Yohane

18 Endzhaku ko vula leswi, Yesu a huma ni vadyondzisiwa vakwe va pela Nkova wa Kedroni+ lowu a wu ri entangeni kutani yena ni vadyondzisiwa vakwe va ya kwalaho.+ 2 Yudasi loyi a nga n’wi xavisa, na yena a a yi tiva ndhawu leyi, hikuva mikarhi yo tala Yesu ni vadyondzisiwa vakwe a va hlangana kona. 3 Hiloko Yudasi a ta ni masocha ni tindhuna ta vaprista lavakulu ni ta Vafarisi, va khome swisana, timboni ni matlhari.+ 4 Leswi Yesu a a swi tiva hinkwaswo leswi a swi ta n’wi humelela, a ya eka vona kutani a va vutisa a ku: “Mi lava mani?” 5 Hiloko va ku: “Yesu wa le Nazareta.”+ A ku: “Hi mina loyi.” Yudasi loyi a nga n’wi xavisa na yena a a ri na vona.+

6 Hambiswiritano, loko Yesu a va byela a ku, “Hi mina loyi,” va tlhentlhela endzhaku va wela ehansi.+ 7 Hiloko a tlhela a va vutisa a ku: “Mi lava mani?” Va n’wi hlamula va ku: “Yesu wa le Nazareta.” 8 Yesu a ku: “Ndzi mi byerile leswaku hi mina loyi. Loko mi lava mina, tshikani lava va famba.” 9 Sweswo u swi vule leswaku ku endleka leswi a swi vuleke loko a ku: “A ndzi lahlekeriwanga ni hi un’we wa lava u ndzi nyikeke vona.”+

10 Leswi Simoni Petro a a ri ni banga, a ri hlomula kutani a tsema ndleve ya xinene+ ya nandza wa muprista lonkulu. Vito ra nandza yoloye a ku ri Malko. 11 Hambiswiritano, Yesu a byela Petro a ku: “Tlherisela banga ra wena enkwameni wa rona.+ Xana a ndzi fanelanga ndzi nwa xinwelo lexi Tatana a ndzi nyikeke xona?”+

12 Hiloko masocha ni ndhuna ya nyimpi ni tindhuna ta Vayuda va khoma Yesu va n’wi boha. 13 Va rhange va n’wi yisa eka Anasi, hikuva Kayafasi+ loyi a a ri muprista lonkulu lembe rero a a ri mukon’wana wa Anasi.+ 14 Kayafasi hi yena a tsundzuxeke Vayuda leswaku swi ta pfuna vona ku va munhu un’we a fela vanhu hinkwavo.+

15 Simoni Petro ni mudyondzisiwa un’wana a va landzelela Yesu.+ Mudyondzisiwa yoloye a a tiviwa hi muprista lonkulu, hiloko a nghena na Yesu exivaveni* xa muprista lonkulu, 16 kambe Petro a a yime ehandle ka nyangwa. Hiloko mudyondzisiwa loyi a a tiviwa hi muprista lonkulu, a huma a ya vulavula ni murindzi wa nyangwa kutani a nghenisa Petro. 17 Nandza wa xisati loyi a a rindza nyangwa a vutisa Petro a ku: “Xana a wu un’wana wa vadyondzisiwa va munhu loyi?” Petro a ku: “A ndzi yena.”+ 18 Malandza ni tindhuna a va yime kwalaho va ri karhi va orha ndzilo lowu va wu tshiveleke hikuva a ku titimela. Petro na yena a a orha na vona.

19 Hiloko muprista lonkulu a vutisa Yesu hi vadyondzisiwa vakwe ni hi dyondzo yakwe. 20 Yesu a n’wi hlamula a ku: “Ndzi vulavule emahlweni ka vanhu. A ndzi tshamela ku dyondzisa emasinagogeni ni le tempeleni,+ laha Vayuda hinkwavo va hlengeletanaka kona naswona a ndzi vulanga nchumu ndzi nga twiwi hi munhu. 21 Hikwalaho ka yini u ndzi vutisa? Vutisa lava tweke leswi ndzi va byeleke swona. Va swi tiva leswi ndzi swi vuleke.” 22 Endzhaku ka loko Yesu a vule sweswo, ndhuna yin’wana leyi a yi yime ekusuhi na yena yi n’wi ba hi mpama+ kutani yi ku: “Xana u hlamula muprista lonkulu hi ndlela yoleyo?” 23 Yesu a ku: “Loko ndzi hoxisile, ndzi byele xihoxo xa mina; kambe loko ndzi nga dyohanga nchumu, u ndzi bela yini?” 24 Hiloko Anasi a rhumela Yesu a bohiwile eka Kayafasi muprista lonkulu.+

25 Simoni Petro a a yime kwalaho a ri karhi a orha ndzilo. Hiloko va ku eka yena: “Xana a wu un’wana wa vadyondzisiwa vakwe?” A kaneta a ku: “A ndzi yena.”+ 26 Un’wana wa malandza ya muprista lonkulu, loyi a a ri xaka ra wanuna loyi Petro a n’wi tsemeke ndleve+ a ku: “Xana a ndzi ku vonanga entangeni u ri na yena?” 27 Kambe Petro a tlhela a kaneta, hiloko nkuku wu ringa hi nkarhi wolowo.+

28 Hiloko va suka na Yesu eka Kayafasi va n’wi yisa ekaya ka ndhunankulu.+ A ka ha ri mpundzu swinene. Kambe vona a va nghenanga ekaya ka ndhunankulu, leswaku va nga nyamisiwi+ hikuva a va ta dya Paseka. 29 Hiloko Pilato a humela ehandle kutani a ku: “U dyohe yini wanuna loyi?” 30 Va n’wi hlamula va ku: “Loko wanuna loyi a a nga dyohanga,* a hi nga ta n’wi tisa eka wena.” 31 Hiloko Pilato a ku: “N’wi tekeni mi ya n’wi avanyisa hi ku ya hi nawu wa n’wina.”+ Vayuda va ku: “Nawu wa hina a wu hi pfumeleli ku dlaya munhu.”+ 32 Leswi a swi tiyisa leswi Yesu a swi vuleke loko a kombisa ndlela leyi a a ta fa ha yona ku nga ri khale.+

33 Kutani Pilato a tlhelela ekaya ka ndhunankulu ivi a vitana Yesu a ku: “Xana u Hosi ya Vayuda?”+ 34 Yesu a ku: “Xana u ndzi vutisa hi leswi u lavaka ku tiva kumbe hi leswi u tweke swo karhi hi mina?” 35 Pilato a hlamula a ku: “U swi tiva kahle leswaku a ndzi Muyuda. Vanhu va ka n’wina ni vaprista lavakulu hi vona va nga ku tisa eka mina. U dyohe yini?” 36 Yesu a hlamula+ a ku: “Mfumo wa mina a hi xiphemu xa misava leyi.+ Loko a wu ri xiphemu xa misava leyi, valandzeri va mina a va ta va va ndzi lwerile leswaku ndzi nga khomiwi hi Vayuda.+ Kambe ntiyiso hi leswaku Mfumo wa mina a hi wa misava leyi.” 37 Kutani Pilato a ku eka yena: “Xana u hosi?” Yesu a hlamula a ku: “Wena u vula leswaku ndzi hosi.+ Leswi ndzi velekeriweke swona, ni leswi ndzi teleke swona emisaveni i ku ta paluxa ntiyiso.+ Loyi a nga le ntiyisweni u yingisa rito ra mina.” 38 Pilato a ku: “Ntiyiso i yini?”

Endzhaku ko vula sweswo, a tlhela a huma a ya eka Vayuda a fika a ku: “A ndzi n’wi voni nandzu.+ 39 Mi tolovele leswaku ndzi mi tshunxela munhu hi Paseka.+ Xana mi lava leswaku ndzi mi tshunxela Hosi ya Vayuda?” 40 Hiloko va tlhela va huwelela va ku: “Hi tshunxele Barabasi, ku nga ri wanuna loyi!” Barabasi a a ri xigevenga.+