Tikronika Ta Vumbirhi

17 Hiloko Yehoxafati+ n’wana wakwe a va hosi kutani a tiyisa vuhosi byakwe eIsrayele. 2 A veka masocha emitini hinkwayo leyi biyeleriweke ya le Yuda man’wana a ma veka eYuda ni le mitini ya Efrayimi leyi Asa tata wakwe a nga yi teka.+ 3 Yehovha a ya emahlweni a seketela Yehoxafati, hikuva a endla leswinene ku fana na Davhida+ kokwa wakwe, a nga swi tirhelanga swikwembu leswi vuriwaka Bali. 4 Hikuva u lavisise Xikwembu xa tata wakwe+ naswona u yingise swileriso swa xona, a nga landzelanga mikhuva ya Vaisrayele.+ 5 Yehovha a tiyisa mfumo wakwe;+ naswona tiko hinkwaro ra Yuda ri ya emahlweni ri nyika Yehoxafati tinyiko, hiloko a va ni rifuwo a tlhela a xiximiwa swinene.+ 6 A landzela milawu ya Yehovha hi mbilu hinkwayo,* a susa hambi ku ri tindhawu leti tlakukeke+ ni timhandzi ta Axera*+ eYuda.

7 Hi lembe ra vunharhu ra ku fuma kakwe u rhume tihosana takwe, Beni-hayili, Obadiya, Zakariya, Nethanele na Mikaya, leswaku va ya dyondzisa emitini ya Yuda. 8 A va ri ni Valevhi: Xemaya, Nethaniya, Zebadiya, Asahele, Xemiramoto, Yonatani, Adoniya, Thobiya na Tobi-adoniya swin’we na muprista Elixama na muprista Yehorama.+ 9 Va sungula ku dyondzisa eYuda, va ri ni buku ya Nawu wa Yehovha,+ va ya ni le mitini hinkwayo ya Yuda, va ri karhi va dyondzisa vanhu.

10 Mifumo hinkwayo leyi nga ekusuhi ni muti wa Yuda yi sungula ku chava Yehovha naswona a yi lwanga na Yehoxafati. 11 Vafilista va hakela Yehoxafati xibalo hi ku n’wi nyika tinyiko ni mali. Vaarabiya va n’wi tisela makhuna ya 7 700 ni swiphongo swa 7 700.

12 Yehoxafati a ya a va ni matimba swinene+ naswona a ya emahlweni a aka tindhawu leti biyeriweke+ ni miti leyi a ku hlayisiwa swilo+ eka yona eYuda. 13 U endle mitirho yo tala emitini ya Yuda naswona a a ri ni masocha, tinhenha ta matimba eYerusalema. 14 A va xaxametiwe hi ku ya hi mindyangu ya vona: eka Yuda tindhuna ta magidi, ndhuna Adina, a a ri ni tinhenha ta matimba ta 300 000.+ 15 Ehansi ka yena a ku tirha ndhuna Yehohanani, a a ri ni masocha ya 280 000. 16 Nakambe Amasiya n’wana wa Zikiri a a tirha ehansi ka yena, a tinyiketele ku tirhela Yehovha naswona a a ri ni tinhenha ta 200 000. 17 Eka Benjamini+ a ku ri na Eliyada loyi a a ri nhenha ya matimba naswona a ri ni masocha ya 200 000 lama hlomeke hi vurha ni xitlhangu.+ 18 Ehansi ka yena a ku tirha Yohozabadi loyi a a ri ni masocha ya 180 000 lama hlomeleke nyimpi. 19 Lava hi vona lava a va tirhela hosi ku engetela eka lava hosi a yi va veke emitini leyi biyeriweke etikweni hinkwaro ra Yuda.+