Esaya
21 Ku avanyisiwa ka mananga lama nga elwandle:*+
Ku ta ku fana ni xidzedze lexi hungaka hi le dzongeni,
Ku huma emananga, etikweni leri chavisaka.+
2 Ndzi byeriwe xivono lexi chavisaka:
Vaxengi va ha ya emahlweni va xenga,
Kasi lava onhaka na vona va ya emahlweni va onha.
Hlasela, wena Elami! Rhendzela, wena Meda!+
Ndzi ta herisa maxangu hinkwawo lawa a ma vangeke.+
3 Hi yona mhaka leyi ndzi nga ni gome swinene.+
Ndzi ni switlhavi,
Ku fana ni wansati la velekaka.
Ndzi tshikilelekile lerova a ndzi koti no twa;
Swa ndzi tikela ku vona.
4 Ndzi hele matimba; ndza rhurhumela hi ku chava.
Madyambu lawa a ndzi ma navela ma ndzi chavisa.
5 Vekani tafula ni switulu!
Dyanani mi tlhela mi nwa!+
Lunghekani n’wina tihosana, chelani xitlhangu hi mafurha!
6 Hikuva Yehovha u ndzi byele leswi:
“Famba u ya veka murindzi, u n’wi byela a vika leswi a swi vonaka.”
7 U vone kalichi ya nyimpi yi ri ni xipani xa tihanci,
Kalichi ya nyimpi yi ri ni timbhongolo,
Kalichi ya nyimpi yi ri ni tikamela.
Hiloko a swi languta hi vukheta.
8 Kutani a huwelela ku fana ni nghala a ku:
“Yehovha Xikwembu xanga, ndzi yime exihondzweni xo rindza ninhlikanhi,
A ndzi sukanga laha ndzi vekiweke kona vusiku byin’wana ni byin’wana.+
9 Vona lexi taka:
Ku ta kalichi ya nyimpi leyi kokiwaka hi tihanci yi ri ni vavanuna!”+
Kutani a huwelela a ku: “U wile! Babilona u wile!+
Swifaniso swa swikwembu swakwe leswi endliweke hi nsimbhi u swi fayeterile!”+
10 N’wina vanhu va mina lava huriweke ku fana ni mavele,
Ndzi mi vikerile leswi ndzi swi tweke eka Yehovha wa mavuthu, Xikwembu xa Israyele.
Ku ni loyi a ndzi huwelelaka a ri eSeyiri+ a ku:
“Murindzi, xana ri ta xa rini?
Murindzi, xana ri ta xa rini?”
12 Hiloko murindzi a ku:
“Ri ta xa kambe ri ta tlhela ri pela.
Ku vutisa a swi bihanga.
Mi nga tlhela mi vutisa!”
13 Ku avanyisiwa ka ndhawu leyi nga mananga:
N’wina vanhu va le Dedani,+
Mi ta etlela ekhwatini endhawini leyi nga mananga.
14 Hlanganisani la nga ni torha mi n’wi nyika mati
N’wina lava tshamaka eThema,+
Nyikani la balekaka xinkwa.
15 Hikuva va baleke mabanga, mabanga lama hlomuriweke,
Va baleke vurha lebyi kungiweke ni nyimpi leyi nga tiyiselekiki.
16 Yehovha u ndzi byele a ku: “Ku nga si hela lembe, ku fana ni malembe ya mutirhi loyi a thoriweke, ndhuma ya Kedari+ yi ta va yi herile. 17 Tinhenha leti khomaka vurha ti ta sala ti ri titsongo eKedari, hikuva Yehovha Xikwembu xa Israyele u vurile.”