Eklesiasta
4 Ndzi tlhele ndzi xiya ndlela leyi vanhu va tshikileriwaka ha yona emisaveni. Ndzi vone mihloti ya lava tshikileriwaka naswona a ku nga ri na loyi a va chavelelaka.+ Naswona lava va tshikilelaka a va ri ni matimba, a ku nga ri na munhu wo va chavelela. 2 Kutani ndzi khensise lava se va feke ku ri ni lava hanyaka.+ 3 Kambe loyi a antswaka ku tlula hinkwavo hi loyi a nga si velekiwaka,+ loyi a nga si vonaka mitirho yo tika leyi endliwaka emisaveni.+
4 Ndzi tlhele ndzi swi xiya leswaku ku tikarhata ka vanhu vo tala ni ku humelela ka vona ku susumetiwa hi ku phikizana ni van’wana;+ leswi na swona a swi pfuni nchumu, i ku hlongorisa moya.
5 Xiphukuphuku xi tshama hi mavoko kutani xi dlaya hi ndlala.*+
6 Swa antswa ku wisa ku ri ni ku tshamela ku tirha ni ku hlongorisa moya.+
7 Ndzi tlhele ndzi xiya mhaka yin’wana leyi humelelaka laha misaveni leyi nga pfuniki nchumu: 8 Ku ni munhu loyi a nga yexe, loyi a nga riki na munghana; a nga na n’wana kumbe makwavo kambe a nga tshiki ku tirha hi matimba. A nga eneriseki hi rifuwo.+ Kambe a nga pfi a tivutisa a ku, ‘Kasi ndzi tirhela vamani hi matimba ndzi tlhela ndzi titsona swilo leswinene’?+ Leswi na swona a swi pfuni nchumu, i ntirho lowu dyisaka mbitsi.+
9 Vambirhi va antswa ku tlula un’we,+ hikuva va ni hakelo leyinene ya ntirho wa vona wa matimba. 10 Hikuva loko un’wana wa vona a wa, loyi un’wana a nga n’wi pfuxa. Kambe, xana ku ta endleka yini loko munhu a wa ku nga ri na loyi a nga n’wi pfunaka?
11 Ku engetela kwalaho, loko vanhu vambirhi va etlela swin’we va kufumela, kambe wun’we a nga kufumerisa ku yini? 12 Munhu wo karhi a nga hlula un’we a ri yexe kambe vambirhi va nga n’wi hlula. Ni ntambhu ya miluko yinharhu a yi nge tsemeki hi ku olova.
13 N’wana loyi a nga xisiwana kambe a tlharihile wa antswa ku ri ni hosi leyi dyuhaleke leyi nga xiphukuphuku+ leyi alaka ku tsundzuxiwa.+ 14 Hikuva u* hume ekhotsweni leswaku a ta va hosi+ hambileswi a velekiweke a ri xisiwana.+ 15 Ndzi va vonile vanhu hinkwavo lava hanyaka emisaveni swin’we ni ndlela leyi swi n’wi fambelaka ha yona n’wana loyi a nga ta teka xitulu xa vuhosi. 16 Hambileswi a tshamaka a ri ni vaseketeri, kambe lava nga ta va kona endzhaku a va nge vi na mhaka na yena.+ Leswi na swona a swi pfuni nchumu, i ku hlongorisa moya.