Tihosi To Sungula

8 Hi nkarhi wolowo Solomoni a hlengeleta+ vakulukumba va Israyele, varhangeri hinkwavo va tinyimba, tindhuna ta mindyangu ya Israyele.+ Va ya eka Hosi Solomoni eYerusalema ku ya humesa areka ya ntwanano wa Yehovha eMutini wa Davhida,+ ku nga Siyoni.+ 2 Vavanuna hinkwavo va Israyele va hlengeletana emahlweni ka Hosi Solomoni enkhubyeni* hi n’hweti ya Ethanimi,* ku nga n’hweti ya vunkombo.+ 3 Vakulukumba hinkwavo va Israyele va ta, kutani vaprista va rhwala Areka.+ 4 Va rhwala Areka ya Yehovha, tende ra nhlengeletano+ ni swibya hinkwaswo swo kwetsima leswi a swi ri etendeni. Vaprista ni Valevhi va swi rhwala. 5 Hosi Solomoni ni Vaisrayele hinkwavo lava vitaniweke leswaku va hlangana na yena, a va ri emahlweni ka Areka. Ku endliwa magandzelo+ hi tinyimpfu ni tihomu to tala swinene lerova a swi nga hlayeki.

6 Hiloko vaprista va nghenisa areka ya ntwanano wa Yehovha endhawini ya yona,+ eKamareni Ro Kwetsima Ngopfu, ehansi ka timpapa ta makerubu.+

7 Xisweswo makerubu a ma phurumule timpapa ta wona laha a ku ri ni Areka lerova ma funengeta Areka ni swikhomo swa yona.+ 8 Swikhomo+ swa yona a swi lehile lerova makumu ya swona a ma vonaka loko u ri eKamareni Ro Kwetsima emahlweni ka Kamara Ro Kwetsima Ngopfu, kambe a ma nga vonaki loko u ri ehandle. Swa ha ri kwalaho ninamuntlha. 9 Endzeni ka Areka a ko va ni maribye mambirhi ya swiphepherhele+ ntsena, lawa Muxe a ma vekeke kwalaho+ eHorebe, loko Yehovha a endla ntwanano+ ni Vaisrayele loko va huma etikweni ra Egipta.+

10 Loko vaprista va huma endhawini yo kwetsima, papa+ ri tate yindlu ya Yehovha.+ 11 Vaprista a va nga swi koti ku ya emahlweni va endla ntirho wa vona hikwalaho ka papa leri, hikuva ku vangama ka Yehovha a ku tate yindlu ya Yehovha.+ 12 Hi nkarhi wolowo Solomoni a ku: “Yehovha u vule leswaku u ta tshama emunyameni lowukulu.+ 13 Ndzi ku akele yindlu leyi tlakukeke, laha u nga ta tshama kona hilaha ku nga heriki.”+

14 Hiloko hosi yi hundzuluka yi sungula ku katekisa vanhu hinkwavo va Israyele naswona vanhu hinkwavo va Israyele a va lo yima.+ 15 Yi ku: “A ku dzunisiwe Yehovha Xikwembu xa Israyele, loyi hi nomu wakwe a tshembiseke tata wa mina Davhida kutani a endla leswi a swi tshembiseke hi voko rakwe, a ku, 16 ‘Ku sukela siku leri ndzi humeseke vanhu va mina ku nga Vaisrayele eEgipta, a ndzi hlawulanga muti etinyimbeni hinkwato ta Israyele laha ndzi nga ta akeriwa yindlu leyi nga ta vangamisa vito ra mina,+ kambe ndzi hlawule Davhida leswaku a va murhangeri wa vanhu va mina, ku nga Israyele.’ 17 Mbilu ya Davhida tata wa mina a yi navela ku aka yindlu leyi nga ta vangamisa vito ra Yehovha Xikwembu xa Israyele.+ 18 Kambe Yehovha u byele Davhida tata wa mina a ku, ‘Mbilu ya wena a yi navela ku ndzi akela yindlu leyi nga ta vangamisa vito ra mina, u endle kahle ku navela nchumu wo tano. 19 Hambiswiritano, a hi wena u nga ta aka yindlu leyi, kambe n’wana wa wena hi yena a nga ta ndzi akela yindlu leyi nga ta vangamisa vito ra mina.’+ 20 Yehovha u endle leswi a swi tshembiseke, hikuva ndzi tlhandlame Davhida tata wa mina naswona ndzi tshame exiluvelweni xa Israyele hilaha Yehovha a tshembiseke hakona. Ndzi tlhele ndzi aka yindlu leyi nga ta vangamisa vito ra Yehovha Xikwembu xa Israyele+ 21 naswona ndzi lulamise ndhawu kwalaho yo veka Areka leyi nga ni ntwanano+ lowu Yehovha a wu endleke ni vakokwa wa hina loko a va humesa etikweni ra Egipta.”

22 Hiloko Solomoni a yima emahlweni ka altari ya Yehovha emahlweni ka vanhu hinkwavo va Israyele, kutani a tlakusela mavoko yakwe ematilweni,+ 23 a ku: “Yehovha Xikwembu xa Israyele, a xi kona Xikwembu lexi fanaka na wena+ ematilweni kumbe emisaveni, u hlayisa ntwanano naswona u rhandza+ malandza ya wena lama ku tirhelaka hi timbilu hinkwato.+ 24 U endle leswi u tshembiseke nandza wa wena Davhida tata wa mina. U vule xitshembiso xexo hi nomu wa wena kutani namuntlha u xi endlile hi voko ra wena.+ 25 Yehovha Xikwembu xa Israyele, endla leswi u swi tshembiseke nandza wa wena Davhida tata wa mina loko u ku: ‘Exiluvelweni xa Israyele ku ta tshama ku ri ni munhu loyi a humaka endyangwini wa wena, loko ntsena vana va wena vo tshembeka eka mina hilaha na wena u endleke hakona.’+ 26 Xikwembu xa Israyele, ndzi kombela u endla leswi u swi tshembiseke nandza wa wena Davhida tata wa mina.

27 “Kambe, xana Xikwembu xi nga tshama emisaveni?+ Waswivo! Hambi ku ri matilo, tilo ra matilo a ma ku ringani;+ kutani yindlu leyi ndzi yi akeke i yitsongo swinene!+ 28 Hikwalaho yingisa xikhongelo xa nandza wa wena ni leswi a swi kombelaka, Yehovha Xikwembu xanga u tlhela u yingisa xirilo xa nandza wa wena ni xikhongelo lexi a xi endlaka emahlweni ka wena namuntlha. 29 Onge matihlo ya wena ma nga languta yindlu leyi vusiku ni nhlikanhi, ndhawu leyi u vuleke u ku, ‘Vito ra mina ri ta tshama kona,’+ leswaku u yingisa xikhongelo lexi nandza wa wena a xi endlaka endhawini leyi.+ 30 Yingisa loko nandza wa wena a kombela ku kombiwa tintswalo ni loko vanhu va wena ku nga Vaisrayele, va khongela va langute laha yindlu leyi yi nga kona, onge u nga yingisa u ri endhawini leyi u tshamaka eka yona ematilweni;+ onge u nga yingisa u tlhela u rivalela.+

31 “Loko munhu o dyohela munhu un’wana kutani a hlambanyisiwa ni ku tiboha hi ku ya hi xihlambanyo lexi a xi endleke, kutani loko a ha ri ehansi ka xihlambanyo xexo a ta ealtarini ya wena endlwini leyi,+ 32 onge u nga yingisa u ri ematilweni, u avanyisa malandza ya wena hi ku vula leswaku lowo homboloka u ni nandzu naswona u n’wi xupula hi ku ya hi leswi a swi endleke, loyi a lulameke u vula leswaku a nga na nandzu naswona u n’wi hakela hi ku ya hi mitirho ya yena leyinene.+

33 “Loko vanhu va wena, ku nga Vaisrayele va hluriwa hi valala va vona hikwalaho ka leswi va ku dyoheleke hi ku phindhaphindha,+ kutani va tlhelela eka wena va dzunisa vito ra wena,+ va khongela ni ku kombela leswaku u va komba tintswalo va ri endlwini leyi,+ 34 onge u nga yingisa u ri ematilweni, kutani u rivalela vanhu va wena, ku nga Vaisrayele xidyoho xa vona, u va tlherisela etikweni leri u ri nyikeke vakokwa wa vona.+

35 “Loko matilo ma pfariwile ku nga ni mpfula+ hikwalaho ka leswi va ku dyoheleke hi ku phindhaphindha,+ kutani va khongela eka wena va langute laha yindlu leyi yi nga kona, va dzunisa vito ra wena, ivi va hundzuka eswidyohweni swa vona hikwalaho ka leswi u va xupuleke,+ 36 onge wena u nga yingisa u ri ematilweni, u rivalela malandza ya wena, ku nga Vaisrayele, xidyoho xa vona, hikuva u ta va dyondzisa+ ndlela leyinene leyi va faneleke va famba ha yona; u va nisela mpfula etikweni+ leri u va nyikeke rona leswaku ri va ndzhaka ya vona.

37 “Loko ko va ni ndlala etikweni+ kumbe ntungu, dyandza, mfurho,*+ tinjiya leti onhaka; kumbe loko valala va vona vo va hlasela emutini wihi ni wihi wa tiko ra vona kumbe loko va hlaseriwa hi ntungu wihi ni wihi kumbe ku va ni vuvabyi,+ 38 xikhongelo xin’wana ni xin’wana, xikombelo+ xin’wana ni xin’wana xa ku kombela tintswalo lexi nga endliwaka hi munhu un’wana ni un’wana kumbe hi vanhu va wena hinkwavo, ku nga Vaisrayele, (hikuva un’wana ni un’wana u tiva leswi karhataka mbilu yakwe)+ loko va khongela va langute laha yindlu leyi yi nga kona, 39 onge u nga yingisa u ri ematilweni, laha u tshamaka kona+ naswona onge u nga rivalela+ u tlhela u pfuna; u hakela un’wana ni un’wana hi ku ya hi tindlela takwe hinkwato,+ hikuva u tiva mbilu yakwe (wena u ri wexe u yi tiva kahle mbilu ya munhu un’wana ni un’wana),+ 40 leswaku va ta ku chava masiku hinkwawo lawa va nga ta ma hanya etikweni leri u ri nyikeke vakokwa wa hina.

41 “Ni le ka muluveri loyi a nga riki un’wana wa vanhu va wena, ku nga Vaisrayele, loyi a humaka etikweni ra le kule hikwalaho ka vito*+ ra wena 42 (hikuva va ta twa hi vito+ ra wena lerikulu ni voko ra wena ra matimba ni voko ra wena leri tshambulutiweke), a fika a khongela a langute laha yindlu leyi yi nga kona, 43 onge wena u nga yingisa u ri ematilweni, laha u tshamaka kona,+ kutani u endlela muluveri hinkwaswo leswi a swi kombelaka eka wena, leswaku vanhu hinkwavo emisaveni va ta tiva vito ra wena va tlhela va ku chava+ hilaha vanhu va wena, ku nga Vaisrayele, va endlaka hakona, nileswaku va tiva leswaku vito ra wena ri dzunisiwa endlwini leyi ndzi yi akeke.

44 “Loko vanhu va wena va ya enyimpini va ya lwa ni valala va vona+ ku nga khathariseki leswaku hi le kwihi, kutani va khongela+ eka wena Yehovha va langute muti lowu u wu hlawuleke+ ni laha yindlu leyi ndzi yi akeleke vito ra wena yi nga kona,+ 45 yingisa xikhongelo xa vona u ri ematilweni ni xikombelo xa vona xo lava ku kombiwa tintswalo, u va lamulela.

46 “Loko vo ku dyohela (hikuva a nga kona munhu la nga dyohiki),+ kutani u va hlundzukela, u va nyiketa eka valala va vona, va va khoma va va yisa evuhlongeni etikweni ra valala va vona, ekule kumbe ekusuhi;+ 47 ivi va tianakanya kahle va ri etikweni leri va yisiweke evuhlongeni eka rona,+ kutani va tlhelela eka wena+ va kombela ku rivaleriwa va ri etikweni leri va nga mahlonga eka rona,+ va ku, ‘Hi dyohile naswona hi endle xihoxo; hi ni nandzu,’+ 48 kutani va tlhelela eka wena hi timbilu ta vona hinkwato+ ni hi vutomi* bya vona hinkwabyo va ri etikweni ra valala va vona lava va endleke mahlonga, va khongela eka wena va langute etikweni leri u ri nyikeke vakokwa wa vona ni le mutini lowu u wu hlawuleke ni le ndlwini leyi ndzi yi akeke leswaku ku vangamisiwa vito ra wena,+ 49 yingisa xikhongelo xa vona u ri ematilweni, laha u tshamaka kona+ ni xikombelo xa vona xo kombiwa tintswalo, u va lamulela, 50 u rivalela vanhu va wena lava ku dyoheleke, u va rivalela swidyoho swa vona hinkwaswo. U ta hundzula timbilu ta vanhu lava va va endleke mahlonga leswaku va va twela vusiwana, kutani va ta va twela vusiwana,+ 51 (hikuva i vanhu va wena ni ndzhaka ya wena+ leyi u yi humeseke eEgipta,+ endzeni ka xitiko lexi n’okisaka nsimbhi).+ 52 Onge matihlo ya wena ma nga languta nandza wa wena loko a kombela ku kombiwa tintswalo,+ niloko vanhu va wena, ku nga Vaisrayele, va kombela ku kombiwa tintswalo hi ku yingisa nkarhi wun’wana ni wun’wana loko va ku kombela.+ 53 Hikuva u va hlawurile evanhwini hinkwavo va misava leswaku va va ndzhaka ya wena,+ hilaha u vuleke hakona hi ku tirhisa Muxe nandza wa wena loko u humesa vakokwa wa hina eEgipta, Yehovha Hosi Leyi Tlakukeke.”

54 Hi ku hatlisa loko Solomoni a heta ku endla xikhongelo lexi hinkwaxo eka Yehovha ni ku kombela ku kombiwa tintswalo, a suka a yima emahlweni ka altari ya Yehovha, laha a a khinsame kona, mavoko yakwe a ma tlakusele ematilweni.+ 55 A suka a yima a va katekisa hi rito lerikulu Vaisrayele hinkwavo lava a va hlengeletanile, a ku: 56 “A ku dzunisiwe Yehovha loyi a nyikeke vanhu vakwe, ku nga Vaisrayele, ndhawu yo wisa eka yona hilaha a tshembiseke hakona.+ Switshembiso swa yena hinkwaswo leswinene leswi a swi tshembiseke hi ku tirhisa nandza wakwe Muxe swi hetisekile.+ 57 Onge Yehovha Xikwembu xa hina a nga va na hina hilaha a veke ni vakokwa wa hina hakona.+ A nga hi tshiki kumbe a hi fularhela.+ 58 Onge a nga hi endla hi navela+ ku famba etindleleni takwe hinkwato ni ku yingisa swileriso swakwe, milawu yakwe ni swiboho swakwe, leswi a leriseke vakokwa wa hina leswaku va swi yingisa. 59 Marito lawa ya mina, lawa ndzi kombeleke Yehovha hi ku titsongahata leswaku a ndzi komba tintswalo ha wona onge ma nga tsundzukiwa hi Yehovha Xikwembu xa hina vusiku ni nhlikanhi, leswaku nandza wakwe ni vanhu vakwe, ku nga Vaisrayele, va ta avanyisiwa hi ndlela leyinene, hilaha swi nga ta laveka hakona siku ni siku, 60 leswaku vanhu hinkwavo emisaveni va ta swi tiva leswaku Yehovha i Xikwembu xa ntiyiso.+ A ku na xin’wana!+ 61 Hikwalaho tirhelani Yehovha Xikwembu xa hina hi timbilu ta n’wina hinkwato+ hi ku yingisa milawu yakwe ni swileriso swakwe ku fana ni namuntlha.”

62 Kutani hosi ni tiko hinkwaro ra Israyele va endlela Yehovha magandzelo yo tala.+ 63 Solomoni a endlela Yehovha magandzelo yo kombela ku rhula:+ U dlaye tihomu ta 22 000 ni tinyimpfu ta 120 000. Kutani hosi ni Vaisrayele hinkwavo va khangula* yindlu ya Yehovha.+ 64 Hi siku rero hosi a yi fanele yi endla ndhawu leyi nga exikarhi ka xivava* leyi nga emahlweni ka yindlu ya Yehovha yi kwetsima, hikuva hosi a yi fanele yi ma endlela kwalaho magandzelo yo hisiwa ni magandzelo ya mavele ni mafurha ya magandzelo yo kombela ku rhula, hikuva altari ya koporo+ leyi nga emahlweni ka tempele ya Yehovha a yi ri yitsongo leswaku ku endliwa magandzelo yo hisiwa ni magandzelo ya mavele ni mafurha+ ya magandzelo yo kombela ku rhula eka yona. 65 Hi nkarhi wolowo Solomoni a endla nkhuvo+ ni tiko hinkwaro ra Israyele, ntshungu lowukulu lowu a wu huma eLebo-hamati* ku ya eNkoveni wa Egipta,+ emahlweni ka Yehovha Xikwembu xa hina, ku ringana masiku ya nkombo ni masiku man’wana ya nkombo, hinkwawo ka wona a ma ri 14. 66 Hi siku leri landzelaka,* a tshika vanhu va famba, vanhu va katekisa hosi kutani va famba timbilu ta vona ti tsakile hikwalaho ka vunene hinkwabyo+ lebyi Yehovha a byi endleleke Davhida nandza wakwe ni vanhu vakwe, ku nga Vaisrayele.