Vaavanyisi
2 Hiloko ntsumi+ ya Yehovha yi suka eGiligala+ yi ya eBokimi, yi fika yi ku: “Ndzi mi humese eEgipta ndzi mi yisa etikweni leri ndzi hlambanyeke leswaku ndzi ta ri nyika vakokwa wa n’wina.+ Ndzi tlhele ndzi ku, ‘A ndzi nge pfuki ndzi wu tlurile ntwanano wa mina na n’wina.+ 2 A mi fanelanga mi endla ntwanano ni vaaki va tiko leri,+ mi fanele mi hirimuxa tialtari ta vona.’+ Kambe a mi ri yingisanga rito ra mina.+ Hikwalaho ka yini mi endle leswi? 3 Hi yona mhaka ndzi nga tlhela ndzi ku, ‘A ndzi nge va hlongoli exikarhi ka n’wina,+ va ta mi phasa+ naswona swikwembu swa vona swi ta mi hambukisa.’”+
4 Loko ntsumi ya Yehovha yi byela Vaisrayele marito lawa, va sungule ku rila. 5 Hiloko va thya ndhawu yoleyo va ku i Bokimi* kutani va endlela Yehovha gandzelo kwalaho.
6 Loko Yoxuwa a tshika Vaisrayele va famba, va ye etindhawini leti nga ndzhaka ya vona va ti teka ti va ta vona.+ 7 Vanhu va ye emahlweni va tirhela Yehovha hi nkarhi wa Yoxuwa ni wa vakulukumba lava hanyeke ku tlula Yoxuwa, lava voneke swilo hinkwaswo leswi Yehovha a swi endleleke Vaisrayele.+ 8 Kutani Yoxuwa n’wana wa Nuni, nandza wa Yehovha, a fa a ri ni malembe ya 110.+ 9 Hiloko va n’wi lahla endhawini leyi nga ndzhaka yakwe eTiminata-heresi,+ endhawini ya tintshava ya Efrayimi, en’walungwini wa Ntshava ya Gaxi.+ 10 Vanhu hinkwavo lava hanyeke hi nkarhi wolowo va file kutani ku sala ku velekiwa vanhu van’wana lava a va nga n’wi tivi Yehovha hambi ku ri ku tiva leswi a swi endleleke Vaisrayele.
11 Hiloko Vaisrayele va endla swilo swo biha emahlweni ka Yehovha va tlhela va gandzela swikwembu leswi vuriwaka Bali.+ 12 Hikwalaho va tshika Yehovha Xikwembu xa vatata wa vona, loyi a va humeseke etikweni ra Egipta.+ Va gandzela swikwembu swa vanhu lava va akelaneke na vona,+ va swi khinsamela kutani va hlundzukisa Yehovha.+ 13 Va tshika ku tirhela Yehovha kutani va gandzela Bali ni swifaniso swa Axitoreti.+ 14 Hiloko Yehovha a hlundzukela Vaisrayele swinene kutani a va nyiketa eka vaphangi lava va tekeleke swilo swa vona.+ U va nyikete eka valala va vona lava a va akelane na vona+ naswona a va nga ha swi koti ku lwa na vona.+ 15 Yehovha a a lwa na vona kun’wana ni kun’wana laha a va ya kona. Yehovha a va tisela makhombo+ hilaha a vuleke hakona+ naswona va xaniseke swinene hilaha Yehovha a va hlambanyeleke hakona.+ 16 Hiloko Yehovha a va vekela vaavanyisi lava a va ta va ponisa eka vaphangi.+
17 Kambe va ale ku yingisa vaavanyisi volavo naswona ku fana ni tinghwavava va tinyiketele eka swikwembu swin’wana va swi khinsamela. Va hatle va hambuka endleleni ya vakokwa wa vona, lava yingiseke milawu ya Yehovha.+ A va nga fani ni vakokwa wa vona. 18 Loko Yehovha a va vekela vaavanyisi,+ Yehovha a a seketela muavanyisi yoloye naswona a a va ponisa eka valala va vona loko muavanyisi yoloye a ha hanya; hikuva Yehovha a a va twela vusiwana+ vanhu lava a va tshikileriwa hi valala va vona.+
19 Kambe loko muavanyisi a fa, a va tlhela va endla swilo swo biha ngopfu ku tlula leswi endliweke hi vatata wa vona, va gandzela swikwembu swin’wana va tlhela va swi khinsamela.+ A va yi tshikanga mikhuva ya vona yo biha. 20 Eku heteleleni Yehovha a va hlundzukela ngopfu Vaisrayele,+ kutani a ku: “Hikwalaho ka leswi tiko leri ri tluleke ntwanano+ lowu ndzi wu endleke ni vakokwa wa rona naswona ri nga ndzi yingisangiki,+ 21 na mina, a ndzi nge ma hlongoli matiko lawa Yoxuwa a nga ma hlulangiki loko a ha hanya.+ 22 Leswi swi endleriwa ku ringa Vaisrayele ku vona loko va ta yingisa milawu ya Yehovha+ hilaha vatata wa vona va endleke hakona.” 23 Hiloko Yehovha a tshika matiko wolawo ma tshama na vona. A nga ma hlongolanga hi ku hatlisa naswona a nga ma nyiketanga eka Yoxuwa.