Vatesalonika Wo Sungula

1 Hi mina Pawulo, ndzi na Silvhano*+ na Timotiya,+ eka vandlha ra Vatesalonika leri nga ni vun’we ni Xikwembu Tatana na Hosi Yesu Kreste:

Onge mi nga va ni musa lowukulu ni ku rhula.

2 Mikarhi hinkwayo hi khensa Xikwembu loko hi vulavula hi n’wina hinkwenu eswikhongelweni swa hina,+ 3 hikuva hi tshama hi ri karhi hi tsundzuka ntirho wa n’wina wo tshembeka, ku tikarhata ka n’wina hi rirhandzu ni ku tiyisela ka n’wina hikwalaho ka ntshembo+ lowu mi nga na wona eka Hosi ya hina Yesu Kreste emahlweni ka Xikwembu tlhelo Tata wa hina. 4 Hikuva ha swi tiva vamakwerhu leswaku Xikwembu xa mi rhandza naswona xi mi hlawurile, 5 hikuva hi chumayele mahungu lamanene eka n’wina ku nga ri hi marito ntsena kambe ni hi matimba ni moya lowo kwetsima naswona ha tshemba leswaku leswi hi mi byeleke swona i ntiyiso, ma swi tiva leswaku hi ve vanhu va muxaka muni leswaku hi mi pfuna. 6 Mi ve vatekeleri va hina+ ni va Hosi,+ hileswi mi amukeleke rito ra Xikwembu mi ri emahlomulweni yo tala+ mi ri ni ntsako lowu humaka eka moya lowo kwetsima, 7 lerova mi ve xikombiso eka vapfumeri hinkwavo eMakedoniya ni le Akaya.

8 Mhaka hileswaku, a mi chumayelanga rito ra Yehovha* eMakedoniya ni le Akaya ntsena, kambe vanhu va twe hi ta ripfumelo ra n’wina eka Xikwembu etindhawini hinkwato,+ lerova a swi lavi hi vula nchumu. 9 Hikuva va ya emahlweni va vika ndlela leyi hi hlanganeke ro sungula ha yona na n’wina ni ndlela leyi mi hundzukeleke eka Xikwembu ha yona mi fularhela swikwembu+ swa n’wina swa hava leswaku mi tirhela Xikwembu lexi hanyaka ni xa ntiyiso, 10 ni ku rindzela N’wana wa xona loyi a humaka ematilweni,+ loyi xi n’wi pfuxeke eka lava feke, ku nga Yesu loyi a hi kutsulaka evukarhini lebyi taka.+