Yeremiya
19 Yehovha u te: “Famba u ya xava gula ra vumba eka muvumbi.+ Teka van’wana va vakulukumba va vanhu ni van’wana va vakulukumba va vaprista, 2 u ya eNkoveni wa N’wana wa Hinomu,+ endhawini yo nghena ha yona eGedeni ya Swirhengele. U fika u vula leswi ndzi nga ta ku byela swona. 3 U ta ku, ‘Twanani rito ra Yehovha, n’wina tihosi ta Yuda na n’wina vaaki va Yerusalema. Yehovha wa mavuthu, Xikwembu xa Israyele u ri:
“‘“Ndzi ta tisa khombo ku nga ri khale endhawini leyi naswona un’wana ni un’wana loyi a nga ta twa ha rona tindleve takwe ti ta hlohlonya. 4 Hikwalaho ka leswi va ndzi fularheleke+ ni hileswi va endleke leswaku ndzi nga ha swi koti ku yi tiva ndhawu leyi.+ Eka yona va endlela swikwembu swin’wana magandzelo, leswi vona ni vakokwa wa vona ni tihosi ta Yuda va nga swi tivangiki naswona va tate ndhawu leyi hi ngati ya vanhu lava nga riki na nandzu.+ 5 Va ake tindhawu leti tlakukeke ta Bali, leswaku va hisa vana va vona endzilweni va va magandzelo yo hisiwa eka Bali,+ ku nga nchumu lowu ndzi nga wu lerisangiki kumbe ku vulavula ha wona ni lowu wu nga si tshamaka wu ta embilwini ya mina.”’*+
6 “‘“Hikwalaho waswivo, masiku ma ta,” ku vula Yehovha, “lawa ndhawu leyi yi nga ta ka yi nga ha vitaniwi Tofete kumbe Nkova wa N’wana wa Hinomu kambe yi ta vitaniwa Nkova wa ku Dlaya.+ 7 Ndzi ta herisa makungu ya Yuda na Yerusalema endhawini leyi, ndzi ta va herisa hi banga emahlweni ka valala va vona ni hi voko ra lava lavaka ku va dlaya. Mitsumbu ya vona ndzi ta yi nyika swinyenyana ni swivandzana leswaku yi va swakudya swa swona.+ 8 Ndzi ta endla muti lowu wu va nchumu lowu chavisaka ni nchumu wo beriwa noti. Un’wana ni un’wana loyi a hundzaka hi le ka wona u ta wu languta a chava kutani a ba noti hikwalaho ka makhombo ya wona hinkwawo.+ 9 Ndzi ta endla leswaku va dya nyama ya vana va vona va majaha ni vanhwanyana naswona un’wana ni un’wana u ta dya nyama ya munhukulobye, hikwalaho ka ku rhendzeriwa ka muti ni ku xaniseka ka vona loko va rhendzeriwe hi valala va vona ni lava lavaka ku va dlaya.”’+
10 “Kutani faya gula emahlweni ka vanhu lava fambaka na wena, 11 u va byela u ku, ‘Yehovha wa mavuthu u ri: “Leyi i ndlela leyi ndzi nga ta va faya ha yona vanhu lava ni muti lowu, ku fana ni munhu loyi a fayaka xibya xa muvumbi lerova xi nga ha lunghiseki; naswona va ta lahla vafi eTofete ku fikela loko ndhawu yo va lahla yi nga ha ri kona.”’+
12 “‘Sweswo hi leswi ndzi nga ta swi endla endhawini leyi,’ ku vula Yehovha, ‘ni le ka vaaki va yona, ndzi ta endla muti lowu wu fana na Tofete. 13 Tiyindlu ta Yerusalema ni tiyindlu ta tihosi ta Yuda ti ta va leti nga basangiki ku fana ni ndhawu leyi ya Tofete,+ tiyindlu hinkwato leti ku endleriweke magandzelo eka tona emalwangwini ya tona, ma endleriwa vuthu hinkwaro ra le matilweni+ ni laha va chululeleke swikwembu swin’wana magandzelo ya swakunwa.’”+
14 Loko Yeremiya a vuya hi le Tofete laha Yehovha a a n’wi rhume kona leswaku a ya profeta, u yime exivaveni* xa yindlu ya Yehovha kutani a byela vanhu hinkwavo a ku: 15 “Yehovha wa mavuthu, Xikwembu xa Israyele u ri, ‘Emutini lowu ni le swimitanini swa wona hinkwaswo ndzi tisa khombo leri ndzi vulavuleke ha rona, hikuva va tiomise tinhloko va ala* ku yingisa marito ya mina.’”+