Vakorinto Wo Sungula

8 Eka mhaka ya swakudya leswi nyikeriwaka swikwembu:+ Ha swi tiva leswaku hinkwerhu hi ni vutivi.+ Vutivi byi endla munhu a tikukumuxa, kambe rirhandzu ra aka.+ 2 Loko munhu a ehleketa leswaku u tiva xo karhi, u va a nga si xi tiva hilaha a faneleke a xi tiva ha kona. 3 Kambe loko munhu a rhandza Xikwembu, u tiviwa hi xona.

4 Loko ku ri ku dya swakudya leswi nyikeriwaka swikwembu, ha swi tiva leswaku xifaniso xa hava a hi nchumu+ emisaveni ni leswaku ku ni Xikwembu xin’we ntsena.+ 5 Hambileswi ku nga ni leswi vuriwaka swikwembu, etilweni kumbe emisaveni,+ tanihi leswi ku nga ni “swikwembu” swo tala ni “tihosi” to tala, 6 kambe eka hina ku ni Xikwembu xin’we,+ ku nga Tatana,+ loyi swilo hinkwaswo swi humaka eka yena naswona hina hi va yena;+ nakambe ku ni Hosi yin’we, ku nga Yesu Kreste, loyi swilo hinkwaswo swi veke kona ha yena,+ naswona na hina hi ve kona ha yena.

7 Hambiswiritano, a hi vanhu hinkwavo lava nga ni vutivi lebyi.+ Kambe van’wana, hikwalaho ka leswi a va gandzela swikwembu, loko va dya swakudya leswi nyikeriweke eka swikwembu,+ va anakanya leswaku va gandzela xikwembu xa hava kutani ripfalo ra vona ra va kingindza* hileswi ri tsaneke.+ 8 Kambe swakudya a swi nge endli leswaku hi amukeleka eka Xikwembu;+ loko hi nga dyi, a hi lahlekeriwi hi nchumu naswona loko hi dya, a hi vuyeriwi hi nchumu.+ 9 Kambe tshamani mi ri karhi mi tivonela leswaku mfanelo ya n’wina yo hlawula yi nga khunguvanyisi lava tsaneke.+ 10 Hikuva loko un’wana o ku vona, wena loyi u nga ni vutivi, u dya swakudya etempeleni ya swikwembu swa hava, xana ripfalo ra munhu yoloye la tsaneke a ri nge n’wi nyiki xivindzi xa ku dya swakudya leswi nyikeriweke swikwembu? 11 Hikwalaho, makwenu loyi a tsaneke loyi Kreste a n’wi feleke wa onhaka hi mhaka ya vutivi bya n’wina.+ 12 Loko mi dyohela vamakwenu hi ndlela leyi kutani mi vavisa ripfalo ra vona leri tsaneke,+ mi dyohela Kreste. 13 Loko ku ri leswaku swakudya swi khunguvanyisa makwerhu, a ndzi nge he pfuki ndzi dye nyama nikatsongo leswaku ndzi nga khunguvanyisi makwerhu.+