Eklesiasta
6 Ku ni khombo rin’wana leri ndzi ri voneke emisaveni naswona ri tolovelekile exikarhi ka vanhu: 2 Xikwembu xa ntiyiso xi nyika munhu rifuwo ni ku xiximeka leswaku a nga pfumali nchumu eka leswi a swi navelaka; kambe Xikwembu xa ntiyiso a xi n’wi pfumeleli leswaku a tiphina hi swona, xi tshika munhu un’wana a tiphina hi swona. Leswi na swona a swi pfuni nchumu naswona i khombo lerikulu. 3 Loko munhu o va tatana ku ringana ka 100, a tlhela a hanya malembe yo tala a kondza a dyuhala kambe a nga tiphini hi leswi a nga na swona a nga si fa, mina ndzi ri u tluriwa hi n’wana loyi a velekiweke a file.+ 4 Hikuva n’wana loyi u tele swa hava a tlhela a nyamalala emunyameni kutani vito rakwe ri funengetiwa hi munyama. 5 Hambileswi a nga si tshamaka a vona dyambu kumbe ku tiva swo karhi, wa antswa swinene ku tlula wanuna yoloye.+ 6 Swi pfuna yini ku hanya malembe ya 2 000 kambe u nga tiphini? Xana vanhu hinkwavo a va heleli endhawini yin’we?+
7 Munhu u tirha hi matimba leswaku a enerisa khwiri rakwe;+ kambe a nga eneriseki. 8 Kahlekahle, lowo tlhariha u vuyeriwa hi yini loko a tlula xiphukuphuku+ kumbe, xana xisiwana xi vuyeriwa hi yini loko xi kota ku tiyisela swiphiqo swa vutomi? 9 Swa antswa ku tiphina hi leswi matihlo ma swi vonaka ku ri ni ku navela leswi u nga riki na swona. Leswi na swona a swi pfuni nchumu, i ku hlongorisa moya.
10 Xin’wana ni xin’wana lexi nga kona i khale xi thyiwe vito naswona swa tiveka leswaku munhu u njhani; kutani a nge swi koti ku phikizana ni loyi a n’wi tlulaka hi matimba. 11 Ku vulavula ngopfu a swi pfuni nchumu; naswona, xana munhu swi n’wi vuyerisa hi yini? 12 I mani loyi a tivaka leswi munhu a faneleke a swi endla eka masikunyana ya vutomi bya yena bya hava, lawa ma hundzaka ku fana ni ndzhuti?+ Xana u kona loyi a nga byelaka munhu leswi nga ta humelela emisaveni loko a nga ha ri kona?