Vaefesa
3 Hikwalaho ka sweswo, mina Pawulo, ndzi mubohiwa+ wa Kreste Yesu hikwalaho ka n’wina vanhu va matiko, 2 loko hakunene mi swi twile leswaku ndzi nyikiwe vutihlamuleri+ bya ku mi pfuna leswaku mi vuyeriwa eka musa lowukulu wa Xikwembu 3 nileswaku ndzi paluxeriwe xihundla xo kwetsima, hilaha ndzi tshameke ndzi tsala hakona hi ku komisa. 4 Kutani loko mi hlaya leswi, mi nga swi xiya leswaku ndza xi twisisa xihundla xo kwetsima+ xa Kreste. 5 Eka vanhu lava hanyeke khale, a va tivisiwanga xihundla lexi hilaha sweswi xi paluxeriweke vaapostola vakwe vo kwetsima ni vaprofeta hi moya,+ 6 xa leswaku vanhu va matiko va fanele va va vadyandzhaka swin’we na hina va tlhela va va swirho swa miri+ ni ku hlanganyela na hina eka xitshembiso evun’weni na Kreste Yesu hi ku tirhisa mahungu lamanene. 7 Ndzi ve munhu loyi a mi pfunaka ku twisisa xihundla lexi xo kwetsima* hi ku ya hi nyiko ya mahala ya musa lowukulu wa Xikwembu lowu ndzi nyikiweke wona hi ndlela leyi matimba ya xona ma tirhaka ha yona.+
8 Mina, lontsongo eka vakwetsimi hinkwavo,+ ndzi nyikiwe musa lowu lowukulu,+ leswaku ndzi chumayela mahungu lamanene eka matiko hi ta rifuwo leri nga pimekiki ra Kreste 9 ni leswaku ndzi endla vanhu hinkwavo va vona ndlela leyi Xikwembu, lexi tumbuluxeke swilo hinkwaswo, xi xi tamelaka ha yona xihundla xa xona xo kwetsima+ lexi xi tumbeteke nkarhi wo leha. 10 Leswi a swi endleriwa leswaku sweswi, vutlhari bya Xikwembu+ lebyi kombisiwaka hi tindlela to hambanahambana byi tivisiwa mifumo ni valawuri etilweni hi ku tirhisa vandlha.+ 11 Leswi swi fambisana ni xikongomelo lexi nga heriki lexi xi tiyimiseleke ku xi endla ha Kreste+ Yesu Hosi ya hina, 12 loyi hikwalaho ka yena hi nga ni ntshunxeko wo vulavula naswona hi nga tshinelaka eka Xikwembu hi ku tshunxeka+ hikwalaho ka ripfumelo ra hina eka yena. 13 Hikwalaho ndza mi kombela leswaku mi nga heli matimba loko ndzi xanisiwa hikwalaho ka n’wina, hikuva mi ta vangamisiwa hikwalaho ka kona.+
14 Hikwalaho ka leswi ndzi khinsama eka Tatana, 15 loyi vito ra ndyangu wun’wana ni wun’wana etilweni ni laha misaveni ri humaka eka yena. 16 Ndzi khongelela leswaku, leswi Xikwembu xi nga ni ku vangama lokukulu xi tirhisa matimba ya moya wa xona leswaku xi tiyisa timbilu ni mianakanyo ya n’wina+ 17 ni leswaku hi ripfumelo ra n’wina Kreste a tshama etimbilwini ta n’wina hi rirhandzu.+ Onge mi nga dzima timitsu+ mi namarhela masungulo ya ripfumelo,+ 18 leswaku n’wina swin’we ni vakwetsimi hinkwavo mi kota ku twisisa ku anama ni ku leha ni ku tlakuka ni ku enta ka ntiyiso 19 ni ku tiva rirhandzu ra Kreste+ leri tlulaka vutivi, leswaku mi ta kuma hinkwaswo leswi Xikwembu xi mi nyikaka swona.
20 Kutani eka loyi matimba yakwe ma tirhaka eka hina,+ loyi a kotaka ku endla swo tala swinene ku tlula leswi hi swi kombelaka kumbe leswi hi swi ehleketaka,+ 21 vanhu hinkwavo a va n’wi dzunise hilaha ku nga heriki, hikwalaho ka vandlha ni hikwalaho ka Kreste Yesu. Amen.