Timotiya Wo Sungula

4 Hambiswiritano, moya wa Xikwembu wu vula leswaku enkarhini lowu taka ku ta fika nkarhi lowu vanhu van’wana va nga ta ka va nga ha vi na ripfumelo, va yingisa timhaka leti nga riki ntiyiso leti vonakaka onge ti huma eka Xikwembu+ swin’we ni ku yingisa tidyondzo ta madimona, 2 naswona va ta yingisela vanhu lava kanganyisaka lava vulavulaka mavunwa,+ lava mapfalo ya vona ma tlanyaleke onge hiloko ma hisiwe hi nsimbhi yo hisa. 3 Va arisa vanhu ku tekana+ naswona va byela vanhu leswaku va tshika swakudya+ leswi endliweke hi Xikwembu leswaku lava nga ni ripfumelo+ ni lava wu tivaka kahle ntiyiso, va ta swi dya+ kutani va khensa Xikwembu. 4 Hikuva swilo hinkwaswo leswi tumbuluxiweke hi Xikwembu i swinene+ naswona a ku na nchumu lowu faneleke wu tshikiwa+ loko wu amukeriwe hi swikhongelo swo khensa, 5 hikuva wu kwetsimisiwa hi rito ra Xikwembu ni xikhongelo.

6 Loko u nyika vamakwerhu ndzayo leyi, u ta va mutirhi lonene wa Kreste Yesu loyi a wundliweke hi marito ya ripfumelo ni ya dyondzo leyinene leyi u yi landzelerisiseke.+ 7 Kambe fularhela mitsheketo,*+ yo fana ni leyi vuriwaka hi vakhegula. Hi hala tlhelo, tiletele hi xikongomelo xa leswaku u tinyiketela eka Xikwembu. 8 Hikuva ku endla vutiolori swa pfuna katsongo kambe ku tinyiketela eka Xikwembu swi pfuna eka swilo hinkwaswo, tanihi leswi ku nga ni xitshembiso xa vutomi sweswi ni le nkarhini lowu taka.+ 9 Mhaka leyi ya tshembeka naswona yi fanele yi amukeriwa hi ku helela. 10 Hi yona mhaka leyi hi tirhaka hi matimba+ naswona hi tikarhataka, hikuva hi tshemba Xikwembu lexi hanyaka, lexi nga Muponisi+ wa vanhu hinkwavo,+ ngopfungopfu wa lava tshembekaka.

11 Yana emahlweni u letela vanhu timhaka leti u va dyondzisa tona. 12 Vanhu va nga tshuki va ku langutela ehansi hileswi u nga muntshwa. Ku ri na sweswo, vana xikombiso lexinene eka lava tshembekaka, hi ku vulavula, hi ku tikhoma, hi rirhandzu, hi ripfumelo ni hi mahanyelo ya wena. 13 Yana emahlweni u tinyiketela loko u hlaya emahlweni ka vanhu,+ loko u khongotela* ni loko u dyondzisa ku fikela loko ndzi fika. 14 U nga yi languteli ehansi nyiko leyi u nyikiweke yona hi ku tirhisa vuprofeta loko huvo ya vakulu yi ku tlhandleka mavoko.+ 15 Anakanyisisa hi swilo leswi; u dzika eka swona, leswaku vanhu hinkwavo va ta swi vona leswaku u Mukreste loyi a wupfeke. 16 Tikarhatele ku va xikombiso lexinene ni ku va mudyondzisi lonene.+ Yana emahlweni u endla swilo leswi, hikuva loko u endla tano u ta tiponisa u tlhela u ponisa ni lava ku yingisaka.+