Timotiya Wa Vumbirhi
1 Hi mina Pawulo, muapostola wa Kreste Yesu hi ku rhandza ka Xikwembu hi ku ya hi xitshembiso xa vutomi lebyi vaka kona ha Kreste Yesu,+ 2 eka n’wananga Timotiya loyi a rhandzekaka:+
Onge u nga va ni musa lowukulu, tintswalo ni ku rhula leswi humaka eka Xikwembu Tatana na Kreste Yesu Hosi ya hina.
3 Ndzi khensa Xikwembu lexi ndzi xi endlelaka ntirho wo kwetsima hi ripfalo leri baseke hilaha vakokwana va endleke hakona. Ndzi ku khongelela vusiku ni nhlikanhi eka swikhongelo swa mina leswi dzikeke. 4 Loko ndzi tsundzuka mihloti ya wena, ndzi navela ku ku vona leswaku ndzi ta tsaka swinene. 5 Hikuva ndzi tsundzuka ripfumelo ra wena leri nga riki na vukanganyisi,+ leri kokwa wa wena wa xisati Luwisa ni mana wa wena Yunisi va rhangeke va va na rona, leri ndzi tshembaka leswaku na wena u na rona.
6 Hikwalaho ka leswi, ndza ku tsundzuxa leswaku nyiko ya Xikwembu leyi u yi kumeke loko ndzi ku tlhandleka mavoko,+ u yi tirhisa hi ku hiseka ku fana niloko u hlanganyeta ndzilo. 7 Hikuva Xikwembu a xi hi nyikanga moya wa vutoya,+ kambe xi hi nyike moya wa matimba+ ni wa rirhandzu ni wa mianakanyo leyinene. 8 Hikwalaho u nga khomiwi hi tingana hi vumbhoni lebyi khumbaka Hosi ya hina,+ kumbe hikwalaho ka mina loyi ndzi khomiweke hikwalaho ka Hosi, kambe tshemba leswaku Xikwembu xi ta ku nyika matimba+ yo tiyisela nhlomulo+ hikwalaho ka mahungu lamanene. 9 Xi hi ponisile kutani xi hi vitana leswaku hi ta va vanhu vo kwetsima,+ ku nga ri hikwalaho ka mitirho ya hina kambe hikwalaho ka xikongomelo xa xona ni musa lowukulu.+ Xi hi kombe musa wa xona lowukulu khale wa khaleni hi ku tirhisa Kreste Yesu, 10 kambe sweswi wu endliwe wu va erivaleni hi ku humelela ka Muponisi wa hina, Kreste Yesu,+ loyi a heriseke rifu+ naswona a hi paluxeleke ndlela yo kuma vutomi+ ni miri lowu nga onhakiki+ hi ku tirhisa mahungu lamanene,+ 11 lawa ndzi vekiweke ku va muchumayeri ni muapostola ni mudyondzisi wa wona.+
12 Hi yona mhaka leyi ndzi xanisekaka hi ndlela leyi,+ kambe a ndzi khomiwi hi tingana.+ Hikuva ndza n’wi tiva Loyi ndzi pfumeleke eka yena naswona ndza tshemba leswaku wa swi kota ku hlayisa leswi ndzi n’wi khomiseke swona ku fikela esikwini rero.+ 13 Yana emahlweni u landzela marito lamanene+ lawa u ma tweke eka mina hi ripfumelo ni rirhandzu hi ku va ni vun’we na Kreste Yesu. 14 Hlayisa nchumu lowu wa nkoka lowu u khomisiweke wona hi ku tirhisa moya lowo kwetsima lowu tshamaka eka hina.+
15 Wa swi tiva leswaku vanhu hinkwavo va le xifundzheni xa Asiya+ va ndzi fularherile, ku katsa na Figelo na Hermogene. 16 Onge Hosi yi nga va ni tintswalo eka ndyangu wa Onesiforo,+ hikuva a a tshama a ri karhi a ndzi tiyisa naswona a nga khomiwi hi tingana hileswi ndzi khomiweke. 17 Ku ri na sweswo, loko a ri eRhoma u ndzi lave a kala a ndzi kuma. 18 Onge Hosi yi nga endla leswaku Yehovha* a n’wi komba tintswalo hi siku rero. Naswona u yi tiva kahle mitirho hinkwayo leyi a yi endleke eEfesa.