Yeremiya

27 Eku sunguleni ka ku fuma ka Yoyakimi n’wana wa Yosiya hosi ya le Yuda, rito leri ri fike eka Yeremiya ri huma eka Yehovha: 2 “Yehovha u ndzi byele a ku, ‘Tiendlele tintambu ni majoko, u swi veka enhan’wini ya wena. 3 U swi rhumela eka hosi ya le Edomu,+ hosi ya le Mowabu,+ hosi ya Vaamoni,+ hosi ya le Tiri+ ni hosi ya le Sidoni+ hi ku tirhisa varhumiwa lava teke eYerusalema eka Hosi Sedekiyasi wa le Yuda. 4 Va nyike xileriso lexi, lexi yaka eka tihosi ta vona, u ku:

“‘“Yehovha wa mavuthu, Xikwembu xa Israyele, u ri; mi fanele mi byela tihosi ta n’wina mi ku, 5 ‘Hi mina loyi a endleke misava, vanhu ni swiharhi leswi nga ehenhla ka misava hi matimba ya mina lamakulu ni hi voko ra mina leri tshambulutekeke; naswona ndzi swi nyike un’wana ni un’wana loyi ndzi n’wi tsakelaka.*+ 6 Kutani sweswi matiko lawa hinkwawo ndzi ma nyikete eka Hosi Nebukadnetsara+ wa le Babilona, nandza wa mina; ndzi n’wi nyike hambi ku ri swiharhi leswaku swi n’wi tirhela. 7 Matiko hinkwawo ma ta tirhela yena, n’wana wakwe ni ntukulu wakwe ku fikela loko mfumo wakwe wu herisiwa,+ loko matiko yo tala ni tihosi letikulu ti n’wi endla hlonga ra tona.’+

8 “‘“‘Loko mfumo wihi ni wihi kumbe tiko rihi ni rihi ri ala ku tirhela Hosi Nebukadnetsara wa le Babilona naswona ri ala ku tlhandleka joko ra hosi ya le Babilona enhan’wini ya rona, ndzi ta ri xupula hi banga,+ hi ndlala ni hi ntungu,’* ku vula Yehovha, ‘ku fikela loko ndzi va heta hi voko rakwe.’

9 “‘“‘Hikwalaho, mi nga va yingisi vaprofeta va n’wina, vanhu lava hlahluvaka, vanhu lava mi byelaka milorho ya vona, vanhu lava endlaka masalamusi ni valoyi, lava mi byelaka va ku: “A mi nge yi tirheli hosi ya le Babilona.” 10 Hikuva va mi profetela mavunwa, leswaku mi ta susiwa etikweni ra n’wina mi yisiwa ekule naswona ndzi ta mi hangalasa kutani mi ta lova.

11 “‘“‘Kambe tiko leri nga ta tlhandleka joko ra hosi ya le Babilona enhan’wini ya rona ri tlhela ri yi tirhela, a ndzi nge ri susi etikweni ra rona,’ ku vula Yehovha, ‘leswaku ri ri rima ri tlhela ri tshama eka rona.’”’”

12 Hambi ku ri Hosi Sedekiyasi+ wa le Yuda ndzi n’wi byele leswi fanaka, ndzi ku: “Tlhandlekani joko ra hosi ya le Babilona etinhan’wini ta n’wina, mi yi tirhela swin’we ni vanhu va yona kutani mi ta ya emahlweni mi hanya.+ 13 Hikwalaho ka yini wena ni vanhu va wena mi fanele mi dlayiwa hi banga,+ hi ndlala+ ni hi ntungu+ hilaha Yehovha a vuleke hakona mayelana ni tiko leri nga taka ri nga yi tirheli hosi ya le Babilona? 14 Mi nga ma yingisi marito ya vaprofeta lava mi byelaka va ku, ‘A mi nge yi tirheli hosi ya le Babilona,’+ hikuva va mi profetela mavunwa.+

15 “‘Hikuva a ndzi va rhumanga,’ ku vula Yehovha, ‘kambe va profeta mavunwa hi vito ra mina, hikwalaho ndzi ta mi hangalasa naswona mi ta lova, n’wina ni vaprofeta lava mi profetelaka.’”+

16 Eka vaprista ni vanhu lava hinkwavo ndzi te: “Yehovha u ri, ‘Mi nga ma yingisi marito ya vaprofeta va n’wina lava mi profetelaka va ku: “Maswivo! Swibya swa yindlu ya Yehovha swi ta vuyisiwa swi suka eBabilona ku nga ri khale,”+ hikuva va mi profetela mavunwa.+ 17 Mi nga va yingisi. Tirhelani hosi ya Babilona kutani mi ta ya emahlweni mi hanya.+ Hikwalaho ka yini muti lowu wu fanele wu va rhumbi? 18 Kambe loko va ri vaprofeta niloko Yehovha a vulavula na vona hakunene, ndzi kombela leswaku va kombela Yehovha wa mavuthu leswaku swibya leswi saleke endlwini ya Yehovha, endlwini ya hosi ya le Yuda ni le Yerusalema swi nga tekiwi swi yisiwa eBabilona.’

19 “Hikuva Yehovha wa mavuthu u vula leswi mayelana ni tiphuphu,+ thangi ra mati,*+ swigolonyana+ ni swibya leswi saleke emutini lowu, 20 leswi Hosi Nebukadnetsara wa le Babilona a nga swi tekangiki loko a teka Yekoniya n’wana wa Yoyakimi, hosi ya le Yuda, a n’wi yisa evuhlongeni eBabilona ku suka eYerusalema swin’we ni tindhuna hinkwato ta le Yuda ni ta le Yerusalema;+ 21 Yehovha wa mavuthu, Xikwembu xa Israyele, u vula leswi mayelana ni swibya leswi saleke endlwini ya Yehovha, endlwini ya hosi ya le Yuda ni le Yerusalema: 22 ‘“Swi ta yisiwa eBabilona+ naswona swi ta tshama kona ku fikela siku leri ndzi nga ta swi tsundzuka ha rona,” ku vula Yehovha. “Kutani ndzi ta swi tlherisela endhawini leyi.”’”+