Yobo
2 Endzhaku ka sweswo, ku fika siku leri vana va Xikwembu xa ntiyiso*+ va nga nghena va yima emahlweni ka Yehovha,+ Sathana na yena a fika a nghena exikarhi ka vona, leswaku a yima emahlweni ka Yehovha.+
2 Yehovha a vutisa Sathana a ku: “U huma kwihi?” Sathana a hlamula Yehovha a ku: “A ndzi rhendzeleka emisaveni, ndzi fambafamba eka yona.”+ 3 Hiloko Yehovha a vutisa Sathana a ku: “Xana u n’wi vonile nandza wa mina Yobo? A nga kona loyi a fanaka na yena emisaveni. U lulamile naswona wa tshembeka,+ u chava Xikwembu naswona u papalata leswo biha. Wa ha tshembekile nisweswi+ hambileswi u ndzi hlohlotelaka ku n’wi lovisa*+ ku nga ri na xivangelo.” 4 Kambe Sathana a hlamula Yehovha a ku: “Nhlonge hi nhlonge. Munhu u ta humesa hinkwaswo leswi a nga na swona leswaku a ponisa vutomi byakwe. 5 Kambe, wa nga tlakusa voko ra wena u ba miri ni marhambu yakwe, u ta swi vona u ta ku rhukana.”+
6 Kutani Yehovha a ku eka Sathana: “Vona! U le mavokweni ya wena! Ntsena u nga n’wi dlayi!” 7 Kutani Sathana a suka emahlweni ka Yehovha, a ya ba Yobo hi marhumba yo vava swinene,+ ku sukela enkondzweni ku ya fika ethavathaveni. 8 Yobo a teka xirhengele leswaku a tinwaya hi xona, a ya tshama enkumeni.+
9 Eku heteleleni nsati wakwe a ku eka yena: “Xana nisweswi wa ha ya emahlweni u tshembeka? Rhukana Xikwembu u fa!” 10 Kambe a ku eka yena: “U vulavula ku fana ni wansati wo hunguka. Xana hi fanele hi amukela leswinene ntsena eka Xikwembu xa ntiyiso, hi nga amukeli ni leswo biha?”+ Eka leswi hinkwaswo, Yobo a nga dyohanga hi nomu wakwe.+
11 Hiloko vanghana vanharhu va Yobo va twa hi ta makhombo lama n’wi weleke, kutani va ta, ha un’we a a huma endhawini yakwe, Elifazi+ a a huma eTemani, Bilidadi+ a a huma eXuwa+ kasi Sofara+ a a huma eNamani. Va twanane ku hlangana leswaku va ta ya n’wi tshandzisa ni ku n’wi chavelela. 12 Loko va n’wi vona va ha ri ekule a va nga n’wi tivi. Kambe loko va tshinela va sungula ku tlhava mukhosi ni ku handzula swiambalo swa vona, va tlhela va haxa ritshuri emoyeni va tichela hi rona etinhlokweni.+ 13 Hiloko va tshama na yena ehansi ku ringana masiku ya nkombo ni vusiku bya nkombo. A nga kona eka vona loyi a n’wi vulavuriseke, hikuva a va swi vona leswaku a a twa ku vava swinene.+