Varhoma

7 Vamakwerhu, xana a mi swi tivi leswaku munhu u lawuriwa hi Nawu ntsena loko a ha hanya? (Hikuva ndzi vulavula ni lava tivaka nawu) 2 Hi xikombiso, hi ku ya hi nawu, wansati u ta tshama a tekiwile hi nuna wakwe loko nuna wakwe a ha hanya; kambe loko nuna wakwe a fa, u tshunxekile eka nawu wa nuna wakwe.+ 3 Hikwalaho, loko a tekiwa hi wanuna un’wana nuna wakwe a ha hanya, u ta vuriwa muoswi.+ Kambe loko nuna wakwe a fa, u tshunxekile eka nawu wa nuna wakwe. U ta va a nga oswi loko a tekiwa hi wanuna un’wana.+

4 Hilaha ku fanaka, na n’wina vamakwerhu miri wa Kreste wu mi tshunxile eka Nawu leswaku mi ta tekiwa hi un’wana,+ ku nga loyi a pfuxiweke eka lava feke,+ leswaku hi ta tirhela Xikwembu.+ 5 Hikuva loko ha ha hanya hi ku landza ku navela ka nyama, Nawu wu endle swi va erivaleni leswaku ku navela ko biha ku dyohisa mimiri* ya hina, naswona xidyoho xexo xi hi yisa eku feni.+ 6 Kambe sweswi hi tshunxiwile eNawini+ hikuva se hi file eka Nawu lowu a wu hi lawula, leswaku hi va mahlonga ku nga ri hileswi hi kongomisiwaka hi Nawu,+ kambe hi mahlonga hikwalaho ka leswi hi kongomisiwaka hi moya.+

7 Xana hi fanele hi ku yini? Xana Nawu i xidyoho? Nikatsongo! A ndzi ta va ndzi nga swi tivanga leswaku xidyoho i yini loko a ndzi nga pfuniwanga hi Nawu.+ Hi xikombiso, a ndzi ta va ndzi nga swi tivanga leswaku ku navela swa van’wana i xidyoho loko Nawu a wu nga vulanga wu ku: “U nga tshuki u navela swa van’wana.”+ 8 Kambe xidyoho xi tirhise xileriso leswaku xi pfuxa ku navela ka mixaka hinkwayo endzeni ka mina hikuva handle ka nawu xidyoho a xi nga ri na matimba.+ 9 Ku vula ntiyiso, khale a ndzi hanya handle ka nawu. Kambe loko xileriso xi fika xidyoho xi tlhele xi sungula ku hanya kambe mina ndzi file.+ 10 Xileriso lexi a xi fanele xi ndzi yisa evuton’wini,+ eka mina a xi ndzi yisa eku feni. 11 Hikwalaho ka xileriso, xidyoho xi kume ndlela yo ndzi kanganyisa kutani xi ndzi dlaya. 12 Hikwalaho, Nawu hi woxe wa kwetsima ni xileriso xa kwetsima, xi lulamile naswona i xinene.+

13 Xana leswi swi vula leswaku swilo leswinene swi ndzi vangele rifu? Nikatsongo! I xidyoho xi nga ndzi vangela rifu, Nawu i wunene+ kambe wu paluxe leswaku i xidyoho lexi ndzi vangelaka rifu kutani xileriso xi swi veka erivaleni leswaku xidyoho xi bihe ngopfu.+ 14 Ha swi tiva leswaku Nawu wu huma eka Xikwembu kambe mina ndzi munhu wa nyama, loyi a xaviseriweke xidyoho.+ 15 Hikuva a ndzi swi twisisi leswi ndzi swi endlaka. Hikuva leswi ndzi lavaka ku swi endla a ndzi swi endli kambe ndzi endla leswi ndzi swi vengaka. 16 Hambiswiritano, ndza pfumela leswaku Nawu i wunene, kambe a ndzi swi endli swilo leswinene leswi ndzi lavaka ku swi endla. 17 Kahlekahle a swa ha endliwi hi mina, swi endliwa hi xidyoho lexi nga eka mina.+ 18 Ndza swi tiva leswaku a ku na nchumu lowunene eka mina emirini wa mina lowu nga ni xidyoho; hikuva ndza swi navela ku endla leswinene, kambe a ndzi swi koti ku swi endla.+ 19 Hikuva swilo leswinene leswi ndzi lavaka ku swi endla a ndzi swi endli kambe leswo biha leswi ndzi nga swi laviki ku swi endla, hi swona leswi ndzi swi endlaka. 20 Kutani loko ndzi endla swilo leswi ndzi nga swi laviki, a swa ha endliwi hi mina kambe swi endliwa hi xidyoho lexi nga eka mina.

21 Kutani eka mina ndzi kuma nawu lowu: Loko ndzi lava ku endla swilo leswinene, leswo biha swi kona eka mina.+ 22 Kunene embilwini ya mina ndza wu tsakela nawu wa Xikwembu,+ 23 kambe emirini* wa mina ndzi vona nawu wun’wana lowu lwaka ni nawu wa mianakanyo ya mina,+ wu ndzi endla hlonga ra nawu+ wa xidyoho lowu nga emirini* wa mina. 24 Mina munhu wa maxangu! I mani loyi a nga ta ndzi ponisa emirini lowu ndzi yisaka eku feni? 25 Ndzi khensa Xikwembu ha Yesu Kreste Hosi ya hina! Hikwalaho, emianakanyweni ya mina ndzi hlonga ra nawu wa Xikwembu, kambe enyameni ya mina ndzi hlonga ra nawu wa xidyoho.+