ma tsema tintambu ta xikwekwetsu ma xi tshika xi wa.

33 Hi matakuxa, Pawulo a va khutaza hinkwavo leswaku va dya swakudya a ku: “Namuntlha i siku ra vu-14 mi rindzile mi karhatekile naswona a mi si dya nchumu. 34 Hikwalaho ndzi mi khutaza leswaku mi dya; leswi swi endleriwa vuhlayiseki bya n’wina hikuva a ku na nsisi ni wun’we wa nhloko ya un’wana wa n’wina lowu nga ta lova.” 35 Endzhaku ko vula sweswo, a teka xinkwa, a khensa Xikwembu emahlweni ka vona hinkwavo kutani a xi phema a sungula ku dya. 36 Hiloko hinkwavo va tiya va sungula ku dya. 37 Hinkwerhu ka hina a hi ri 276 exikepeni. 38 Loko se va dyile va xurhe, va hungute ndzhwalo wa xikepe hi ku lahlela koroni elwandle.+

39 Loko ri xa, a va nga ku tivi lomu a va ri kona,+ kambe va vona ribuwa naswona a va tiyimiserile ku yisa xikepe kwalaho loko va ta swi kota. 40 Hiloko va tsema tinsoma, va ti tshika ti wela elwandle, va tlhela va tshunxa tintambu leti tsimbeke timhandzi leti fambisaka xikepe; naswona endzhaku ko tlakusela seyila ehenhla, va kongoma eribuweni. 41 Hiloko va hima ndhundhuma ya sava leyi biwaka hi lwandle matlhelo hinkwawo, kutani va nkhisa esaveni hi xikepe, xifuva xa xikepe xi bodlhomela xi nga ha tsekatseki, kambe ncila wu sungula ku tshoveka hi matimba wu va swipetlu.+ 42 Loko masocha ma vona sweswo, ma teka xiboho xo dlaya vabohiwa leswaku ku nga vi na munhu la hlambelaka a baleka. 43 Kambe ndhuna ya masocha a yi lava ku ponisa Pawulo, kutani yi ma sivela leswaku ma nga dlayi munhu. Hiloko yi lerisa lava kotaka ku hlambela leswaku va tlulela elwandle va rhanga va ya fika eribuweni, 44 lavan’wana hinkwavo va landzerile, van’wana va khandziye mapulanga kasi van’wana va khandziye swipetlu swa xikepe. Kutani hinkwavo va fika eribuweni va hlayisekile.+