Eklesiasta
5 Rindza milenge ya wena nkarhi wun’wana ni wun’wana loko u ya endlwini ya Xikwembu xa ntiyiso;+ swa antswa ku tshinela leswaku u ya yingisela+ ku ri ni ku endla gandzelo hilaha swiphukuphuku swi endlaka hakona+ hikuva a swi swi xiyi leswaku leswi swi swi endlaka swi bihile.
2 U nga hatliseli ku vulavula, kumbe u tsutsumela ku va ni rito emahlweni ka Xikwembu xa ntiyiso,+ hikuva Xikwembu xa ntiyiso xi le tilweni kasi wena u la misaveni. Hi yona mhaka u nga fanelangiki u tata marito.+ 3 Phela norho wu va kona hikwalaho ko tshamela ku anakanya hi swilo swo tala+ naswona xiphukuphuku xi tikomba hi ku jakatseka.+ 4 Nkarhi wun’wana ni wun’wana loko u hlambanyela Xikwembu swo karhi, hatla u swi endla,+ hikuva a xi tsakisiwi hi swiphukuphuku.+ Leswi u swi hlambanyeke, swi endle.+ 5 Swa antswa u nga hlambanyi ku ri ni ku hlambanya kutani u nga swi endli.+ 6 U nga pfumeleli nomu wa wena wu ku dyohisa+ naswona u nga byeli ntsumi leswaku a ku ri xihoxo.+ Hikwalaho ka yini u fanele u hlundzukisa Xikwembu xa ntiyiso hileswi u swi vulaka lerova xi onha ntirho wa wena?+ 7 Hikuva tanihi leswi milorho yi vaka kona hikwalaho ko tshamela ku anakanya hi swilo swo tala,+ xisweswo, ku vulavula ngopfu a swi pfuni nchumu. Kambe chava Xikwembu xa ntiyiso.+
8 Loko u vona swisiwana swi tshikileriwa naswona vanhu va nga avanyisiwi hi ndlela leyinene emugangeni lowu u tshamaka eka wona, swi nga ku hlamarisi.+ Hikuva ndhuna yoleyo yi vekiwe tihlo hi loyi a nga ehenhla ka yona naswona ku ni van’wana lava nga ehenhla ka volavo.
9 Nakambe, hinkwavo va vuyeriwa hi leswi humesiwaka hi misava; hambi ku ri hosi na yona yi dya leswi humaka emasin’wini.+
10 Loyi a rhandzaka mali a nge pfuki a korwile hi yona, ni loyi a rhandzaka rifuwo u tshamela ku lava rin’wana.+ Leswi na swona a swi pfuni nchumu.+
11 Loko leswinene swi tala, lava swi dyaka va engeteleka.+ Naswona xana swi n’wi pfuna yini n’wini wa swona, handle ko swi languta hi matihlo?+
12 Bya nandziha vurhongo bya loyi a tirhelaka un’wana, hambi a ri ni swakudya switsongo kumbe swo tala, kambe loyi a nga ni rifuwo ro tala a nga etleli.
13 Ku ni khombo lerikulu leri ndzi ri voneke emisaveni: rifuwo leri munhu a tihlengeletelaka rona, ri n’wi vangela maxangu. 14 Rifuwo rolero ri lovile hikwalaho ko bindzula hi vusopfa, kutani loko a va ni n’wana u hava xo n’wi nyika xona xi va ndzhaka.+
15 Leswi munhu a humiseke xiswona ekhwirini ra mana wakwe, u ta fambisa xiswona a nga ambalanga, hilaha a teke hakona.+ Naswona a ku na lexi a nga fambaka na xona eka hinkwaswo leswi a swi tirheleke hi matimba.+
16 Leswi na swona i khombo lerikulu: Leswi a tiseke xiswona u ta fambisa xiswona; naswona xana munhu u vuyeriwa hi yini loko a tshamela ku tirha hi matimba a tirhela moya?+ 17 Nakambe, siku ni siku a nga tiphini loko a dya,* u ni mbitsi, wa vabya naswona u tshama a hlundzukile.+
18 Leswi ndzi swi voneke swi ri swinene naswona swi fanerile hi leswi: munhu u fanele a dya, a nwa, a tlhela a tiphina hi ntirho lowu a wu endlaka+ hi ku tiyimisela loko a ha hanya, eka masiku ma nga ri mangani lawa Xikwembu xa ntiyiso xi n’wi nyikeke wona, hikuva yoleyo i hakelo yakwe.+ 19 Nakambe, loko Xikwembu xa ntiyiso xi nyika munhu rifuwo+ ni ndlela yo tiphina ha rona, u fanele a ri teka kutani a tsaka hi ntirho wakwe lowu a wu endleke. Leyi i nyiko leyi humaka eka Xikwembu.+ 20 Phela nileswaku masiku ya vutomi byakwe ma le ku fambeni a nge swi voni hikuva Xikwembu xa ntiyiso xi endla leswaku a tshama a tsakile.+