Mitirho
6 Emasikwini wolawo, loko vadyondzisiwa va ya va engeteleka, Vayuda lava vulavulaka Xigriki va sungula ku vilela hi Vayuda lava vulavulaka Xiheveru, hikuva a va nga ti hlayisi kahle tinoni ta vona loko ku phameriwa swakudya swa siku ni siku.+ 2 Hiloko lava 12 va vitana vunyingi bya vadyondzisiwa kutani va ku: “A hi swinene* leswaku hi tshika rito ra Xikwembu hi ya phakela swakudya ematafuleni.+ 3 Kutani, vamakwerhu, hlawulani vavanuna va nkombo lava tshembekaka*+ exikarhi ka n’wina, lava nga ni moya wa Xikwembu ni vutlhari,+ leswaku hi ta va nyika ntirho lowu wa nkoka;+ 4 kambe hina hi ta tinyiketela exikhongelweni ni le ku dyondziseni ka rito ra Xikwembu.” 5 Hinkwavo lava a va ri kwalaho va yi tsakerile mhaka leyi, hiloko va hlawula Stefano, wanuna la nga ni ripfumelo lerikulu ni moya lowo kwetsima, ku katsa na Filipi,+ Prokoro, Nikanoro, Timoni, Parmena na Nikolawo muproselita* wa le Antiyoka. 6 Va va tisa emahlweni ka vaapostola, naswona endzhaku ko khongela va va tlhandleka mavoko.+
7 Hikwalaho, rito ra Xikwembu ri ya emahlweni ri hangalaka,+ ni nhlayo ya vadyondzisiwa yi ya yi andza swinene+ eYerusalema; naswona ntshungu lowukulu wa vaprista wu sungula ku va vapfumeri.+
8 Kutani Stefano loyi a a tsakeriwa hi Xikwembu naswona xi n’wi nyikeke matimba, a a endla swihlamariso leswikulu ni masingita exikarhi ka vanhu. 9 Kambe ku ta vavanuna van’wana lava humaka laha ku vuriwaka Sinagoga Ya Lava Tshunxekeke, ku katsa ni Vakirena van’wana ni Vaaleksandriya ni van’wana lava humaka eKilikiya ni le Asiya, va ta kanetana na Stefano. 10 Kambe a va nga swi koti ku kanetana na yena, hikuva a a ri ni vutlhari ni moya lowo kwetsima.+ 11 Hiloko va kucetela vanhu exihundleni leswaku va ku: “Hi n’wi twe a sandza Muxe ni Xikwembu.” 12 Kutani va hlohlotela vanhu, vakulukumba ni vatsari, hiloko va ta eka yena hi xitshuketa, va n’wi teka hi nkanu va n’wi yisa ehubyeni ya Sanedri. 13 Hiloko va tisa timbhoni ta mavunwa ti fika ti ku: “Munhu loyi a nga tshiki ku vula swo biha hi ndhawu leyi yo kwetsima ni hi Nawu. 14 Hi xikombiso, hi n’wi twe a vula leswaku Yesu loyi wa Munazareta u ta hirimuxa ndhawu leyi kutani a cinca mindhavuko leyi hi yi kumeke eka Muxe.”
15 Kuteloko hinkwavo lava tshameke eSanedri va n’wi honolela, va vona xikandza xakwe xi fana ni xikandza xa ntsumi.