Vaavanyisi

11 Yefta+ wa Mugiliyadi a a ri nhenha leyi nga ni matimba; a a ri n’wana wa nghwavava, tata wa Yefta a ku ri Giliyadi. 2 Kambe nsati wa Giliyadi wa xitekwa na yena a n’wi velekela vana va majaha. Loko vana volavo va kurile, va hlongola Yefta va ku eka yena: “A wu nge yi kumi ndzhaka endyangwini wa tatana, hikuva u n’wana wa wansati un’wana.” 3 Hiloko Yefta a baleka vamakwavo a ya tshama etikweni ra Toba. Kutani vavanuna lava a va nga ri na mitirho va tihlanganisa na Yefta, va n’wi landzela.

4 Hi ku famba ka nkarhi, Vaamoni va lwa ni Vaisrayele.+ 5 Loko Vaamoni va ri karhi va lwa ni Vaisrayele, vakulukumba va le Giliyadi va hatle va landza Yefta etikweni ra Toba. 6 Va byela Yefta va ku: “Tana u ta va ndhuna ya hina leswaku hi ta lwa ni Vaamoni.” 7 Kambe Yefta a byela vakulukumba va le Giliyadi a ku: “Xana a hi n’wina lava a mi ndzi venga mi tlhela mi ndzi hlongola endlwini ya tatana?+ Hikwalaho ka yini mi ta eka mina sweswi loko mi ri ekhombyeni?” 8 Hiloko vakulukumba va le Giliyadi va byela Yefta va ku: “Hi yona mhaka hi teke eka wena sweswi. Loko wo famba na hina hi ya lwa ni Vaamoni, u ta va murhangeri wa hina etikweni hinkwaro ra Giliyadi.”+ 9 Kutani Yefta a byela vakulukumba va le Giliyadi a ku: “Loko mi ndzi vuyisa ekaya leswaku ndzi ya lwa ni Vaamoni kutani Yehovha a ndzi pfuna ndzi va hlula, ndzi ta va murhangeri wa n’wina hakunene!” 10 Hiloko vakulukumba va le Giliyadi va byela Yefta va ku: “Yehovha a a ve mbhoni exikarhi ka hina loko ho ka hi nga swi endli leswi u swi vulaka.” 11 Yefta a famba ni vakulukumba va le Giliyadi kutani vanhu va n’wi endla murhangeri ni ndhuna ya vona. Hiloko Yefta a phindha marito hinkwawo lawa a ma vuleke emahlweni ka Yehovha eMizpa.+

12 Kutani Yefta a rhumela vanhu eka hosi ya Vaamoni+ a ku: “Hikwalaho ka yini u tile ku ta lwa na mina etikweni ra mina?” 13 Hiloko hosi ya Vaamoni yi hlamula vanhu lava rhumiweke hi Yefta yi ku: “Ndzi lwa na wena hikwalaho ka leswi Vaisrayele va tekeke tiko ra mina loko va huma eEgipta,+ ku suka eArinoni+ ku ya eYaboko ni ku ya fika eYordani.+ Sweswi ri vuyiseni hi ku rhula.” 14 Kambe Yefta a tlhela a rhumela vanhu eka hosi ya Vaamoni 15 va ku eka yona:

“Yefta u ri: ‘Vaisrayele a va tekanga tiko ra Vamowabu+ ni ra Vaamoni,+ 16 hikuva loko Vaisrayele va huma eEgipta, va fambe emananga ku ya fika eLwandle ro Tshwuka,+ hiloko va fika eKadexi.+ 17 Kutani Vaisrayele va rhumela vanhu eka hosi ya Edomu,+ va ku: “Hi kombela u hi pfumelela hi tsemakanya hi le tikweni ra wena,” kambe hosi ya Edomu a yi va yingisanga. Va tlhele va rhumela vanhu eka hosi ya Mowabu,+ na yona a yi va pfumelelanga. Kutani Vaisrayele va ya emahlweni va tshama eKadexi.+ 18 Loko va famba emananga, va te hi le handle ka tiko ra Edomu+ ni ra Mowabu. Va fambe hi le vuxeni bya tiko ra Mowabu+ kutani va fika va dzima matende eArinoni; a va wu tsemakanyanga ndzilakana wa Mowabu,+ hikuva Arinoni a wu ri ndzilakana wa Mowabu.

19 “‘Endzhaku ka sweswo Vaisrayele va rhuma vanhu eka Sihoni hosi ya Vaamori, loyi a a fuma a ri eHexiboni, va ku eka yena: “Hi kombela u hi pfumelela hi tsemakanya hi le tikweni ra wena, hi ya etikweni ra hina.”+ 20 Kambe Sihoni a nga va pfumelelanga Vaisrayele ku tsemakanya etikweni rakwe hikuva a a nga va tshembi, hiloko Sihoni a hlengeleta vanhu vakwe hinkwavo, va dzima matende eYahasa, va lwa ni Vaisrayele.+ 21 Kutani Yehovha Xikwembu xa Vaisrayele a nyiketa Sihoni ni vanhu vakwe hinkwavo eka Vaisrayele, lerova va va hlula, kutani Vaisrayele va teka tiko hinkwaro leri Vaamori a va tshama eka rona endhawini yoleyo.+ 22 Va teka ndhawu hinkwayo ya Vaamori ku suka eArinoni ku ya fika eYaboko ni ku suka emananga ku ya fika eYordani.+

23 “‘I Yehovha Xikwembu xa Vaisrayele loyi a hlongoleke Vaamori emahlweni ka Vaisrayele lava nga vanhu vakwe,+ kutani xana wena u lava ku hlongola Vaisrayele? 24 Xana xilo xin’wana ni xin’wana lexi Kemoxi+ xikwembu xa wena a ku nyikeke xona a hi xa wena? Hikwalaho munhu un’wana ni un’wana loyi Yehovha Xikwembu xa hina a n’wi hlongolaka emahlweni ka hina hi ta n’wi hlongola.+ 25 Xana wena wa n’wi tlula Balaka+ n’wana wa Sipora, hosi ya Mowabu? Xana u tshame a phikizana ni Vaisrayele kumbe ku lwa na vona? 26 Loko Vaisrayele va ha tshama eHexiboni ni le swimitanini leswi nga ekusuhi na wona+ ni le Arowere ni le swimitanini leswi nga ekusuhi na wona ni le mitini hinkwayo leyi nga eribuweni ra Arinoni ku ringana malembe ya 300, hikwalaho ka yini u nga yi tekanga miti yoleyo hi nkarhi wolowo?+ 27 Mina a ndzi ku dyohelanga, kambe wena wa hoxisa leswi u ndzi hlaselaka. Leswi Yehovha a nga Muavanyisi+ a a avanyise namuntlha exikarhi ka Vaisrayele ni Vaamoni.’”

28 Kambe hosi ya Vaamoni a yi ri yingisanga rungula leri Yefta a yi rhumeleke rona.

29 Moya wa Yehovha wu va ehenhla ka Yefta,+ hiloko a tsemakanya etikweni ra Giliyadi ni ra Manase, a ya etikweni ra Mizpe wa Giliyadi,+ loko a suka eMizpe wa Giliyadi a hundzela eka Vaamoni.

30 Kutani Yefta a endla xitshembiso+ eka Yehovha a ku: “Loko wo ndzi pfuna ndzi hlula Vaamoni, 31 loyi a nga ta huma enyangweni ya yindlu ya mina a ndzi hlanganisa loko ndzi vuya eku lweni ni Vaamoni, u ta va wa wena Yehovha+ naswona ndzi ta n’wi nyiketa a va gandzelo ro hisiwa.”*+

32 Hiloko Yefta a ya lwa ni Vaamoni kutani Yehovha a n’wi pfuna a va hlula. 33 A dlaya vanhu vo tala ku sukela eArowere ku ya fika eMiniti, miti ya 20, ku ya fika ni le Avele-keramimi. Vaisrayele va hlula Vaamoni hi ndlela yoleyo.

34 Loko Yefta a fika ekaya kakwe eMizpa,+ n’wana wakwe wa nhwanyana a huma a n’wi hlanganisa a ri karhi a ba xingomana naswona a ri eku cineni! N’wana loyi o va swakwe. A a nga ri na n’wana wa jaha kumbe wa nhwanyana handle ka yena. 35 Loko a n’wi vona, a handzula swiambalo swakwe a ku: “Yoo, n’wananga! U ndzi dlele, hikuva hi wena loyi ndzi faneleke ndzi ku fambisa. Ndzi endle xitshembiso eka Yehovha, a ndzi nge swi koti ku tlhelela endzhaku.”+

36 Kambe a ku eka yena: “Tatana, loko u endle xitshembiso eka Yehovha, endla hilaha u tshembiseke hakona,+ tanihi leswi Yehovha a ku pfuneke leswaku u tirihisela eka valala va wena, ku nga Vaamoni.” 37 Hiloko a byela tata wakwe a ku: “Ndzi kombela ku endleriwa xilo xin’we ntsena: Ndzi pfumelele ndzi famba tin’hweti timbirhi ndzi ya etintshaveni, ndzi ya rila ni vanghana va mina va vanhwanyana, hikuva a ndzi nge tekiwi.”

38 Hiloko Yefta a ku: “Famba!” Kutani a n’wi tshika a famba tin’hweti timbirhi a ya etintshaveni ni vanghana vakwe va vanhwanyana a ya rila, hikuva a a nga ha ta tekiwa. 39 Endzhaku ka tin’hweti timbirhi, a tlhelela eka tata wakwe, hiloko tata wakwe a endla leswi a swi tshembiseke hi yena.+ N’wana loyi a nga etlelanga ni wanuna ni siku ni rin’we. Kutani swi va mukhuva* eIsrayele: 40 Lembe ni lembe, vanhwanyana va Vaisrayele a va ya va ya khutaza n’wana wa Yefta wa Mugiliyadi, masiku ya mune hi lembe.