Vaefesa
2 Ku tlula kwalaho, Xikwembu xi mi hanyisile hambileswi a mi file hikwalaho ka swihoxo ni swidyoho swa n’wina,+ 2 leswi mi tshameke mi hanya ha swona hi ku ya hi mahanyelo ya misava leyi,+ hi ku ya hi mufumi loyi a lawulaka moya lowu+ sweswi wu tirhaka eka vana lava nga yingisiki. 3 Hinkwerhu hi tshame hi tikhoma hi ku pfumelelana ni ku navela ka nyama ya hina+ exikarhi ka vona, hi endla leswi rhandziwaka hi nyama ni miehleketo ya hina+ naswona hi ntumbuluko a hi ri vana lava faneleke ku kombisiwa vukarhi+ ku fana ni lavan’wana hinkwavo. 4 Kambe leswi Xikwembu xi nga ni tintswalo letikulu,+ hikwalaho ka rirhandzu ra xona lerikulu leri xi hi rhandzeke ha rona,+ 5 xi hi hanyise swin’we na Kreste, hambileswi a hi file hikwalaho ka swidyoho+—mi ponisiwile hi musa lowukulu. 6 Ku tlula kwalaho, xi hi pfuxe swin’we xi hi tshamisa swin’we etilweni evun’weni na Kreste Yesu,+ 7 leswaku enkarhini lowu taka xi ta kombisa musa wa xona lowukulu hikwalaho ka nsovo wa xona evun’weni na Kreste Yesu.
8 Mi ponisiwile hikwalaho ka ripfumelo,+ hi musa lowu lowukulu naswona a ku nga ri hikwalaho ka matshalatshala ya n’wina; kambe i nyiko ya Xikwembu. 9 E-e, ku nga ri hikwalaho ka mitirho ya n’wina,+ ku endlela leswaku ku nga vi na munhu loyi a nga ni xivangelo xo tibuma. 10 Hi endliwe+ hi Xikwembu naswona leswi hi nga vadyondzisiwa va Kreste Yesu+ hi vumberiwe ku endla mitirho leyinene, leyi Xikwembu xi yi lunghiseleleke khale leswaku hi famba eka yona.
11 Hikwalaho, n’wina vanhu vamatiko hi ku velekiwa tsundzukani leswaku lava vuriwaka “lava yimbeke,” lava yimbisiweke enyameni hi mavoko ya vanhu, a va mi vula “lava nga yimbangiki.” 12 Hi nkarhi wolowo a mi nga n’wi tivi Kreste, a mi hambanisiwile ni tiko ra Israyele naswona a mi nga katsiwanga eka mintwanano ya xitshembiso;+ a mi nga ri na ntshembo naswona a mi nga tivi Xikwembu emisaveni.+ 13 Kambe leswi sweswi mi nga vadyondzisiwa va Kreste Yesu, n’wina lava mi tshameke mi va ekule ngopfu ni Xikwembu mi le kusuhi na xona hi ngati ya Kreste. 14 Hikuva yena i ku rhula ka hina,+ loyi a endleke mitlawa yimbirhi yi va wun’we+ kutani a mbundzumuxa khumbi leri nga exikarhi leri a ri yi hambanisa.+ 15 Hi miri* wa yena u herise vulala, Nawu lowu nga ni swileriso leswaku a endla mitlawa leyimbirhi leyi nga vadyondzisiwa vakwe yi va munhu un’we lontshwa+ naswona a endla ku rhula, 16 ni ku vuyelelanisa mitlawa leyimbirhi ya vanhu hi ku helela yi va miri wun’we eka Xikwembu hi mhandzi ya yena ya nxaniso,*+ hikuva u dlaye vulala+ hi miri wakwe. 17 Naswona u tile kutani a chumayela mahungu lamanene ya ku rhula eka n’wina lava a mi ri ekule ngopfu ni ku rhula eka lava nga ekusuhi, 18 hikuva hikwalaho ka yena, hina lava nga eka mintlawa leyimbirhi, hi kota ku tshinelela Tatana hi moya wun’we.
19 Hikwalaho, sweswi a ma ha ri vanhu lava humaka etikweni rin’wana,+ kambe mi vaakatiko swin’we+ ni vakwetsimi naswona mi swirho swa ndyangu wa Xikwembu,+ 20 kutani mi akiwe ehenhla ka masungulo ya vaapostola ni vaprofeta,+ kasi Kreste Yesu yena i ribye ra nkoka swinene ra masungulo.+ 21 Muako hinkwawo lowu nga ni vun’we na yena lowu hlanganisiweke hi vun’we,+ wa kula wu va tempele yo kwetsima ya Yehovha.*+ 22 Leswi mi nga ni vun’we na Kreste, Xikwembu xi endle leswaku n’wina ni van’wana mi va yindlu leyi xi tshamaka eka yona hikuva moya wa xona wu kwalaho.+