Vagalatiya
4 Loko mudyandzhaka a ha ri xihlangi a nga hambananga ni hlonga, hambileswi a nga hosi ya swilo hinkwaswo, 2 kambe u le hansi ka vakongomisi ni valanguteri kukondza ku fika siku leri vekiweke hi tata wakwe. 3 Hilaha ku fanaka, na hina loko ha ha ri vana, a hi ri mahlonga ya mianakanyo ni mahanyelo ya misava leyi.+ 4 Kambe loko nkarhi lowu vekiweke wu fika, Xikwembu xi rhume N’wana wa xona, loyi a velekiweke hi wansati+ naswona a a ri ehansi ka nawu,+ 5 leswaku a tshunxa lava nga ehansi ka nawu hi ku va xava,+ leswaku hi va vana va Xikwembu.+
6 Kutani leswi mi nga vana va Xikwembu, xi rhume moya+ wa N’wana wa xona etimbilwini ta hina+ naswona wu huwelela wu ku: “Abba,* Tatana!”+ 7 Hikwalaho, a wa ha ri hlonga kambe u n’wana wa Xikwembu; naswona loko u ri n’wana wa Xikwembu xi ta tlhela xi ku endla mudyandzhaka.+
8 Nilokoswiritano, loko mi nga si xi tiva Xikwembu, a mi ri mahlonga ya swikwembu swa hava. 9 Kambe leswi sweswi mi tivaka Xikwembu, kumbe leswi se mi tiviwaka hi Xikwembu, hikwalaho ka yini mi lava ku tlhelela eka swilo leswi nga pfuniki+ nchumu swa misava leyi?+ 10 Mi ehleketa leswaku ku ni masiku ni tin’hweti+ ni tinguva ni malembe leswi hlawulekeke naswona ma swi tlangela. 11 Ndza karhateka ha n’wina hikuva swi vonaka onge matshalatshala ya mina yo mi pfuna a ma tirhanga.
12 Vamakwerhu, ndza mi kombela leswaku mi fana na mina, hikuva na mina ndzi tshame ndzi fana na n’wina.+ A mi ndzi khomanga hi ndlela yo biha. 13 Kambe ma swi tiva leswaku a ku ri hikwalaho ka ku vabya ka mina leswi endleke leswaku ndzi kota ku mi chumayela mahungu lamanene ro sungula. 14 Naswona hambileswi ku vabya ka mina a ku ri ndzingo eka n’wina, a mi ndzi hlekulanga kumbe mi ndzi nyenya;* kambe mi ndzi amukele ku fana ni ntsumi ya Xikwembu, ku fana na Kreste Yesu. 15 Wu kwihi ntsako lowu a mi ri na wona? Hikuva ndza tiyiseka leswaku loko a swi koteka, a mi ta va mi xokole matihlo ya n’wina mi ndzi nyika wona.+ 16 Kutani, xana ndzi hundzuke nala wa n’wina hikwalaho ka leswi ndzi mi byelaka ntiyiso? 17 Va hiseka leswaku mi ta va seketela, kambe ku nga ri hi xikongomelo lexinene; va lava ku mi hambanisa na mina leswaku mi ta va landzela mi tirhela vona. 18 Hambiswiritano, i swinene mikarhi hinkwayo leswaku munhu a hisekela n’wina hi xikongomelo lexinene, naswona ku nga ri loko ndzi ri na n’wina ntsena, 19 vana vanga lavatsongo,+ ndza ha mi twela ku vava loku fanaka ni loku manana loyi a nga kusuhi ni ku veleka a ku twaka. Ndzi ta ya emahlweni ndzi ku twa ku fikela loko mi kombisa vumunhu bya Kreste. 20 Ndzi navela ku va swin’we na n’wina sweswi ni ku vulavula hi ndlela ya musa, hikuva a ndzi swi tivi leswaku ndzi mi endla yini.
21 Ndzi byeleni, n’wina lava lavaka ku va ehansi ka nawu, Xana a mi wu twi Nawu? 22 Hi xikombiso, ku tsariwile leswaku Abrahama a a ri ni vana vambirhi va majaha, un’wana u velekiwe hi nandza wa xisati+ kasi lowun’wana hi nsati loyi a tshunxekeke;+ 23 kambe loyi a n’wi kumeke ni nandza wa xisati u velekiwe hi ndlela ya ntumbuluko+ kasi loyi un’wana a n’wi kumeke ni nsati la tshunxekeke u velekiwe hi ku landza xitshembiso.+ 24 Swilo leswi swi nga tekiwa ku ri xifaniso; hikuva vavasati lava va fanekisela mitwanano yimbirhi, wun’wana wu endliwe eNtshaveni ya Sinayi,+ lowu velekaka vana va vuhlonga, ku nga Agara. 25 Kutani Agara u fanekisela Sinayi,+ ntshava ya le Arabiya naswona u fanekisela Yerusalema wa namuntlha hikuva u le vuhlongeni ni vana vakwe. 26 Kambe Yerusalema wa le henhla u tshunxekile naswona i mana wa hina.
27 Hikuva ku tsariwile: “Tsaka wena wansati wa mhika loyi a nga velekiki; bana nkulungwana wena wansati loyi a nga riki na switlhavi swa ku veleka; hikuva vana va wansati loyi a tshikiweke va tele ngopfu ku tlula va loyi a nga ni nuna.”+ 28 Kutani n’wina, vamakwerhu, mi vana va xitshembiso ku fana na Isaka.+ 29 Kambe ku fana ni le nkarhini wolowo, loyi a velekiweke hi ndlela ya ntumbuluko u sungule ku xanisa loyi a velekiweke hi matimba ya moya lowo kwetsima,+ nisweswi swi tano.+ 30 Nilokoswiritano, xana tsalwa ri ri yini? “Hlongola nandza loyi wa xisati ni n’wana wakwe, hikuva n’wana wa nandza loyi wa xisati a nge pfuki a ve mudyandzhaka swin’we ni n’wana wa nsati loyi a tshunxekeke.”+ 31 Hikwalaho, vamakwerhu, hina a hi vana va nandza kambe hi va nsati loyi a tshunxekeke.