Tihosi Ta Vumbirhi
2 Loko Yehovha a ri kusuhi ni ku teka Eliya+ hi xidzedze+ leswaku a ya etilweni, Eliya na Elixa+ va sukile eGiligala.+ 2 Hiloko Eliya a ku eka Elixa: “Ndzi kombela u sala laha, hikuva Yehovha u ndzi rhume eBethele.” Kambe Elixa a ku: “Ndza hlambanya hi Yehovha Xikwembu lexi hanyaka na hi wena leswaku ndzi famba na wena.” Kutani va ya eBethele.+ 3 Hiloko vana va vaprofeta* lava a va ri eBethele va ya eka Elixa, va fika va ku eka yena: “Xana wa swi tiva leswaku namuntlha Yehovha u ta teka n’wini wa wena naswona a nge he vi murhangeri wa wena?”+ Yena a ku: “Ndza swi tiva. Miyelani.”
4 Kutani Eliya a tlhela a ku eka yena: “Elixa, ndzi kombela u sala laha, hikuva Yehovha u ndzi rhume eYeriko.”+ Kambe Elixa a ku: “Ndza hlambanya hi Yehovha Xikwembu lexi hanyaka na hi wena leswaku ndzi famba na wena.” Kutani va ya eYeriko. 5 Hiloko vana va vaprofeta lava a va ri eYeriko va ya eka Elixa, va fika va ku: “Xana wa swi tiva leswaku namuntlha Yehovha u ta teka n’wini wa wena naswona a nge he vi murhangeri wa wena?” Yena a ku: “Ndza swi tiva. Miyelani.”
6 Hiloko Eliya a ku eka yena: “Ndzi kombela u sala laha, hikuva Yehovha u ndzi rhume eYordani.” Kambe yena a ku: “Ndza hlambanya hi Yehovha Xikwembu lexi hanyaka na hi wena leswaku ndzi famba na wena.” Kutani va ya emahlweni havambirhi. 7 Hiloko vana va 50 va vaprofeta na vona va famba va fika va yima laha a va kota ku vona ekule loko lavambirhi va yime eYordani. 8 Kutani Eliya a teka xiambalo xakwe xa vuprofeta+ a xi petsa ivi a ba mati hi xona, mati ma avana ma ya eximatsini ni le xineneni, lerova havambirhi ka vona va tsemakanya emisaveni leyi omeke.+
9 Hi ku hatlisa loko va ha ku tsemakanya, Eliya a ku eka Elixa: “Kombela lexi u lavaka ndzi ku endlela xona ndzi nga si tlakuriwa ndzi ku siya.” Kutani Elixa a ku: “Ndzi kombela ku nyikiwa swiphemu swimbirhi+ swa moya wa wena.”+ 10 A n’wi hlamula a ku: “U kombele nchumu wo tika. Loko wo ndzi vona loko ndzi tlakuriwa ndzi ku siya, swi ta endleka eka wena hi ndlela yoleyo; kambe loko wo ka u nga ndzi voni, a swi nge endleki.”
11 Kuteloko va ha famba, va ri karhi va vulavula, hi xitshuketa ku humelela kalichi leyi pfurhaka ndzilo,+ yi ri ni tihanci leti pfurhaka ndzilo, swi fika swi va hambanisa, kutani Eliya a tlhandlukela etilweni hi xidzedze.+ 12 Elixa a a ri karhi a huwelela a langutile a ku: “Tatana, tatana! Kalichi ya Israyele ni vagadi vakwe va tihanci!”+ Loko a nga ha n’wi voni, a khoma swiambalo swakwe a swi handzula hi le xikarhi.+ 13 Endzhaku ka sweswo, a teka xiambalo xa vuprofeta+ xa Eliya lexi n’wi weleke a tlhelela endzhaku a ya yima eribuweni ra Yordani. 14 Hiloko a teka xiambalo xa vuprofeta xa Eliya lexi n’wi weleke, a ba mati kutani a ku: “Xana u kwihi Yehovha Xikwembu xa Eliya?” Loko a ba mati, ma avanile ma ya eximatsini ni le xineneni, kutani Elixa a tsemakanya.+
15 Loko vana va vaprofeta lava a va ri eYeriko va n’wi vona a ha ri ekule va ku: “Moya wa Eliya se wu le ka Elixa.”+ Hiloko va n’wi hlanganisa, va fika va khinsama emahlweni ka yena. 16 Va ku eka yena: “Hi lava vavanuna va 50 lava nga ni vuswikoti lava nga ni malandza ya wena. Hi kombela u va rhuma va ya lava n’wini wa wena. Kumbexana moya wa Yehovha wu n’wi tlakule wu ya n’wi lahlela eka yin’wana ya tintshava kumbe eka wun’wana wa mikova.”+ Kambe a ku: “Mi nga va rhumi.” 17 Hambiswiritano, va ya emahlweni va n’wi kombela kukondza a khomiwa hi tingana kutani a ku: “Va rhumeni.” Hiloko va rhuma vavanuna va 50, lava n’wi laveke masiku manharhu, kambe a va n’wi kumanga. 18 Loko va tlhelela eka yena, a a tshama eYeriko.+ Kutani a ku eka vona: “Xana a ndzi mi byelanga leswaku mi nga yi?”
19 Hi ku famba ka nkarhi vavanuna va muti va byela Elixa va ku: “N’wini wanga wa swi vona leswaku muti lowu i wunene;+ kambe mati ya kona a hi manene ni misava ya kona a yi humesi nchumu loko ku byariwa.”* 20 Hiloko a ku: “Ndzi tiseleni xibya lexitsongo lexintshwa mi tlhela mi chela munyu eka xona.” Hiloko va n’wi tisela xona. 21 Kutani a ya exihlobyeni, a fika a chela munyu eka xona+ a ku: “Yehovha u ri, ‘Ndzi ma basisile mati lawa. A ma nge he vangeli vanhu rifu kumbe ku va pfala mbeleko.’”* 22 Mati ya kona ma ha ri manene ku ta fikela ninamuntlha, hilaha Elixa a vuleke hakona.
23 Hiloko a suka kwalaho a ya eBethele. Loko a ri karhi a famba, swifanyetana swin’wana leswi a swi ri emutini swi huma,+ kutani swi n’wi rhuketela hi ku phindhaphindha swi ku: “Tlhandluka wena mpandlana! Tlhandluka wena mpandlana!” 24 Eku heteleleni a hundzuluka a swi languta a swi rhukana hi vito ra Yehovha. Hiloko ku humelela tibere timbirhi ta matswele+ ekhwatini, ti fika ti phatlulela vana lava a va ri 42.+ 25 U ye emahlweni a famba ku suka kwalaho a ya eNtshaveni ya Karimeli+ loko a suka kwalaho u tlhelele eSamariya.