Timotiya Wo Sungula
5 U nga holoveli wanuna la kuleke.+ Ku ri na sweswo, vulavula na yena hi musa tanihi tata wa wena, majaha tanihi vamakwenu, 2 vavasati lava kuleke tanihi vamanana, u xixima vanhwanyana tanihi vamakwavo va xisati.
3 Xixima tinoni leti nga tinoni ta xiviri.*+ 4 Kambe loko noni yo karhi yi ri ni vana kumbe vatukulu, a va rhange va dyondza ku kombisa leswaku va tinyiketele eka Xikwembu emindyangwini ya vona+ naswona va fanele va ya emahlweni va hlayisa vatswari va vona ni vakokwa wa vona,+ hikuva leswi swa amukeleka emahlweni ka Xikwembu.+ 5 Kutani wansati loyi a nga noni ya xiviri naswona a nga riki na nchumu, u tshembe Xikwembu+ naswona u tshama a ri karhi a endla swikombelo ni ku khongela vusiku ni nhlikanhi.+ 6 Kambe loyi a hanyelaka ku enerisa ku navela* ka yena ntsena u file hambiloko a ha hanya. 7 Kutani yana emahlweni u va nyika swileriso leswi leswaku va nga soriwi. 8 Kahlekahle loko munhu a nga va hlayisi va ka vona, ngopfungopfu swirho swa ndyangu wakwe, u landzule ripfumelo naswona u bihe ngopfu ku tlula munhu loyi a nga riki na ripfumelo.+
9 Noni yi ta tsariwa enxaxamelweni loko yi ri ni malembe ya 60 ku ya ehenhla, loko yi ve nsati wa nuna un’we, 10 yi dume hi ku endla mitirho leyinene,+ loko yi kurise vana,+ loko yi kombise malwandla,+ loko yi hlambise milenge ya vakwetsimi,+ loko yi pfune lava a va xaniseka,+ loko yi tinyiketele ku endla ntirho wun’wana ni wun’wana lowunene.
11 Kambe, tinoni leti ta ha riki titsongo u nga ti tsali enxaxamelweni hikuva loko ti sungula ku navela timhaka ta masangu ti ta lava ku tekiwa kutani ntirho wa tona eka Kreste wu ta kavanyeteka. 12 Ti ta avanyisiwa hikuva ti tshike xitshembiso lexi ti nga tshama ti xi endla. 13 Hi nkarhi lowu fanaka ti dyondza ni ku tshama hi mavoko, ti rhendzeleka ni miti; a ti tshami hi mavoko ntsena kambe ti tlhela ti hleva ni ku nghenelela etimhakeni ta van’wana,+ ti vulavula hi swilo leswi ti nga fanelangiki ti vulavula ha swona. 14 Hikwalaho, ndzi navela leswaku tinoni letitsongo ti tekiwa,+ ti veleka vana,+ ti hlayisa ndyangu, ti nga nyiki mukaneti xivangelo xo sola. 15 Entiyisweni, van’wana se va hambukisiwile leswaku va landzela Sathana. 16 Loko ku ri ni wansati loyi a nga mupfumeri loyi a nga ni maxaka lama nga tinoni, a a ti pfune leswaku vandlha ri nga tikeriwi. Kutani rona ri ta pfuna lava nga tinoni ta xiviri.*+
17 Vakulu va fanele va xiximiwa swinene+ hileswi va rhangelaka hi ndlela leyinene,+ ngopfungopfu lava tirhaka hi matimba eku vulavuleni ni le ku dyondziseni hi rito ra Xikwembu.+ 18 Hikuva tsalwa ri ri, “U nga tshuki u pfala nomu wa nkuzi loko yi ri karhi yi hula mavele,”+ nakambe ri ri, “Mutirhi u faneriwa hi hakelo yakwe.”+ 19 U nga xi pfumeli xihlehlo lexi nkulukumba* a hehliwaka ha xona handle ka loko ku ri ni vumbhoni bya timbhoni timbirhi kumbe tinharhu.+ 20 Tshinya+ vanhu hinkwavo lava hanyaka hi xidyoho+ emahlweni ka timbhoni hinkwato, leswaku ni lavan’wana va ta chava. 21 Ndzi ku lerisa emahlweni ka Xikwembu, eka Kreste Yesu ni le ka tintsumi leti hlawuriweke leswaku u yingisa swileriso leswi hi ku kambisisa swilo hinkwaswo hi vukheta, u nga vi ni xihlawuhlawu loko u endla xiboho.+
22 U nga hatliseli ku tlhandleka munhu mavoko;*+ naswona u nga katseki eswidyohweni swa van’wana; tshama u tengile.
23 U nga ha nwi mati ntsena* kambe nwana ni vhinyo yitsongo hikwalaho ka khwiri ra wena ni hikwalaho ka leswi u tshamelaka ku vabya.
24 Swidyoho swa vanhu van’wana swa tiviwa kutani va hatla va avanyisiwa, kambe swa vanhu van’wana swi vonaka endzhaku.+ 25 Hi ndlela leyi fanaka ni mitirho leyinene ya tiviwa,+ niloko yi nga hatli yi tiviwa a yi nge tshami yi fihlekile.+