Mitirho

19 Loko Apolosi+ a ri eKorinto, Pawulo a tsemakanya etindhawini ta le xikarhi ka tiko a ya eEfesa.+ Kwalaho u kume vadyondzisiwa van’wana 2 hiloko a va vutisa a ku: “Xana mi wu kumile moya lowo kwetsima loko mi va vapfumeri?”+ Va n’wi hlamula va ku: “Phela, a hi si tshama hi swi twa leswaku ku ni moya lowo kwetsima.” 3 Hiloko a ku: “Kutani, mi khuvuriwe hi nkhuvulo wa mani?” Va ku: “Hi nkhuvulo wa Yohane.”+ 4 Pawulo a ku: “Yohane u khuvule hi nkhuvulo lowu yimelaka ku hundzuka,+ a byela vanhu leswaku va pfumela eka loyi a taka endzhaku ka yena,+ hileswaku, eka Yesu.” 5 Loko va twa sweswo, va khuvuriwa hi vito ra Hosi Yesu. 6 Loko Pawulo a va tlhandleka mavoko, va kume moya lowo kwetsima,+ kutani va sungula ku vulavula hi tindzimi ni ku profeta.+ 7 A ku ri ni vavanuna va kwalomu ka 12.

8 Pawulo a vulavula hi xivindzi esinagogeni+ ku ringana tin’hweti tinharhu, a a dyondzisa vanhu a tlhela a vulavula hi ndlela leyi khorwisaka hi Mfumo wa Xikwembu.+ 9 Kambe loko van’wana va sihalala va nga lavi ku pfumela,* va vulavula ku biha hi Ndlela+ emahlweni ka ntshungu, a suka eka vona+ kutani a teka vadyondzisiwa va hambana na vona, a hamba a ya va dyondzisa siku ni siku eholweni ya xikolo xa Tirano. 10 Leswi swi endleke tano ku ringana malembe mambirhi, lerova hinkwavo lava tshamaka emugangeni wa Asiya va twa rito ra Hosi, Vayuda ni Magriki.

11 Kutani Xikwembu xi ya emahlweni xi endla mitirho ya matimba yo hlamarisa hi ku tirhisa Pawulo,+ 12 lerova a ku tekiwa malapi ni mafasikoti lama khumbeke miri wakwe swi yisiwa eka vanhu lava vabyaka,+ kutani va hola ni mimoya leyo homboloka yi huma.+ 13 Kambe Vayuda van’wana lava a va famba va hlongola madimona na vona va ringeta ku tirhisa vito ra Hosi Yesu eka lava a va ri ni mimoya yo homboloka; a va ku: “Ndza mi lerisa hi vito ra Yesu loyi Pawulo a chumayelaka ha yena.”+ 14 A ku ri ni vana va nkombo va majaha va muprista lonkulu wa Muyuda loyi a va ku i Skevha lava a va endla sweswo. 15 Kambe moya wo homboloka wu ku eka vona: “Yesu+ ndza n’wi tiva naswona Pawulo+ ndzi n’wi toloverile; kambe n’wina mi vamani?” 16 Hiloko munhu loyi a a ri ni moya wo homboloka a va tlulela, a va tlatlalata ha un’we un’we a va hlula, lerova va baleka va huma endlwini yoleyo va nga ambalanga, va vavisekile. 17 Leswi swi tiveka eka hinkwavo, eka Vayuda ni Magriki lava a va tshama eEfesa; hiloko hinkwavo va sungula ku chava kutani vito ra Hosi Yesu ri ya emahlweni ri dzunisiwa. 18 Kutani vo tala va lava va veke vapfumeri a va ta, va fika va tivula ni ku vika swiendlo swa vona va nga fihli nchumu. 19 Hakunene, vo tala lava a va hanya hi masalamusi va hlengelete tibuku ta vona kutani va ti hisa emahlweni ka vanhu.+ Kutani va hlayela nxavo wa tona, va kuma leswaku a ti durha swiphemu swa silivhere swa 50 000. 20 Xisweswo rito ra Yehovha* ri ya ri kula ni ku hlula hi ndlela ya matimba.+

21 Endzhaku ka loko ku humelele swilo leswi, Pawulo a tibyela leswaku loko a vuya hi le eMakedoniya+ ni le Akaya u ta ya eYerusalema.+ A ku: “Loko ndzi yile kwalaho, ndzi fanele ndzi ya na le Rhoma.”+ 22 Kutani a rhuma vavanuna vambirhi exikarhi ka vapfuni va yena, ku nga Timotiya+ na Erasto,+ leswaku va ya eMakedoniya kambe yena a sala exifundzheni xa Asiya ku ringana nkarhinyana.

23 Hi nkarhi wolowo ku pfuka hasahasa leyikulu+ mayelana ni Ndlela.+ 24 Hikuva wanuna un’wana la vuriwaka Demetriyo, mufuri wa silivhere loyi a a endla titempele letitsongo ta Artemi hi silivhere, a a fuwisa vo tala lava kotaka ku endla ntirho wolowo.+ 25 A va hlengeleta ni van’wana lava a va kota ku endla mitirho yo tano a ku: “Vavanuna, mi swi tiva kahle leswaku hi fuwisiwa hi bindzu leri. 26 Ma swi vona mi tlhela mi swi twa leswaku wanuna loyi va nge i Pawulo, u hundzule ntshungu lowukulu a wu dyondzisa dyondzo yin’wana, a vula leswaku swikwembu leswi endliweke hi mavoko a hi swikwembu swa ntiyiso,+ ku nga ri eEfesa+ ntsena kambe ni le xifundzheni hinkwaxo xa Asiya. 27 Ku tlula kwalaho, ku ni khombo ra leswaku bindzu ra hina ri ta heleriwa hi ndhuma ni ra leswaku tempele ya Artemi xikwembukati lexikulu yi ta langutiwa yi nga ri nchumu naswona xikwembu lexi a xi nge he gandzeriwi ni ku dzunisiwa exifundzheni hinkwaxo xa Asiya ni le misaveni hinkwayo.” 28 Loko vanhu va twa sweswo, va hlundzuka ngopfu kutani va huwelela, va ku: “Artemi wa Vaefesa u ni matimba!”

29 Hiloko muti wu va ni hasahasa, kutani vanhu va tsutsumela eholweni ya mitlango, va ri karhi va kokakoka Gayo na Aristako+ vavanuna va le Makedoniya, lava a va famba na Pawulo. 30 Loko ku ri Pawulo a a swi lava ku nghena a ya vulavula ni vanhu kambe vadyondzisiwa a va nga n’wi pfumeleli. 31 Hambi ku ri valawuri van’wana va mikhuvo ni mitlango, lava a va ri ni xinghana eka Pawulo va rhumela vanhu va ya n’wi byela leswaku a nga hoxi vutomi byakwe ekhombyeni hi ku nghena eholweni ya mitlango. 32 Entiyisweni, van’wana a va huwelela leswi kasi van’wanyana a va huwelela swin’wana; hikuva ntshungu a wu pfilunganyekile naswona vo tala va vona a va nga xi tivi xivangelo xa ku hlengeletana ka vona. 33 Hiloko va humesa Alekzanda exikarhi ka ntshungu, Vayuda va n’wi dlidlimbetela emahlweni, kutani Alekzanda a yimisa voko a lava ku tihlamulela eka vanhu. 34 Kambe loko va xiya leswaku a a ri Muyuda, hinkwavo va sungula ku huwelela hi rito rin’we kwalomu ka tiawara timbirhi va ku: “Artemi wa Vaefesa u ni matimba!”

35 Endzhaku ka loko matsalana wa muti a kote ku miyeta ntshungu, u te: “Vavanuna va le Efesa, xana u kona exikarhi ka vanhu loyi a nga swi tiviki leswaku muti wa Vaefesa i muhlayisi wa tempele ya Artemi lonkulu ni wa xifaniso lexi weke xi huma etilweni? 36 Leswi swilo leswi swi nga kanetekiki, mi fanele mi ehlisa moya naswona mi nga endli swilo hi magugu. 37 Hikuva mi tise vanhu lava laha lava nga riki vayivi etitempeleni naswona a va xi rhukananga xikwembukati xa hina. 38 Hikwalaho loko Demetriyo+ ni lava tirhaka na yena va lava ku mangalela munhu wo karhi, masiku ya ku tenga ma kona naswona vaholobye* va kona; a va te va ta mangala. 39 Kambe loko mi lava leswi tlulaka sweswo, swi fanele swi bohiwa enhlengeletanweni leyi tolovelekeke. 40 Hikuva hakunene hi le khombyeni ra ku hehliwa hi ku pfukela mfumo hikwalaho ka leswi endlekeke namuntlha hileswi hi nga riki na xivangelo xa ntshungu lowu wa vapfukeri lava nga ni hasahasa.” 41 Endzhaku ka loko a vule leswi, a hangalasa vanhu.