Vakorinto Wo Sungula

2 Vamakwerhu, loko ndzi ta eka n’wina a ndzi tanga hi ku lava ku mi hlamarisa hi mavulavulelo+ kumbe hi vutlhari loko ndzi mi byela xihundla xo kwetsima+ xa Xikwembu. 2 Hikuva ndzi endle xiboho xo vulavula na n’wina ntsena hi Yesu Kreste ni ku dlayiwa kakwe emhandzini.+ 3 Loko ndzi ta eka n’wina a ndzi tsanile, ndzi chava ndzi tlhela ndzi rhurhumela; 4 naswona leswi ndzi swi vulavuleke ni leswi ndzi swi chumayeleke a ndzi swi vulanga hi marito lama khorwisaka ya vutlhari, kambe a swi kombisa matimba ya moya,+ 5 leswaku mi va ni ripfumelo eka matimba ya Xikwembu ku nga ri eka vutlhari bya vanhu.

6 Sweswi hi vulavula hi vutlhari exikarhi ka lava wupfeke,+ kambe ku nga ri hi vutlhari bya misava leyi kumbe bya vafumi va misava leyi, lava nga ta herisiwa.+ 7 Kambe hi vulavula hi vutlhari bya Xikwembu bya xihundla xo kwetsima,+ ku nga vutlhari lebyi fihliweke, lebyi Xikwembu xi byi vekeke misava leyi yo homboloka yi nga si va kona, leswaku hi ta vangamisiwa. 8 Vafumi va misava leyi a va byi tivi vutlhari lebyi,+ hikuva loko a va byi tivile a va ta va va nga yi dlayanga* Hosi leyi xiximekaka. 9 Kambe hilaha ku tsariweke hakona: “Tihlo a ri swi vonanga ni ndleve a yi swi twanga, naswona mbilu ya munhu a yi swi ehleketanga swilo leswi Xikwembu xi swi lunghiseleleke lava xi rhandzaka.”+ 10 Hikuva Xikwembu xi swi hlavutele hina+ hi moya wa xona,+ hikuva moya wu lavisisa swilo hinkwaswo, hambi ku ri swilo leswi enteke swa Xikwembu.+

11 Hikuva i mani exikarhi ka vanhu loyi a tivaka swilo swa munhu loko ku nga ri moya wakwe lowu nga endzeni ka yena? A nga kona loyi a tivaka swilo swa Xikwembu handle ka moya wa Xikwembu. 12 Kutani a hi amukelanga moya wa misava kambe hi amukele moya lowu humaka eka Xikwembu,+ leswaku hi ta tiva swilo leswi Xikwembu xi hi nyikeke swona hi musa. 13 Nakambe swilo leswi a hi swi vulavuli hi marito lawa hi dyondzisiweke hi vutlhari bya munhu,+ kambe hi marito lawa hi dyondzisiweke hi moya,+ leswi hi swi endla loko hi tirhisa marito lama humaka eka moya lowo kwetsima ku hlamusela swilo swa Xikwembu.

14 Kambe munhu wa nyama a nga swi amukeli swilo swa moya wa Xikwembu hikuva eka yena i vuphukuphuku; a nge swi tivi hikuva swi kamberiwa hi ndlela ya moya. 15 Hambiswiritano, munhu loyi a kongomisiwaka hi moya wa Xikwembu u kambela swilo hinkwaswo+ kambe yena a nga kamberiwi hi munhu. 16 Hikuva “i mani loyi a tivaka mianakanyo ya Yehovha* leswaku a n’wi letela?”+ Kambe hina hi anakanya ku fana na Kreste.+