Ezekiyele

34 Yehovha a tlhela a vulavula na mina a ku: 2 “N’wana wa munhu, profeta ku lwisana ni varisi va Israyele. Profeta u byela varisi u ku, ‘Yehovha Hosi Leyi Tlakukeke u ri: “Khombo eka varisi va Israyele,+ lava a va tikhathalela vona vini! Xana varisi a va fanelanga va khathalela ntlhambi?+ 3 Mi dya mafurha, mi ambala voya naswona mi tlhava swifuwo swo nona+ kambe a mi wu khathaleli ntlhambi.+ 4 A mi ti tiyisanga tinyimpfu leti tsaneke kumbe ku horisa leti vabyaka kumbe mi bohelela leti vavisekeke kumbe mi vuyisa leti hambukeke kumbe mi lava leti lahlekeke;+ kambe mi ti fume hi ndlela yo biha ni ya tihanyi.+ 5 Kutani ti hangalakile hikuva a ku nga ri na murisi;+ ti hangalakile ti va swakudya swa swiharhi. 6 Tinyimpfu ta mina a ti lahleka etintshaveni hinkwato ni le swintshabyanini hinkwaswo; tinyimpfu ta mina ti hangalake ni misava hinkwayo ku nga ri na loyi a yaka a ya ti lava.

7 “‘“Hikwalaho, n’wina varisi yingisani rito ra Yehovha leri nge: 8 ‘“Leswi ndzi hanyaka,” ku vula Yehovha Hosi Leyi Tlakukeke, “hikwalaho ka leswi tinyimpfu ta mina ti dlayiweke ti tlhela ti va swakudya swa swiharhi hinkwaswo hikuva a ku nga ri na murisi ni leswi varisi va mina va nga ti lavisisangiki tinyimpfu ta mina; kambe va yeke emahlweni va tikhathalela vona vini kambe va nga ti khathaleli tinyimpfu ta mina,”’ 9 hikwalaho, n’wina varisi yingisani rito ra Yehovha. 10 Yehovha Hosi Leyi Tlakukeke u ri: ‘Ndzi lwa ni varisi naswona ndzi ta lava tinyimpfu ta mina eka vona, ndzi ta va tshikisa ku khathalela tinyimpfu+ ta mina naswona na vona vini a va nge he tikhathaleli. Ndzi ta ponisa tinyimpfu ta mina enon’wini wa vona, a ti nge he vi swakudya swa vona.’”

11 “‘Yehovha Hosi Leyi Tlakukeke u ri: “Ndzi kona naswona ndzi ta lavisisa tinyimpfu ta mina, ndzi ta ti khathalela.+ 12 Ndzi ta khathalela tinyimpfu ta mina ku fana ni murisi loyi a kumeke tinyimpfu takwe leti a ti hangalakile kutani a ti risa.+ Ndzi ta ti ponisa etindhawini hinkwato leti ti hangalakeleke eka tona hi siku ra mapapa ni munyama lowukulu.+ 13 Ndzi ta ti humesa exikarhi ka vanhu, ndzi ti hlengeleta ku suka ematikweni man’wana, ndzi ti tisa etikweni ra tona ndzi ti khathalela etintshaveni ta Israyele,+ eswinambyanini ni le tindhawini hinkwato ta tiko leti ku tshamiwaka eka tona. 14 Ndzi ta ti risela emadyelweni lamanene naswona tiko leri ti nga ta dyela eka rona ri ta va etintshaveni leti tlakukeke ta Israyele.+ Ti ta vundza etikweni rero leri nga ni madyelo lamanene+ naswona ti ta dya emadyelweni lamanene etintshaveni ta Israyele.”

15 “‘“Ndzi ta khathalela tinyimpfu ta mina,+ ndzi ta ti tshika ti vundza,”+ ku vula Yehovha Hosi Leyi Tlakukeke. 16 “Leyi lahlekeke ndzi ta yi lavisisa,+ leyi hambukeke ndzi ta yi vuyisa, leyi vavisekeke ndzi ta yi bohelela, leyi tsaneke ndzi ta yi tiyisa; kambe leyi noneke ni leyi nga ni matimba ndzi ta yi lovisa. Ndzi ta yi avanyisa naswona ndzi ta yi xupula hi ku ya hi swiendlo swa yona.”

17 “‘N’wina tinyimpfu ta mina, Yehovha Hosi Leyi Tlakukeke u ri: “Ndzi ta avanyisa tinyimpfu ta mina ku nga ri khale, ndzi ta avanyisa makhuna ni swiphongo.+ 18 Xana a swi enelanga leswaku mi dyela eka madyelo lamanene ngopfu? Xana mi fanele mi tlhela mi kandziyela madyelo laman’wana ya n’wina? Xana mi fanele mi dunga mati hi milenge ya n’wina endzhaku ka loko mi nwe mati lama tengeke swinene? 19 Xana tinyimpfu ta mina ti fanele ti dyela eka madyelo lama kandziyeriweke hi n’wina, ti tlhela ti nwa mati lama dungiweke hi n’wina?”

20 “‘Hikwalaho Yehovha Hosi Leyi Tlakukeke u ri eka vona: “Ndzi kona naswona ndzi ta avanyisa exikarhi ka nyimpfu yo nona ni nyimpfu yo ondza, 21 hikuva a mi tshamela ku ti susumeta hi tsheve ni katla naswona a mi tshamela ku susumeta hinkwato leti vabyaka hi timhondzo kukondza mi ti hangalasa ematikweni man’wana. 22 Ndzi ta ponisa tinyimpfu ta mina, a ti nge he hlaseriwi;+ ndzi ta avanyisa tinyimpfu. 23 Ndzi ta ti vekela murisi un’we,+ nandza wa mina Davhida,+ u ta ti khathalela. U ta ti khathalela naswona u ta va murisi wa tona.+ 24 Mina Yehovha, ndzi ta va Xikwembu+ xa tona naswona nandza wa mina Davhida u ta va ndhuna exikarhi ka tona.+ Mina Yehovha ndzi vurile.

25 “‘“Ndzi ta endla ntwanano wa ku rhula na tona+ naswona ndzi ta herisa swivandzana leswi nga ni khombo+ etikweni leswaku ti ta tshama ti sirhelelekile emananga, ti etlela emakhwatini.+ 26 Ndzi ta endla leswaku tona ni ndhawu leyi nga ekusuhi ni xintshabyana xa mina swi va nkateko+ naswona ndzi ta endla leswaku mpfula yi na hi nkarhi lowu faneleke. Mikateko yi ta na ku fana ni timpfula.+ 27 Mirhi yi ta tswala mihandzu, misava yi ta humesa ntshovelo wa yona+ naswona ti ta tshama ti sirhelelekile etikweni. Ti ta swi tiva leswaku hi mina Yehovha loko ndzi tshova majoko+ ya tona ni loko ndzi ti ponisa eka lava ti endlaka mahlonga. 28 Matiko a ma nge he ti hlaseli, swiharhi a swi nge he ti dyi naswona ti ta tshama ti sirhelelekile, ti nga chavisiwi hi munhu.+

29 “‘“Ndzi ta ti endlela ndhawu leyi dumeke yo byala eka yona, a ti nge he dlayiwi hi ndlala etikweni+ naswona a ti nge he khomisiwi tingana hi matiko.+ 30 ‘Kutani ti ta swi tiva leswaku mina Yehovha Xikwembu xa tona ndzi na tona nileswaku tona, ku nga Vaisrayele i vanhu va mina,’+ ku vula Yehovha Hosi Leyi Tlakukeke.”’

31 “‘N’wina tinyimpfu+ ta mina, tinyimpfu leti ndzi ti khathalelaka, mi vanhu naswona mina ndzi Xikwembu xa n’wina,’ ku vula Yehovha Hosi Leyi Tlakukeke.”