Tihosi To Sungula
11 Kambe Hosi Solomoni a va ni vavasati+ vo tala va matiko handle ka n’wana wa Faro:+ vavasati va Vamowabu,+ va Vaamoni,+ va Vaedomu, va Vasidoni+ ni va Vaheti.+ 2 A va huma ematikweni lawa Yehovha a byeleke Vaisrayele ha wona a ku: “Mi nga tshuki mi tekana na vona, na vona va nga tshuki va tekana na n’wina, hikuva va ta endla leswaku timbilu ta n’wina ti landzela swikwembu swa vona.”+ Kambe Solomoni a va namarhela a va rhandza. 3 A a ri ni vasati va 700 lava a va ri tihosana ta xisati ni vasati lavatsongo va 300, vasati vakwe va hambukisa mbilu yakwe hakatsongotsongo. 4 Loko Solomoni a dyuhele,+ vasati vakwe va hambukise mbilu yakwe leswaku yi landzela swikwembu+ swin’wana, mbilu yakwe a yi nga ha hetisekanga eka Yehovha Xikwembu xakwe ku hambana ni mbilu ya Davhida tata wakwe. 5 Hiloko Solomoni a gandzela Axitoreti+ xikwembukati xa Vasidoni na Milikomo+ xikwembu lexi nyenyetsaka xa Vaamoni. 6 Kutani Solomoni a endla swilo swo biha ematihlweni ya Yehovha, a nga fambanga emikondzweni ya tata wakwe Davhida hi ku yingisa Yehovha hi ku helela.+
7 Hi nkarhi wolowo Solomoni a akela Kemoxi xikwembu lexi nyenyetsaka xa le Mowabu, na Moleke+ xikwembu lexi nyenyetsaka xa Vaamoni,+ ndhawu leyi tlakukeke+ entshaveni leyi a yi ri emahlweni ka Yerusalema. 8 Sweswo hi leswi a swi endleleke vasati va yena hinkwavo va matiko lava a va mbulukisa gandzelo ni ku endlela swikwembu swa vona magandzelo.
9 Yehovha a karihela Solomoni, hikuva mbilu yakwe a yi fularhele Yehovha Xikwembu xa Israyele,+ loyi a humeleleke kambirhi eka yena+ 10 naswona a a n’wi tsundzuxile leswaku a nga gandzeli swikwembu swin’wana.+ Kambe a nga swi yingisanga leswi Yehovha a n’wi leriseke swona. 11 Kutani Yehovha a ku eka Solomoni: “Hikwalaho ka leswi u endleke nchumu lowu naswona u nga wu hlayisangiki ntwanano wa mina ni milawu ya mina leswi ndzi ku leriseke swona, ndzi ta handzula mfumo ndzi wu susa eka wena ndzi wu nyika un’wana wa malandza ya wena.+ 12 Hambiswiritano, a ndzi nge swi endli hi nkarhi wa ku fuma ka wena, hikwalaho ka Davhida tata wa wena. Ndzi ta wu handzula evokweni ra n’wana wa wena,+ 13 kambe a ndzi nge n’wi vutleli mfumo hinkwawo.+ N’wana wa wena ndzi ta n’wi nyika nyimba yin’we+ hikwalaho ka Davhida nandza wa mina ni hikwalaho ka muti wa Yerusalema lowu ndzi wu hlawuleke.”+
14 Hiloko Yehovha a endla leswaku Hadada wa Muedomu loyi a a huma endyangwini wa vuhosi wa le Edomu+ a va nala wa Solomoni.+ 15 Loko Davhida a hlule Vaedomu,+ Yowabu ndhuna ya masocha u ye a ya lahla lava dlayiweke naswona u ringete ku dlaya vavanuna hinkwavo va le Edomu. 16 (Hikuva Yowabu ni masocha hinkwawo ya Israyele va tshame kwalaho ku ringana tin’hweti ta tsevu ku fikela loko a dlaye vavanuna hinkwavo va le Edomu.) 17 Kambe Hadada ni malandza man’wana ya tata wakwe ya Vaedomu va balekele eEgipta; Hadada a ha ri mufana hi nkarhi wa kona. 18 Hiloko va suka eMidiyani va hundza hi le Parani. Va teka vavanuna van’wana eParani+ va famba na vona eEgipta eka Faro hosi ya Egipta, loyi a n’wi nyikeke yindlu, swakudya ni tiko. 19 Faro a tsakela Hadada, lerova a n’wi nyika makwavo wa hosi ya xisati* Tahapanese nsati wakwe, leswaku a va nsati wa Hadada. 20 Hi ku famba ka nkarhi makwavo wa xisati wa Tahapanese a n’wi tswalela n’wana wa jaha loyi a thyiweke Genubata, hiloko Tahapanese a kurisa* n’wana loyi endlwini ya Faro, kutani Genubata a tshama endlwini ya Faro ni vana va Faro.
21 Hadada a swi twa a ri eEgipta leswaku Davhida u file a tlhela a lahliwa ni vakokwa wakwe,+ nileswaku Yowabu ndhuna ya masocha u file.+ Hiloko Hadada a ku eka Faro: “Ndzi pfumelele ndzi tlhelela etikweni ra rikwerhu.” 22 Kambe Faro a ku eka yena: “Xana u pfumala yini laha ka mina leswi u lavaka ku tlhelela etikweni ra rikwenu?” Hiloko Hadada a ku: “A ndzi pfumali nchumu, kambe ndzi kombela u ndzi pfumelela ndzi tlhelela eka rikwerhu.”
23 Xikwembu xi tlhela xi endla leswaku Rezoni n’wana wa Eliyada, loyi a balekeleke Hadadezera+ hosi ya le Soba a va nala+ wa Solomoni. 24 U tihlengeletele vavanuna kutani yena a va ndhuna ya vuthu ra vaphangi loko Davhida a va hlurile.*+ Kutani va ya eDamaska+ va fika va tshama kona va sungula ku fuma eDamaska. 25 U ve nala wa Vaisrayele masiku hinkwawo ya ku fuma ka Solomoni, a karhata Vaisrayele hilaha Hadada a endleke hakona, a a venga Vaisrayele loko a fuma tiko ra Siriya.
26 Nakambe a ku ri na Yerobuwamu+ n’wana wa Nebati, Muefrayimi wa le Sereda, loyi a ri nandza wa Solomoni,+ vito ra mana wakwe a ku ri Seruwa, loyi a nga noni. Na yena a sungula ku xandzukela hosi.+ 27 Mhaka leyi endleke a xandzukela hosi hi leyi: Solomoni a a ake Xitsunga*+ naswona a a pfale vangwa ra Muti wa Davhida tata wakwe.+ 28 Yerobuwamu a a ri jaha leri nga ni vuswikoti. Loko Solomoni a vona leswaku jaha leri ri tirha hi matimba, u ri endle mulanguteri+ wa hinkwavo lava a va leriseke leswaku va n’wi tirhela eka yindlu ya Yosefa. 29 Hi nkarhi wolowo Yerobuwamu u hume emutini wa Yerusalema, kutani a hlangana na muprofeta Ahiya+ wa le Xilo. Ahiya a a ambale nguvu leyintshwa, a vo va vambirhi enhoveni. 30 Ahiya a handzula nguvu leyintshwa leyi a yi ambarile yi va swiphemu swa 12. 31 A ku eka Yerobuwamu:
“Titekele swiphemu swa khume, hikuva Yehovha Xikwembu xa Israyele u te: ‘Ndzi handzula mfumo evokweni ra Solomoni, kutani ndzi ta ku nyika tinyimba ta khume.+ 32 Kambe yena u ta sala ni nyimba yin’we+ hikwalaho ka nandza wa mina Davhida+ ni hikwalaho ka Yerusalema, muti lowu ndzi wu hlawuleke etinyimbeni hinkwato ta Israyele.+ 33 Ndzi ta endla leswi hikwalaho ka leswi va ndzi siyeke+ va ya gandzela Axitoreti xikwembukati xa Vasidoni, Kemoxi xikwembu xa Vamowabu na Milikomo xikwembu xa Vaamoni, a va fambanga etindleleni ta mina hi ku endla leswinene ematihlweni ya mina ni hi ku yingisa milawu ya mina ni swiboho swa mina hilaha Davhida tata wakwe a endleke hakona. 34 Kambe a ndzi nge teki mfumo hinkwawo evokweni ra yena, ndzi ta n’wi tshika a ri ndhuna vutomi byakwe hinkwabyo, hikwalaho ka Davhida nandza wa mina loyi ndzi n’wi hlawuleke,+ hikuva u yingise swileriso swa mina ni milawu ya mina. 35 Ndzi ta teka vuhosi evokweni ra n’wana wakwe ndzi ku nyika byona, u ta fuma tinyimba ta khume.+ 36 N’wana wakwe ndzi ta n’wi nyika nyimba yin’we leswaku nandza wa mina Davhida a tshama a ri ni rivoni emahlweni ka mina eYerusalema,+ muti lowu ndzi tihlawuleleke wona leswaku ndzi veka vito ra mina eka wona. 37 Ndzi ta ku teka, u ta fuma hinkwaswo leswi u swi navelaka, u ta va hosi ya Israyele. 38 Loko wo yingisa hinkwaswo leswi ndzi ku lerisaka swona, u famba etindleleni ta mina, u endla leswi lulameke ematihlweni ya mina hi ku yingisa milawu ni swileriso swa mina, hilaha Davhida nandza wa mina a endleke hakona,+ ndzi ta va na wena. Ndzi ta endla leswaku vatukulu va wena va fuma nkarhi wo leha, hilaha ndzi endleke hakona eka Davhida,+ ndzi ta ku nyika Israyele. 39 Ndzi ta khomisa vatukulu va Davhida tingana hikwalaho ka leswi,+ kambe ku nga ri nkarhi hinkwawo.’”+
40 Hiloko Solomoni a ringeta ku dlaya Yerobuwamu, kambe Yerobuwamu a balekela eEgipta eka Xixaka+ hosi ya Egipta,+ u tshame kwalaho ku fikela loko Solomoni a fa.
41 Loko ku ri matimu ya Solomoni hinkwawo ni hinkwaswo leswi a swi endleke ni vutlhari byakwe, xana a swi tsariwanga ebukwini ya matimu ya Solomoni?+ 42 Solomoni u fume tiko hinkwaro ra Israyele a ri eYerusalema, ku ringana malembe ya 40. 43 Hiloko Solomoni a etlela ni vakokwa wakwe a lahliwa eMutini wa Davhida tata wakwe. Kutani Rehobuwama+ n’wana wakwe a sungula ku fuma.