Esaya
62 A ndzi nge miyeli hikwalaho ka Siyoni,+
Naswona a ndzi nge tshami ndzi miyerile hikwalaho ka Yerusalema
Kukondza ku lulama ka yena ku voninga ku fana ni rivoni leri vangamaka+
Ni ku ponisiwa ka yena ku pfurha ku fana ni xisana.+
2 “Matiko ma ta vona ku lulama ka wena, wena wansati,+
Ni tihosi hinkwato ti ta vona ku xiximeka ka wena.+
U ta vitaniwa hi vito lerintshwa,+
Leri Yehovha hi byakwe a nga ta ri hlawula.
3 U ta fana ni harhi yo saseka evokweni ra Yehovha,
Duku ra vuhosi exandleni xa Xikwembu xa wena.
4 A wu nge he pfuki u vuriwe wansati loyi a tshikiweke,+
Ni tiko ra wena a ri nge he pfuki ri vuriwe marhumbi.+
Kambe u ta vitaniwa hi vito leri nge, Ndza Tsaka Hi Yena,+
Ni tiko ra wena ri ta vitaniwa hi vito leri nge, Wansati Loyi A Tekiweke.
Hikuva Yehovha u ta tsaka ha wena,
Ni tiko ra wena ri ta fana ni wansati loyi a tekiweke.
5 Hikuva ku fana ni jaha leri tekaka nhwana,
U ta tekiwa hi vanhu va wena.
Xikwembu xi ta tsaka ha wena,+
Ku fana ni muteki loyi a tsakaka hikwalaho ka ntombhi yakwe.
6 Ndzi veke varindzi ehenhla ka makhumbi ya wena, wena Yerusalema.
A va fanelanga va miyela, vusiku ninhlikanhi.
N’wina lava dzunisaka Yehovha,
Mi nga wisi,
7 Mi nga n’wi wisisi kukondza a aka muti wa Yerusalema wu tiya,
Kukondza wu dzunisiwa emisaveni hinkwayo.”+
8 Yehovha u hlambanyile hi voko rakwe ra xinene leri nga ni matimba, a ku:
“A ndzi nge he va nyiki valala va wena koroni ya wena,
Vamatiko a va nge he nwi vhinyo ya wena leyintshwa, leyi u yi tirheleke ku vava.+
9 Kambe lava tshovelaka koroni va ta yi dya, va dzunisa Yehovha;
Kasi lava endlaka vhinyo va ta yi nwa eswivaveni* swa mina swo kwetsima.”+
10 Humani, humani hi tigede.
Basiselani vanhu ndlela.+
Akani, akani gondzo lerikulu.
Susani maribye eka rona.+
Vekelani vanhu mfungho.+
11 Vonani! Yehovha u byele misava hinkwayo a ku:
“Byelani nhwanyana wa Siyoni mi ku,
‘U ta ponisiwa ku nga ri khale.+
Vonani! U ta ni hakelo,
U khome muholo.’ ”+