Eklesiasta
2 Kutani ndzi byele mbilu ya mina ndzi ku: “Tiphine u tsaka u vona leswaku u ta vuyeriwa hi yini.” Kambe ni sweswo a swi ndzi pfunanga nchumu.
2 Ndzi vule leswi mayelana ni ku hleka, “I vuhunguki!”
Naswona mayelana ni ntsako ndzi te, “Xana wu pfuna yini?”
3 Ndzi nwe vhinyo leswaku ndzi vona loko yi ta ndzi tisela ntsako,+ kambe a ndzi yi pfumelelanga leswaku yi ndzi pfilunganya miehleketo; ndzi tlhele ndzi tiendla xiphukuphuku ku vona leswaku i yini xa nkoka lexi vanhu va nga xi endlaka loko va ha hanya eka masikunyana lawa va nga na wona emisaveni. 4 Ndzi endle mitirho leyikulu.+ Ndzi tiakele tiyindlu;+ ndzi tirimela masimu ya madiriva.+ 5 Ndzi rime masimu ni mitanga, ndzi byala mirhi yo hambanahambana ya mihandzu eka yona. 6 Ndzi tiakele madamu ya mati leswaku ndzi ta cheleta mirhi. 7 Ndzi kume malandza ya xinuna ni ya xisati,+ kasi man’wana ma velekiwe endyangwini wa mina. Ndzi tlhele ndzi va ni swifuwo swo tala, tihomu ni tinyimpfu,+ ku tlula hinkwavo lava veke kona ndzi nga si va kona eYerusalema. 8 Ndzi tihlengeletele silivhere ni nsuku,+ rifuwo ra tihosi ni ra swifundzha.+ Ndzi ve ni vayimbeleri vaxinuna ni vaxisati, swin’we ni nchumu lowu endlaka leswaku vavanuna va tsaka swinene, ku nga wansati, ina, vavasati vo tala. 9 Xisweswo ndzi ve ni ndhuma ni rifuwo ku tlula hinkwavo lava nga tshama va va kona eYerusalema+ ndzi nga si va kona naswona vutlhari bya mina a byi ndzi sukelanga.
10 A ndzi titsonanga nchumu lexi a ndzi xi navela.+ Mbilu ya mina a ndzi yi alelanga muxaka na wun’we wa ku titsakisa hikuva mbilu ya mina a yi tiphina hikwalaho ka ntirho wa mina hinkwawo wa matimba, naswona yoleyo a ku ri hakelo ya ntirho wa mina hinkwawo wa matimba.+ 11 Kambe loko ndzi anakanyisisa hi mitirho ya mina hinkwayo ni ntirho hinkwawo wa matimba lowu ndzi tikarhateleke ku wu endla,+ ndzi xiye leswaku hinkwaswo a swi nga pfuni nchumu, i ku hlongorisa moya;+ a ku nga ri na nchumu wa nkoka laha misaveni.+
12 Kutani ndzi kambisise vutlhari ni vuhunguki ni vuphukuphuku.+ (Hikuva xana loyi a taka endzhaku ka hosi a nga endla yini? U ta endla leswi se swi endliweke.) 13 Naswona ndzi xiye leswaku vutlhari byi tlula vuphukuphuku,+ ku fana nileswi ku vonakala ku tlulaka munyama.
14 Matihlo ya lowo tlhariha ma le nhlokweni yakwe;+ kambe xihunguki xi famba emunyameni.+ Ndzi tlhele ndzi swi xiya leswaku hinkwavo va humeleriwa hi nchumu lowu fanaka.+ 15 Kutani ndzi byele mbilu ya mina ndzi ku: “Leswi humelelaka xihunguki na mina swi ta ndzi humelela.”+ Hikwalaho, xana swi ndzi pfuna yini ku tlhariha ku tlula mpimo? Hiloko ndzi byela mbilu ya mina ndzi ku: “Leswi na swona a swi pfuni nchumu.” 16 Hikuva a nga kona la nga ta tsundzukiwa hilaha ku nga heriki, hambi i munhu wo tlhariha kumbe xiphukuphuku.+ Hinkwavo va ta rivariwa enkarhini lowu taka. Naswona xana lowo tlhariha u ta fa njhani? Ku fana ni xiphukuphuku.+
17 Kutani ndzi sungule ku venga vutomi,+ hikuva hinkwaswo leswi endliwaka laha misaveni a swi ndzi dyisa mbitsi, hinkwaswo a swi nga pfuni nchumu,+ i ku hlongorisa moya.+ 18 Ndzi sungule ku venga swilo hinkwaswo leswi ndzi swi tirheleke hi matimba emisaveni,+ hikuva ndzi boheka ku swi siyela munhu loyi a nga ta ta endzhaku ka mina.+ 19 Naswona i mani la tivaka leswaku munhu wa kona u ta tlhariha kumbe u ta va xiphukuphuku?+ Nilokoswiritano u ta lawula swilo hinkwaswo leswi ndzi tirhiseke matimba ya mina ni vutlhari leswaku ndzi swi kuma. Leswi na swona a swi pfuni nchumu. 20 Kutani ndzi sungule ku vilela hikwalaho ka ntirho hinkwawo wa matimba lowu ndzi tikarhateleke ku wu endla laha misaveni. 21 Hikuva munhu a nga tirha hi matimba, hi vutlhari, hi vutivi ni hi vuswikoti, kambe swilo swakwe u boheka ku swi siyela loyi a nga swi tirhelangiki.+ Leswi na swona a swi pfuni nchumu, i khombo lerikulu.
22 Xana munhu u vuyeriwa hi yini eka ntirho wakwe hinkwawo wa matimba ni ku navela loku n’wi endlaka a tirha hi matimba laha misaveni?+ 23 Phela ntirho wakwe wu n’wi vangela gome ni mbitsi vutomi byakwe hinkwabyo,+ nivusiku a nga etleli.+ Leswi na swona a swi pfuni nchumu.
24 Ku hava nchumu wo antswa eka munhu ku tlula ku dya ni ku nwa ni ku tlhela a tiphina hi ntirho wakwe wa matimba.+ Leswi na swona ndzi swi xiyile leswaku swi huma eka Xikwembu xa ntiyiso,+ 25 hikuva i mani la dyaka ni ku nwa ku ndzi tlula?+
26 Munhu loyi a xi tsakisaka xi n’wi nyika vutlhari ni vutivi ni ntsako,+ kambe loko ku ri mudyohi xi n’wi nyika ntirho wo hlengeleta rifuwo leswaku a ta nyika loyi a tsakisaka Xikwembu xa ntiyiso.+ Leswi na swona a swi pfuni nchumu, i ku hlongorisa moya.