Yobo
4 Hiloko Elifazi+ wa le Temani a hlamula a ku:
2 “Loko munhu a lava ku vulavula na wena, xana u ta n’wi helela mbilu?
Hikuva i mani la nga miyelaka a nga vulavuli?
3 I ntiyiso leswaku wena u lulamise vo tala,
Naswona a wu hamba u tiyisa lava tsaneke.
4 Marito ya wena a ma pfuxa un’wana ni un’wana la khugukaka,
Naswona a wu tiyisa lava matsolo ya vona ma ngundlangundlaka.
5 Kambe sweswi swi endleke eka wena kutani u hela mbilu;
Swa ku khumba kutani u hela matimba.
6 Xana a wu na ntshembo hileswi u chavaka Xikwembu?
Xana ku tshembeka ka wena+ a ku ku nyiki ntshembo?
7 Ndzi kombela u tsundzuka: Hi wihi munhu la nga riki na nandzu la tshameke a lovisiwa?
Hi rini laha ku tshameke ku lovisiwa munhu wo lulama?
8 Leswi ndzi swi voneke hileswaku lava byalaka* swo biha
Ni lava byalaka maxangu va ta tshovela leswi fanaka.
9 Va fa loko Xikwembu xi hefemula,
Naswona va lova loko xi va hlundzukela.
10 Nghala ya bonga ni xinghalana xa mpfhumpfha,
Kambe hambi ku ri matino ya tinghala ta matimba ma tshoveka.
11 Nghala ya fa hikwalaho ka ndlala,
Ni vana va nghala va hangalasiwa.
12 Ndzi byeriwe rito exihundleni,
Ndzi hleveriwe rona endleveni ya mina.
13 Hi nkarhi wa mianakanyo leyi karhataka, eswivonweni swa nivusiku,
Loko vanhu va ha etlele vurhongo lebyikulu,
14 Ndzi sungule ku rhurhumela swinene,
Marhambu ya mina hinkwawo ma sungula ku chava.
15 Ku hundze moya exikandzeni xa mina;
Misisi ya mina yi yima.
16 Wu fika wu yima wu nga fambi,
Kambe a ndzi nga koti ku twisisa xivumbeko xa wona.
A ku ri ni ndzhuti emahlweni ka mina;
Hiloko ku ku whii, ivi ndzi twa rito ri ku:
17 ‘Xana munhu a nga va la lulameke ku tlula Xikwembu?
Xana munhu a nga basa ku tlula Muendli wakwe?’
18 Vona! A xi ma tshembi malandza ya xona,
Naswona xi kuma swihoxo eka tintsumi ta xona.
19 A ndza ha vuli lava tshamaka etindlwini ta vumba,
Lava endliweke hi ntshuri,+
Lava phyandlasiwaka hi ku olova ku fana ni nsumba!
20 Va pfotloseriwa makumu ku sukela nimixo ku fikela nimadyambu;
Va loviseriwa makumu naswona a ku na loyi a nga na mhaka na swona.
21 Xana a va fani ni tende leri susiweke tintambhu?
Va fa va nga ri na vutlhari.