Vakorinto Wo Sungula
5 Kahlekahle ku vikiwe leswaku ku ni lava tikhomaka ku biha hi swa masangu*+ exikarhi ka n’wina naswona manyala wolawo a ma kona ni le xikarhi ka matiko, ya munhu loyi a tshamaka ni nsati wa tata wakwe.+ 2 Xana ma tibuma hikwalaho ka wona? Xana a swi nga ta antswa loko a mo rila+ leswaku munhu loyi a nga endla sweswo a susiwa exikarhi ka n’wina?+ 3 Hambileswi ndzi nga riki na n’wina hi xiviri, ndzi kona hi moya naswona se ndzi n’wi avanyisile munhu loyi a endlaka swilo leswi, onge hiloko ndzi ri na n’wina. 4 Loko mi hlengeletana swin’we hi vito ra Hosi ya hina Yesu, ni ku tiva leswaku ndzi na n’wina hi moya swin’we ni matimba ya Hosi ya hina Yesu, 5 mi fanele mi nyiketa munhu wo tano eka Sathana+ leswaku ku lovisiwa nyama, leswaku ku ta ponisiwa moya hi siku ra Hosi.+
6 Ku tibuma ka n’wina a hi kunene. Xana a mi swi tivi leswaku comela xitsongo xi kukumuxa mbila hinkwayo?+ 7 Susani comela xa khale leswaku mi va mbila leyintshwa, tanihi leswi mi nga riki na comela. Hikuva kahlekahle Kreste loyi a nga xinyimpfana xa hina xa Paseka+ u endliwe gandzelo.+ 8 Kutani, a hi endleni nkhuvo+ hi xinkwa lexi nga riki na comela, xo tshembeka ni ntiyiso, hi nga tirhisi comela xa khale kumbe comela lexi nga ni xidyoho ni vuhomboloki.
9 Epapileni ra mina ndzi mi tsalele leswaku mi tshika ku tihlanganisa* ni vanhu lava tikhomaka ku biha hi swa masangu.* 10 A ndzi vuli leswaku mi tshika hi ku helela ku tihlanganisa ni vanhu lava tikhomaka ku biha hi swa masangu* laha misaveni,+ kumbe vanhu va makwanga kumbe vadyeleri kumbe vagandzeri va swikwembu. Loko a swi ri tano, kahlekahle a mi ta boheka ku rhurha laha misaveni.+ 11 Kambe sweswi ndzi mi tsalela leswaku mi tshika ku tihlanganisa*+ ni munhu loyi a vuriwaka makwerhu, kasi u tikhoma ku biha hi swa masangu* kumbe munhu wa makwanga+ kumbe mugandzeri wa swikwembu kumbe murhuketeri kumbe xidakwa+ kumbe mudyeleri,+ hambi ku ri ku dya mi nga dyi na yena munhu wo tano. 12 Hikwalaho ka yini ndzi fanele ndzi avanyisa lava nga ehandle? Xana n’wina a mi va avanyisi lava nga endzeni, 13 loko Xikwembu xi avanyisa lava nga ehandle?+ “Susani munhu wo homboloka exikarhi ka n’wina.”+