Yeremiya

33 Yehovha a tlhela a vulavula na Yeremiya ra vumbirhi, loko a ha pfaleriwe eXivaveni* xa Murindzi+ a ku: 2 “Yehovha Muendli wa misava, Yehovha loyi a yi vumbeke a tlhela a yi simeka yi tiya; Yehovha i vito ra yena, u ri, 3 ‘Ndzi vitane ndzi ta ku hlamula, ndzi ku byela swilo leswikulu ni leswi nga twisisekiki, leswi u nga swi tivangiki.’”+

4 “Hikuva Yehovha Xikwembu xa Israyele u vula leswi mayelana ni tiyindlu ta muti lowu ni tiyindlu ta tihosi ta Yuda leti hirimuxiwaka hikwalaho ka makhumbi yo pfuna ku hlasela muti ni hikwalaho ka banga,+ 5 ni mayelana ni lava taka ku ta lwa ni Vakalidiya, va tata tindhawu leti hi mitsumbu ya vanhu lava ndzi va dlayeke hi ku hlundzuka ka mina ni hi vukarhi bya mina, lava vubihi bya vona byi nga endla leswaku ndzi tumbetela muti lowu xikandza xa mina: 6 ‘Ndzi endla leswaku a hola nileswaku a va ni rihanyo lerinene,+ ndzi ta va tshungula ni ku va paluxela ku rhula lokukulu ni ntiyiso.+ 7 Ndzi ta vuyisa mahlonga ya Yuda ni mahlonga ya Israyele,+ naswona ndzi ta va katekisa hilaha ndzi endleke hakona eku sunguleni.+ 8 Ndzi ta va basisa ndzi va rivalela swidyoho swa vona+ hinkwaswo ni ku tlula ka vona nawu wa mina.+ 9 Muti lowu wu ta ndzi endla ndzi tsaka loko ndzi twa vito ra wona, wu ta endla leswaku matiko hinkwawo ya misava lama twaka hi ta swilo hinkwaswo leswinene leswi ndzi swi endleleke vanhu va mina ma ndzi dzunisa ni ku ndzi vangamisa.+ Ma ta chava naswona ma ta rhurhumela+ hikwalaho ka vunene hinkwabyo ni ku rhula loku ndzi nga ta ku nyika muti lowu.’”+   

10 “Yehovha u ri: ‘Endhawini leyi, leyi mi nga ta vula leswaku i rhumbi a yi na munhu kumbe xifuwo, emitini ya Yuda ni le switarateni swa Yerusalema leswi nga rhumbi, leswi nga riki na munhu kumbe muaki kumbe xifuwo, ku ta tlhela ku twiwa 11 mpfumawulo wa ku khana ni wa ku tsaka,+ rito ra muteki ni ra mutekiwa, rito ra lava va nge: “Khensani Yehovha wa mavuthu, hikuva Yehovha hi lonene;+ rirhandzu rakwe lerikulu a ri heli!”’+

“‘Va ta tisa magandzelo yo khensa endlwini ya Yehovha,+ hikuva ndzi ta vuyisa mahlonga ya tiko leri ku fana ni le ku sunguleni,’ ku vula Yehovha.”

12 “Yehovha wa mavuthu u ri: ‘Etikweni leri, leri nga rhumbi, leri nga riki na munhu kumbe xifuwo ni le mitini hinkwayo ya rona, ku ta tlhela ku va ni madyelo lawa varisi va nga ta vundzisa mitlhambi ya vona.’+

13 “‘Emitini leyi nga endhawini ya tintshava, emitini leyi nga endhawini leyi nga rivala, emitini leyi nga edzongeni, etikweni ra Benjamini, etindhawini leti nga ekusuhi na Yerusalema+ ni le mitini ya Yuda,+ mitlhambi yi ta tlhela yi hundza ehansi ka mavoko ya loyi a yi hlayelaka,’ ku vula Yehovha.”

14 “‘Waswivo! Masiku ma ta,’ ku vula Yehovha, ‘lawa ndzi nga ta endla leswinene leswi ndzi swi tshembiseke mayelana ni tiko ra Israyele ni tiko ra Yuda.+ 15 Emasikwini wolawo ni le nkarhini wolowo ndzi ta hlukisela Davhida xihluke*+ xo lulama, xi ta kombisa vululami ni ku tshembeka etikweni.+ 16 Emasikwini wolawo Yuda u ta ponisiwa+ naswona Yerusalema u ta tshama a sirhelelekile.+ U ta vitaniwa hi ndlela leyi: Yehovha I Ku Lulama Ka Hina.’”+

17 “Hikuva Yehovha u ri: ‘Ku ta tshama ku ri ni munhu loyi a humaka endyangwini wa Davhida loyi a nga ta tshama exiluvelweni xa Israyele,+ 18 naswona eka vaprista lava nga Valevhi ku ta tshama ku ri ni munhu loyi a nga ta yima emahlweni ka mina a ndzi humesela magandzelo yo hisiwa, a hisa magandzelo ya mavele ni ku humesa magandzelo man’wana.’”

19 Yehovha a tlhela a vulavula na Yeremiya a ku: 20 “Yehovha u ri, ‘Loko mo tlula ntwanano wa mina mayelana ni nhlikanhi ni ntwanano wa mina mayelana ni vusiku, leswaku mi sivela nhlikanhi ni vusiku ku ta hi nkarhi lowu faneleke,+ 21 hi kona ntwanano wa mina lowu ndzi wu endleke na Davhida nandza wa mina wu nga ta tluriwa,+ leswaku a nga ha vi na n’wana loyi a nga hosi exiluvelweni xakwe,+ ni ntwanano lowu ndzi wu endleke ni vaprista lava nga Valevhi, vatirheli va mina wu ta tluriwa.+ 22 Tanihi leswi vuthu ra le matilweni ri nga hlayekiki ni sava ra lwandle ri nga pimekiki, hikwalaho ndzi ta andzisa vana* va Davhida nandza wa mina ni Valevhi lava ndzi tirhelaka.’”

23 Yehovha a tlhela a vulavula na Yeremiya a ku: 24 “Xana a wu swi twanga leswi vuriwaka hi vanhu lava va ku, ‘Yehovha u ta fularhela mindyangu leyimbirhi leyi a yi hlawuleke’? Va khoma vanhu va mina hi ndlela leyi nga kombisiki xichavo naswona a va ha va teki va ri tiko.

25 “Yehovha u ri: ‘Tanihi leswi ndzi simekeke ntwanano wa mina mayelana ni nhlikanhi ni vusiku,+ milawu ya tilo ni misava,+ 26 hikwalaho a ndzi nge va tshiki vana* va Yakobo ni va Davhida nandza wa mina naswona eka vana va yena ndzi ta teka vanhu lava nga ta fuma vana va Abrahama, Isaka na Yakobo. Hikuva ndzi ta hlengeleta mahlonga ya vona+ ndzi ma twela vusiwana.’”+