Tihosi Ta Vumbirhi

20 Emasikwini wolawo Hezekiya a vabyela ku fa.+ Hiloko muprofeta Esaya n’wana wa Amotsi a ya eka yena a fika a ku, “Yehovha u ri: ‘Nyika vandyangu wa wena swileriso hikuva u ta fa; a wu nge holi.’”+ 2 Loko a twa sweswo a hundzuluka a languta ekhumbini kutani a sungula ku khongela eka Yehovha a ku: 3 “Yehovha Xikwembu xanga, ndzi kombela u tsundzuka ndlela leyi ndzi ku tirheleke ha yona hi ku tshembeka ni hi mbilu hinkwayo naswona ndzi endle leswinene emahlweni ka wena.”+ Kutani Hezekiya a sungula ku rila hi xiviti.

4 Esaya a a nga si fika eka xivava* xa le xikarhi loko Yehovha a ku eka yena:+ 5 “Tlhela u ya byela Hezekiya murhangeri wa vanhu va mina u ku, ‘Yehovha Xikwembu xa Davhida kokwa wa wena u ri: “Xikhongelo xa wena ndzi xi twile. Ndzi yi vonile ni mihloti ya wena.+ Kutani ndza ku hanyisa.+ U ta ya endlwini ya Yehovha hi siku ra vunharhu.+ 6 Ndzi ta engetela masiku ya wena ya ku hanya hi malembe ya 15 naswona ndzi ta ku ponisa wena ni muti lowu eka hosi ya Asiriya,+ ndzi ta sirhelela muti lowu hikwalaho ka mina ni hikwalaho ka nandza wa mina Davhida.”’”+

7 Hiloko Esaya a ku: “Tisani khekhe leri endliweke hi makuwa lama omisiweke.” Va ri tisa kutani va ri bohelela ehenhla ka rhumba, endzhaku ka sweswo, Hezekiya a hola hakatsongotsongo.+

8 Hezekiya a a vutise Esaya a ku: “Ndzi ta swi tivisa ku yini+ leswaku Yehovha u ta ndzi horisa nileswaku ndzi ta ya endlwini ya Yehovha hi siku ra vunharhu?” 9 Esaya a ku: “Hi lexi xikombiso lexi humaka eka Yehovha lexi nga ta ku komba leswaku Yehovha u ta swi endla leswi a swi vuleke: Xana u lava leswaku ndzhuti lowu nga kona eswitepisini* wu ya emahlweni kumbe wu ya endzhaku hi magoza ya khume?”+ 10 Hezekiya a ku: “Swa olova leswaku ndzhuti wu ya emahlweni hi magoza ya khume, kambe ku nga ri leswaku wu ya endzhaku hi magoza ya khume eswitepisini.” 11 Hiloko muprofeta Esaya a khongela eka Yehovha, kutani A endla leswaku ndzhuti lowu a wu ri eswitepisini swa Akazi, wu tlhelela endzhaku hi magoza ya khume hambileswi se a wu hundzile eswitepisini swoleswo.+

12 Hi nkarhi wolowo hosi ya Babilona, Berodaka-baladani n’wana wa Baladani, a rhumela mapapila ni nyiko eka Hezekiya, hikuva a a swi twile leswaku Hezekiya a a vabya.+ 13 Hezekiya a va amukela kutani a va komba laha a vekaka kona xuma,+ silivhere, nsuku, mafurha ya balsama, mafurha man’wana ya nkoka, matlhari yakwe ni swilo hinkwaswo leswi a swi ri laha a hlayiselaka kona xuma. Ku hava nchumu lowu Hezekiya a nga va kombangiki wona endlwini* yakwe ni le mfun’weni wakwe hinkwawo.

14 Endzhaku ka sweswo, muprofeta Esaya a ya eka Hosi Hezekiya a fika a n’wi vutisa a ku: “Xana vavanuna lava va te yini naswona va huma kwihi?” Hiloko Hezekiya a ku: “Va huma etikweni ra le kule, eBabilona.”+ 15 A tlhela a vutisa a ku: “Va vone yini endlwini ya wena?” Hezekiya a ku: “Va vone swilo hinkwaswo leswi nga endlwini* ya mina. Ku hava nchumu ni wun’we lowu ndzi nga va kombangiki wona laha ndzi vekaka kona xuma.”

16 Hiloko Esaya a byela Hezekiya a ku: “Twana leswi Yehovha a swi vulaka,+ 17 ‘Yingisa! Masiku ma ta naswona hinkwaswo leswi nga endlwini* ya wena ni hinkwaswo leswi vakokwa wa wena va swi siyeke ku fikela namuntlha, swi ta rhwariwa swi yisiwa eBabilona.+ A ku nge sali nchumu,’ ku vula Yehovha. 18 ‘Naswona van’wana va vana va wena, va ta tekiwa+ va ya tirha ehubyeni endlwini ya vuhosi eBabilona.’”+

19 Hiloko Hezekiya a byela Esaya a ku: “Leswi Yehovha a ku byeleke swona i swinene.”+ A tlhela a ku: “I swinene loko ku ta va ni ku rhula ni ntshamiseko* loko ndza ha hanya.”+

20 Loko ku ri matimu ya Hezekiya hinkwawo, mitirho yakwe hinkwayo ni ndlela leyi a akeke damu+ ni mugerho wo tisa mati emutini,+ xana a swi tsariwanga ebukwini ya matimu ya tihosi ta Yuda? 21 Hiloko Hezekiya a fa, a lahliwa ni vakokwa wakwe;+ kutani Manase+ n’wana wakwe a va hosi.+