Ezekiyele
47 Hiloko a ndzi tlherisela laha ku ngheniwaka ha kona+ etempeleni naswona kwalaho ndzi vone mati ma khuluka ma ya evuxeni ma huma ehansi ka ndhawu yo nghena ha yona etempeleni,+ hikuva tlhelo ra le mahlweni ra tempele a ri langute evuxeni. Mati a ma khuluka ma huma ehansi etlhelweni ra xinene ra tempele, edzongeni wa altari.
2 Endzhaku ka sweswo a ndzi humesa hi gede ya le n’walungwini,+ a ndzi humesela ehandle a ndzi rhendzelekisa ndzi ya egedeni ya le handle leyi languteke evuxeni,+ kutani ndzi vona mati ma khuluka katsongo hi le tlhelweni ra xinene.
3 Loko wanuna loyi a ya etlhelweni ra le vuxeni a khome ntambhu yo pima ha yona,+ a pima swisungunu swa 1 000* kutani a ndzi tsemakanyisa ematini; mati a ma fika emahlakaleni ya milenge.
4 Hiloko a tlhela a pima swisungunu swa 1 000 kutani a ndzi tsemakanyisa ematini, a ma fika ematsolweni.
A tlhela a pima swisungunu swa 1 000 kutani a ndzi tsemakanyisa, mati a ma fika emasengeni.
5 Loko a tlhela a pima swisungunu swa 1 000, a ku ri xinambyana lexi a ndzi nga swi koti ku xi tsemakanya, hikuva mati ya kona a ma entile swinene lerova munhu a a fanele a hlambela kunene, a ku ri xinambyana lexi a xi nga tsemakanyeki hi milenge.
6 Hiloko a ndzi vutisa a ku: “Xana u swi vonile leswi, n’wana wa munhu?”
Kutani a ndzi fambisa ndzi tlhelela eribuweni ra xinambyana. 7 Loko ndzi tlhelela, ndzi xiye leswaku a ku ri ni mirhi yo tala swinene ematlhelo hamambirhi ya ribuwa ra xinambyana.+ 8 Hiloko a ku eka mina: “Mati lawa ma khulukela exifundzheni xa le vuxeni kutani ma famba ma ya fika eArabha*+ kutani ma nghena elwandle. Loko ma nghene elwandle,+ mati ya kona ma ta hundzuka yo nandziha.* 9 Swivumbiwa leswi hanyaka leswi fambaka swi tele swi ta kota ku hanya kun’wana ni kun’wana laha mati* lawa ma khulukelaka kona. Ku ta va ni tihlampfi to tala swinene hikuva mati lawa ma ta khulukela kwalaho. Mati ya lwandle ma ta hundzuka yo nandziha* naswona swilo hinkwaswo swi ta hanya kun’wana ni kun’wana laha xinambyana lexi xi khulukelaka kona.
10 “Vaphasi va tihlampfi va ta yima etlhelo ka rona ku suka eEni-gedi+ ku ya fika eEni-gilayimu, laha ku nga ta va ni ndhawu yo omisa tinete. Ku ta va ni tihlampfi to tala swinene ta mixakaxaka, ku fana ni tihlampfi ta le Lwandle Lerikulu.*+
11 “Ri ta va ni tindhawu leti nga nhlangasi ni tindhawu leti nga ndzhope, kutani tindhawu leti ti ta tshamisa sweswo.* Ti ta tshama ti ri ni munyu.+
12 “Ematlhelo hamambirhi ya ribuwa ra xinambyana ku ta mila mirhi ya mixaka hinkwayo ya mihandzu. Matluka ya yona a ma nge vuni; ni mihandzu ya yona a yi nge heli. N’hweti ni n’hweti yi ta tswala mihandzu leyintshwa hikuva mati ya yona ma khuluka ma huma endhawini yo kwetsima.+ Mihandzu ya yona yi ta dyiwa ni matluka ya yona ma ta va yo hanyisa.”+
13 Yehovha Hosi Leyi Tlakukeke u ri: “Leyi i ndhawu leyi mi nga ta yi avela tinyimba ta 12 ta Israyele yi va tiko leri nga ndzhaka ya tona naswona Yosefa u ta kuma swiphemu swimbirhi.+ 14 Yi ta va ndzhaka ya n’wina naswona mi ta kuma tindhawu to ringana. Ndzi hlambanyile leswaku tiko leri ndzi ta ri nyika vakokwa+ wa n’wina kutani sweswi ri nyikiwa n’wina ri va ndzhaka.
15 “Lowu i ndzilakana wa tiko etlhelo ra le n’walungwini: Wu sukela eLwandle Lerikulu hi ndlela leyi yaka eHetiloni+ ku ya eSedada,+ 16 eHamati,+ eBerota+ ni le Sibrayimi, lowu nga exikarhi ka tiko ra Damaska ni tiko ra Hamati ku ya eHasere-hatikoni lowu nga ekusuhi ni ndzilakana wa Hawurana.+ 17 Kutani ndzilakana lowu wu ta sukela elwandle wu ya eHasara-enana,+ wu famba endzilakaneni wa Damaska wu ya en’walungwini ni le ndzilakaneni wa Hamati.+ Lowu i ndzilakana wa le n’walungwini.
18 “Tlhelo ra le vuxeni ri sukela exikarhi ka Hawurana na Damaska na le Yordani exikarhi ka Giliyadi+ ni tiko ra Israyele. Mi fanele mi pima ku suka endzilakaneni ku ya elwandle ra le vuxeni.* Lowu i ndzilakana wa le vuxeni.
19 “Ndzilakana wa le dzongeni* wu ta sukela eTamari ku ya ematini ya Meribati-kadexi,+ kutani wu ya eNkoveni* wu ya fika eLwandle Lerikulu.+ Lowu i ndzilakana wa le dzongeni.*
20 “Lwandle Lerikulu ri le tlhelo ra vupeladyambu, ku suka endzilakaneni ku ya endhawini leyi langutaneke na Lebo-hamati.*+ Lowu i ndzilakana wa le vupeladyambu.”
21 “Mi ta avelana tiko leri hi ku ya hi tinyimba ta 12 ta Israyele. 22 Mi fanele mi avelana rona ri va ndzhaka mi tlhela mi avela vanhu lava humaka ematikweni man’wana lava tshamaka na n’wina lava veke ni vana loko va ha tshama na n’wina; naswona va ta fana ni Vaisrayele eka n’wina. Va ta kuma ndzhaka exikarhi ka tinyimba ta Israyele swin’we na n’wina. 23 Mi fanele mi nyika munhu loyi a humaka etikweni rin’wana ndzhaka emugangeni wa ndyangu lowu a tshamaka eka wona,” ku vula Yehovha Hosi Leyi Tlakukeke.