Samuwele Wo Sungula
3 Nkarhi lowu hinkwawo, mufana Samuwele a a tirhela+ Yehovha emahlweni ka Eli, kambe rito leri humaka eka Yehovha a ri kala emasikwini wolawo; swivono+ a ku nga vulavuriwi hi swona.
2 Siku rin’wana Eli a a etlele ekamareni rakwe naswona matihlo yakwe a ma ri ni riphume; a a nga ha voni kahle.+ 3 Rivoni ra Xikwembu+ a ri nga si timiwa naswona Samuwele a a etlele etempeleni*+ ya Yehovha laha Areka ya Xikwembu a yi ri kona. 4 Hiloko Yehovha a vitana Samuwele. Kutani yena a ku: “Hi mina loyi.” 5 A tsutsumela eka Eli, a fika a ku: “Hi mina loyi, hikuva u ndzi vitanile.” Kambe yena a ku: “A ndzi ku vitananga. Tlhela u ya etlela.” Kutani a tlhela a ya etlela. 6 Yehovha a tlhela a n’wi vitana a ku: “Samuwele!” Hiloko Samuwele a pfuka a ya eka Eli, a ku: “Hi mina loyi, hikuva u ndzi vitanile.” Kambe yena a ku: “A ndzi ku vitananga n’wananga. Tlhela u ya etlela.” 7 (Enkarhini wolowo Samuwele a a nga si n’wi tiva Yehovha naswona a a nga si tshama a twa Yehovha a vulavula na yena.)+ 8 Yehovha a tlhela a n’wi vitana ra vunharhu a ku: “Samuwele!” Hiloko a pfuka a ya eka Eli, a ku: “Hi mina loyi, hikuva u ndzi vitanile.”
Kutani Eli a swi xiya leswaku a ku ri Yehovha loyi a a vitana mufana loyi. 9 Hikwalaho Eli a byela Samuwele a ku: “Famba u ya etlela, loko a ku vitana, u fanele u ku, ‘Vulavula Yehovha, hikuva nandza wa wena u yingisile.’” Kutani Samuwele a famba a ya etlela laha a a etlele kona.
10 Yehovha a ta a fika a yima kwalaho, kutani a tlhela a vitana ku fana ni le ku sunguleni a ku: “Samuwele, Samuwele!” Hiloko Samuwele a ku: “Vulavula, hikuva nandza wa wena u yingisile.” 11 Yehovha a byela Samuwele a ku: “Vona! Ndzi endla nchumu wo karhi eIsrayele lowu loko munhu a wu twa tindleve takwe ti nga ta hlohlonya.+ 12 Hi siku rero ndzi ta endla eka Eli hinkwaswo leswi ndzi swi vuleke hi ndyangu wakwe, ku sukela eku sunguleni ku ya fika emakumu.+ 13 U fanele u n’wi byela leswaku ndzi ta wu avanyisela makumu ndyangu wakwe hikwalaho ka xidyoho lexi a xi tivaka,+ hikuva vana vakwe va rhukana Xikwembu+ kambe a nga va tshinyanga.+ 14 Hi yona mhaka leyi ndzi hlambanyeleke ndyangu wa Eli leswaku xidyoho xa ndyangu wa Eli a xi nge pfuki xi rivaleriwile hi magandzelo.”+
15 Samuwele a etlela ku fikela nimixo; kutani a pfula tinyangwa ta yindlu ya Yehovha. Samuwele a a chava ku byela Eli xivono lexi a xi voneke. 16 Kambe Eli a vitana Samuwele a ku: “Samuwele n’wananga!” Hiloko a ku: “Hi mina loyi.” 17 A n’wi vutisa a ku: “Xana u ku byele yini? Ndzi kombela u nga ndzi fihleli. Xikwembu a xi ku xupule swinene loko wo ndzi fihlela hambi ku ri rito rin’we ra hinkwawo lama a ma vuleke.” 18 Hiloko Samuwele a n’wi byela hinkwaswo, a nga n’wi fihlelanga nchumu. Eli a ku: “I Yehovha. A a endle leswi nga swinene ematihlweni yakwe.”
19 Samuwele a ya emahlweni a kula naswona Yehovha a va na yena,+ u endle hinkwaswo leswi a swi vuleke. 20 Tiko hinkwaro ra Israyele ku sukela eDani ku ya eBera-xeba ri swi lemuka leswaku Samuwele a ku ri yena loyi a vekiweke ku va muprofeta wa Yehovha. 21 Hiloko Yehovha a ya emahlweni a humelela eXilo, hikuva hi kona laha Yehovha a titiviseke kona eka Samuwele, hi rito ra Yehovha.+